Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25

Feagaiga Tuai

Feagaiga Fou

2 Tupu 8 O LE TUSI PA'IA - Ekalesia Katoliko Roma (RSCB)

O le Toe Fo‘i mai o le Fafine Sunema

1. ‘Ua fai atu Elisaia i le fafine na fa‘aolaina e ia lana tama tane, ‘ua fa‘apea atu, “Tu ia i luga, ‘inā ‘outou ō ma lou ‘āiga, ‘ia āumau i se mea e mafai ‘ona e āumau ai; auā ‘ua vala‘au e le ALI‘I i le oge; e o‘o ai fo‘i i le nu‘u i tausaga e fitu.”

2. ‘Ona tula‘i ai lea o le fafine, ‘ua fai a‘i le ‘upu a le tagata o le Atua; ‘ua latou ō ma lona ‘āiga, ‘ua āumau i le nu‘u o Filisitia i tausaga e fitu.

3. ‘Ua mavae ia tausaga e fitu, ‘ona fo‘i mai ai lea o le fafine mai le nu‘u o Filisitia; ‘ua alu atu o tagi i le tupu i lona fale ma lona fanua.

4. ‘Ua tautala le tupu ma Kiasi le ‘au‘auna a le tagata o le Atua, ‘ua fa‘apea ane, “‘Inā ta‘u mai ia ‘iā te a‘u o vāvega uma na faia e Elisaia.”

5. O lo‘o tala atu ia i le tupu i le tagata oti na na fa‘aolaina, fa‘auta fo‘i, o le fafine e ana le tama na fa‘aolaina e ia na tagi mai i le tupu i lona fale ma lona fanua. ‘Ona fai ane lea o Kiasi, “Le ali‘i e, le tupu, o le fafine lava lenei, o lana tama fo‘i lenei na fa‘aolaina e Elisaia.”

6. ‘Ona fesili atu ai lea o le tupu i le fafine, ‘ona tala mai ai lea o ia ‘iā te ia. ‘Ona tofia lea e le tupu o le tasi ‘au‘auna sili, ‘ua fa‘apea atu, “‘Ia toe avatu ‘iā te ia ana mea uma, ‘atoa ma mea uma na tutupu i le fanua talu le aso na tu‘ua ai e ia le nu‘u, e o‘o i lenei lava aso.”

O Elisaia ma Peniata le Tupu o Suria

7. ‘Ua alu atu Elisaia i Tamaseko, a o ma‘i Peniata le tupu o Suria, ‘ona ta‘uina atu lea ‘iā te ia, ‘ua fa‘apea atu, “‘Ua sau le tagata o le Atua ‘i‘inei.”

8. ‘Ona fai atu ai lea o le tupu ‘iā Asaeli, “‘Ia e ‘ave se mea alofa i lou lima i le ē alu, se‘i o‘o i le tagata o le Atua ma fesili atu ai i le ALI‘I, ‘ia fa‘apea ane, Pe ‘ou te mālōlō i lenei ma‘i?”

9. ‘Ona alu ai lea o Asaeli e o‘o ‘iā te ia, ‘ua ‘ave fo‘i e ia le alofa i lona lima, o mea lelei uma i Tamaseko e fagafulu avega a kamela, ‘ona sau ai lea o ia, ‘ua tu mai i ona luma, ‘ua fa‘apea mai, “‘Ua ‘auina mai a‘u ‘iā te oe e lou atali‘i o Peniata le tupu o Suria, o lo‘o fa‘apea mai, ‘Pe ‘ou te mālōlō i lenei ma‘i?’”

10. ‘Ona fai atu lea o Elisaia ‘iā te ia, “Alu ia, fai atu ‘iā te ia, ‘E mafai lava ‘ona e toe soifua;’ a ‘ua fa‘aali mai e le ALI‘I ‘iā te a‘u, o le a maliu lava ia.”

11. ‘Ona pulato‘a atu lava lea o ona mata, ‘ua i‘u ‘ina mā ai o ia; ‘ona tagi ai lea o le tagata o le Atua.

12. ‘Ona fai mai ai lea o Asaeli, “Le ali‘i e, se a le mea ‘e te tagi ai?”‘Ona tali atu lea o ia, “Auā ‘ua ‘ou iloa le leaga ‘e te faia i le fānauga a Isaraelu; ‘e te susunu i o latou ‘olo i le afi, ‘e te fasi i o latou taulele‘a i le pelu, ‘e te palasi ‘iā latou tama meamea, ‘e te fa‘atiau i o latou fafine totō.”

13. ‘Ona fai mai ai lea o Asaeli, “O le a ‘ea? se uli ‘ea lau ‘au‘auna e fai ai lenā mea tele?”‘Ona tali atu ai lea o Elisaia, “‘Ua fa‘aali mai e le ALI‘I ‘iā te a‘u, o le a fai oe ma tupu o Suria.”

14. ‘Ona alu ‘ese ai lea o ia ‘iā Elisaia, ‘ua alu atu i lona ali‘i; ‘ona fai mai ai lea o ia ‘iā te ia, “Se a ‘ea le ‘upu a Elisaia, ‘iā te oe?”‘Ona tali atu ai lea o ia, “Na ia fai mai ‘iā te a‘u, ‘e te toe soifua lava oe.”

15. ‘Ua o‘o i le taeao, ‘ona tago lea o ia i le ‘ie mafiafia, ‘ua fufui i le vai, ‘ona fa‘apulou a‘i lea ona fofoga, ‘ua oti ai.‘Ona soloa‘i ane ai lea o Asaeli e fai ma tupu.

O Ioramo le Tupu o Iuta

16. O le lima o tausaga o Ioramo le atali‘i o Aapo le tupu o Isaraelu, a o fai Iosefatu ma tupu o Iuta, na fai ai Ioramo le atali‘i o Iosefatu ma tupu o Iuta.

17. O le tolugafulu ma le lua o ona tausaga na fai ai o ia ma tupu; e valu fo‘i tausaga na fai ai o ia ma tupu i Ierusalema.

18. Na ia savali fo‘i i le ala o tupu o Isaraelu, pei ‘ona faia e le ‘āiga o Aapo; auā o le afafine o Aapo na fai māna avā, ‘ua fai fo‘i e ia le amio leaga i luma o le ALI‘I.

19. ‘Ae le‘i finagalo le ALI‘I ‘ona fa‘aumatia o Iuta, ‘ona o lana ‘au‘auna o Tavita, fa‘apei ‘ona fetalai mai o ia ‘iā te ia, e tu‘uina mai le lamepa ‘iā te ia ma ana fānau i aso uma.

20. O lana nofoa‘iga na fōua ai Iuta e Etoma, ‘ua latou fa‘anofo so latou lava tupu.

21. ‘Ona alu atu ai lea o Ioramo i Seira, ‘ua ‘iā te ia fo‘i o kariota uma. ‘Ona tula‘i lea o ia i le po, ‘ua na fasi ‘iā Etoma na si‘o ‘iā te ia, ‘atoa ma ali‘i o kariota, ‘ona sola ai lea o le nu‘u i o latou fale ‘ie.

22. A ‘ua fōua le pule a Iuta e Etoma, ‘ua o‘o lava i ona po nei. O ia ona po fo‘i na fou ai Lipena.

23. O toe o mea na faia e Ioramo, ‘atoa ma mea uma na faia e ia, e le‘i tusia ‘ea i le tusi o tala i nofoa‘iga a tupu o Iuta?

24. ‘Ua ta‘oto fo‘i Ioramo fa‘atasi ma ona tamā, ‘ua tanumia fo‘i fa‘atasi ma ona tamā i le ‘a‘ai o Tavita. ‘Ona soloa‘i ane ai lea o Aasaia lona atali‘i e fai ma tupu.

O Aasaia le Tupu o Iuta

25. O le sefulu ma le lua o tausaga o Ioramo le atali‘i o Aapo le tupu o Isaraelu, na fai ai ma tupu o Aasaia le atali‘i o Ioramo, le tupu o Iuta.

26. ‘Ua fai ma tupu Aasaia i le luafulu ma le lua o ona tausaga; e tasi fo‘i le tausaga na fai ai o ia ma tupu i Ierusalema. O le igoa o lona tinā o Atalia, le afafine o Omeri le tupu o Isaraelu.

27. ‘Ua ia savali fo‘i i le ala o le ‘āiga o Aapo, ‘ua na fai fo‘i le amio leaga i luma o le ALI‘I, pei o le ‘āiga o Aapo; auā na ‘āiga o ia ma sa Aapō.

28. ‘Ua la ō ma Ioramo, le atali‘i o Aapo i le tau‘a ma Asaeli le tupu o Suria i Ramota-Kiliata, ‘ona manu‘a lea o Ioramo ‘iā Suria.

29. ‘Ona fo‘i ai lea o Ioramo, le tupu i Isereelu, ia fofō ai ona manu‘a na manu‘a ai ‘iā Suria i Rama, ‘ina ‘ua tau o ia ma Asaeli le tupu o Suria. ‘Ona alu ifo ai lea o Aasaia le atali‘i o Ioramo le tupu o Iuta e o‘oo‘o ‘iā Ioramo, le atali‘i o Aapo i Isereelu, auā ‘ua manu‘a ia.#