1. ‘Ua vala‘au e le perofeta o Elisaia, le tasi so‘o o le ‘au perofeta, ‘ua fa‘apea atu i ai, “‘Inā fusi ia lou sulugātiti ma ‘ave i lou lima lenei fagu u‘u ma e alu i Ramota-Kiliata;
2. a e o‘o fo‘i i ai ‘ia e sā‘ilia Ieu le atali‘i o Iosefatu le atali‘i ia o Nimesi, i le ē ulu atu ma fai atu ‘iā te ia ‘ia tula‘i ai luma o ona uso, i le ‘ave ‘iā te ia i se afeafe tuloto;
3. ‘ona e tago ai lea i le fagu u‘u ma liligi ifo ai i lona ulu ma fai atu, ‘O lo‘o fa‘apea ‘ona fetalai mai o le ALI‘I: ‘Ua ‘ou fa‘au‘u ‘iā te oe e fai ma tupu o Isaraelu.’ I le e tōina le puipui ma e sola, ‘aua lava ne‘i e fa‘atali.”
4. ‘Ona alu ai lea o le taule‘ale‘a, o le perofeta fo‘i le taule‘ale‘a, i Ramota-Kiliata.
5. ‘Ua o‘o atu ia, fa‘auta, o nonofo mai ali‘i e pule i ‘au; ‘ona fai atu ai lea o ia, “Le ali‘i e, o la‘u fe‘au ‘iā te oe.”‘Ona fai mai ai lea o Ieu, “O se fea ‘ea o i matou nei uma?”‘Ona fai atu ai lea o ia, “Le ali‘i e, o oe lava.”
6. ‘Ona tula‘i ai lea o ia, ‘ua ulu atu i fale; ‘ona liligi ifo lea e ia o le u‘u i lona ulu, ‘ua fai atu ai ‘iā te ia, “O lo‘o fa‘apea ‘ona fetalai mai o le ALI‘I le Atua o Isaraelu, ‘Ua ‘ou fa‘au‘u ‘iā te oe e fai ma tupu o le nu‘u o le ALI‘I, o Isaraelu.
7. ‘E te fasia le ‘āiga o Aapo lou ali‘i, ‘ina ‘ia ‘ou taui ma sui, ‘iā Iesepela le toto o a‘u ‘au‘auna le ‘au perofeta, ‘atoa ma le toto o ‘au‘auna uma a le ALI‘I.
8. Auā o le a fano le ‘āiga uma lava o Aapo; ‘ou te fa‘aumatia fo‘i i sa Aapō o sē tula‘i atu i se ‘aupā, o le pologa ‘atoa ma le sa‘oloto ‘ua i Isaraelu;
9. ‘ou te fa‘atatau fo‘i le ‘āiga o Aapo i le ‘āiga o Ierepoamo le atali‘i o Nepata ma le ‘āiga o Paasa le atali‘i o Akia;
10. e ‘aina fo‘i e ulī Iesepela i le fanua o Isereelu, e leai fo‘i sē na te tanumia o ia.” ‘Ona tōina lea e ia o le puipui, ‘ua sola.
11. ‘Ona toe alu atu ai lea o Ieu i ‘au‘auna a lona ali‘i. ‘Ona fai mai lea o le tasi ‘iā te ia, “Pe ni malie pe ni tama‘i? O le a le mea na sau ai lea vale ‘iā te oe?”‘Ona fai atu ai lea o ia ‘iā te i latou, “‘Ua ‘outou iloa le tagata ‘atoa ma lana fe‘au.”
12. ‘Ona latou tali mai ai lea, “‘Ua pepelo. ‘Inā ta‘u mai ia ‘iā te i matou.”‘Ona fai atu ai lea o ia, “‘Ua fa‘apea ma fa‘apea lana ‘upu ‘iā te a‘u, ‘ua fai mai, ‘O lo‘o fa‘apea ‘ona fetalai mai o le ALI‘I, ‘Ua ‘ou fa‘au‘u ‘iā te oe e fai ma tupu o Isaraelu.’”
13. ‘Ona fa‘ata‘alise ai lea o i latou, ‘ua ta‘itasi ma tago i lona ‘ofu ma tu‘u i lalo ‘iā te ia i luga lava o le ala fa‘a‘apefa‘i, ‘ua fa‘asasau pū, ma fa‘apea atu, “‘Ua fai Ieu ma tupu.”
14. ‘Ona fōua ai lea o Ioramo, e Ieu le atali‘i o Iosefatu, le atali‘i ia o Nimesi. (Na leoleo fo‘i e Ioramo, Ramota-Kiliata, o i latou ma Isaraelu uma, ‘ona o Asaeli le tupu o Suria.
15. A ‘ua fo‘i atu le tupu o Ioramo i Isereelu e fofō ai ona manu‘a na manu‘a ai o ia ‘iā Suria i le tau‘a ma Asaeli le tupu o Suria.) ‘Ona fai atu lea o Ieu “‘Āfai e tatau ‘iā te ‘outou, ‘aua ne‘i sola se tasi i le ‘a‘ai ne‘i e alu e ta‘u atu i Isereelu.”
16. ‘Ona ti‘eti‘e ai lea o Ieu i le kariota, ‘ua alu i Isereelu, auā na ta‘oto ai Ioramo; ‘ua alu ifo fo‘i Aasaia le tupu o Iuta e o‘oo‘o ‘iā Ioramo.
17. ‘Ua tu fo‘i le tagata va‘ai i luga o le ‘olo i Isereelu; ‘ona iloa atu ai lea e ia o le vao tagata o Ieu o lo‘o alu atu; ‘ona fai atu ai lea, “‘Ua ‘ou iloa atu le vao tagata.”‘Ona fai mai lea o Ioramo, “‘Inā ‘auina atu ia o sē e ti‘eti‘e i se solofanua na te fa‘afetaia‘i i latou, ma fai ane i ai, ‘Pe filemū ‘ea?’”
18. ‘Ona alu ai lea o lē ti‘eti‘e i le solofanua e fa‘afetaia‘i ‘iā te ia, ‘ua fa‘apea atu, “O lo‘o fa‘apea ‘ona fetalai mai o le tupu, ‘Pe filemū ‘ea?’”‘Ona fai mai ai lea o Ieu, “‘Ona a se‘i filemū lava lea? ‘Inā sau ia oe i o‘u tua.”‘Ona fai atu ai lea o le tagata va‘ai, ‘ua fa‘apea atu, “‘Ua o‘o atu ‘iā te i latou lē na ‘auina, a ‘ua lē toe fo‘i mai.”
19. ‘Ona ‘auina atu ai lea e ia o lē ti‘eti‘e i le solofanua o le atu lua lea; ‘ua o‘o atu o ia ‘iā te i latou, ‘ua fa‘apea atu, “O lo‘o fa‘apea ‘ona fetalai mai o le tupu, ‘Pe filemū ‘ea?’”‘Ona tali mai ai lea o Ieu, “‘Ona a se‘i filemū lava lea? ‘Inā sau ia oe i o‘u tua.”
20. ‘Ona fai atu ai lea o le tagata va‘ai, ‘ua fa‘apea atu, “‘Ua o‘o lava ia ‘iā te i latou, a ‘ua lē toe fo‘i mai; o le fa‘amomo‘e fo‘i, e fa‘apei o le fa‘amomo‘e a Ieu le atali‘i o Nimesi, auā e so‘ona telea‘i ‘ona fa‘amomo‘e e ia.”
21. ‘Ona fai ane lea o Ioramo, “‘Inā sauni ia.” ‘Ona sauni ai lea o lona kariota. ‘Ona ō ai lea o Ioramo le tupu o Isaraelu, ‘atoa ma Aasaia le tupu o Iuta, ta‘itasi ma lona kariota, ‘ua la ō e fa‘afetaia‘i ‘iā Ieu ‘ua latou fetaia‘i fo‘i ma ia i le fanua o Napota le Isereelu.
22. ‘Ua iloa Ieu e Ioramo, ‘ona fai atu ai lea o ia, “Ieu e, e filemū ‘ea?”‘Ona fai mai ai lea o ia, “Se a se filemū, ‘ona lē ‘ua tele ‘ea o faita‘aga a lou tinā o Iesepela ma ana togafiti fa‘ataulāitu?”
23. ‘Ona liliu ai lea o Ioramo ma sola, ‘ua fa‘apea atu ‘iā Aasaia, “Aasaia e, o le fouvale le mea nei.”
24. ‘Ona meme‘i gase lea e Ieu o le ‘aufana, ‘ua fana ‘ua lavea ai Ioramo, i le vaitau‘au, ‘ua ati le ū i lona fatu; ‘ona pa‘ū ai lea o ia i totonu o lona kariota.
25. ‘Ona fai atu ai lea o Ieu ‘iā Pitika o lana ‘ave ‘au, “‘Inā ‘ava‘e ia o ia; ‘inā lafo i le fāsi fanua o Napota le Isereelu, auā ‘ia e manatua sa tā ō to‘alua o ti‘eti‘e i le kariota ma mulimuli atu i lona tamā o Aapo, ‘ona tu‘uina atu ai lea e le ALI‘I o lenā avega ‘iā te ia;
26. o lo‘o fetalai mai le ALI‘I, ‘Na ‘ou iloa lava ananafi le toto o Napota ma le toto o ona atali‘i; o lo‘o fetalai mai le ALI‘I, ‘Ou te taui atu fo‘i ‘iā te oe i lenei fanua.’ O lenei, ‘inā ‘ave ia e lafo ‘iā te ia i le fanua, e tusa ma le afioga a le ALI‘I.”
27. ‘Ua iloa e Aasaia le tupu o Iuta, ‘ona sola ai lea o ia i le ala i le fale ‘ua i le fanua. ‘Ona tuliloa lea o Ieu ‘iā te ia, ‘ua fai atu fo‘i, “‘Ia fasi fo‘i ‘iā te ia i le kariota.” ‘Ona fasia lea o ia i le ā‘ega i Kuru o i Ipelamo. ‘Ona sola ai lea o ‘iā i Mekito, ‘ua oti ai.
28. ‘Ona ‘ave ai lea o ia e ana ‘au‘auna i le kariota i Ierusalema, ‘ua tanu ‘iā te ia i lona tu‘ugamau fa‘atasi ma ona tamā i le ‘a‘ai o Tavita.
29. O le tausaga e sefulu ma le tasi o Ioramo le atali‘i o Aapo na fai ai Aasaia ma tupu e pule ‘iā Iuta.
30. ‘Ua o‘o Ieu i Isereelu, ‘ona lagona lea e Iesepela, ‘ona vali ai lea e ia ona mata ma teuteu lona ulu, ‘ua va‘ai mai i le fa‘amalama.
31. ‘Ua ulu atu Ieu i le faitoto‘a, ‘ona fai mai ai lea o ia, “Pe na manuia ‘ea Semeri, o lē na fasioti i lona ali‘i?”
32. ‘Ona tepa a‘e ai lea o ia i le fa‘amalama, ‘ua fa‘apea atu, “O ai ‘ea e ‘au ‘iā te a‘u? Po o ai?” ‘Ona va‘ai mai ai lea ‘iā te ia o ‘au‘auna sili e to‘alua pe to‘atolu.
33. ‘Ona fai atu ai lea o ia, “‘Ia ‘outou lafo ifo ia ‘iā te ia.” ‘Ona latou lafo ifo ai lea ‘iā te ia; ‘ua pisia fo‘i le pā ma solofanua i lona toto; ‘ona soli ai lea e Ieu ‘iā te ia.
34. ‘Ua ulufale atu lea o ia ‘ua ‘ai fo‘i ma inu, ‘ona fai atu ai lea, “‘Inā asiasi ia i lenā fafine malaia, ma tanu ‘iā te ia; auā o ia o le afafine o le tupu.”
35. ‘Ona latou ō ai lea e tanu ‘iā te ia; ‘ua na o lona ulupo‘o ma ona tapuvae ma ona tapulima na latou maua.
36. ‘Ona latou fo‘i mai ai lea, ‘ua ta‘u mai ‘iā te ia. ‘Ona fai atu ai lea o ia, “O le afioga a le ALI‘I lea, na fetalai mai ai i lana ‘au‘auna o Elia le Tisepi, e fa‘apea mai, ‘E ‘aina e ulī le tino o Iesepela i le fanua o Isereelu;
37. e i ai fo‘i le tino o Iesepela i luga o le lau‘ele‘ele i le fanua o Isereelu pei o otaota; latou te lē fa‘apea ane fo‘i, o Iesepela lenei.’”#