1. O le luafulu ma le tolu o tausaga o Ioasa le atali‘i o Aasaia le tupu o Iuta, na fai ai ma tupu Ioasasa le atali‘i o Ieu ‘iā Isaraelu i Samaria i tausaga e sefulu ma le fitu.
2. Na ia faia le amio leaga i luma o le ALI‘I, ‘ua mulimuli fo‘i i agasala a Ierepoamo le atali‘i o Nepata, o lē na fa‘atupu le agasala ‘iā Isaraelu, ‘ua ia le te‘a ‘ese ai lava.
3. ‘Ona tupu ai lea o le to‘asā o le ALI‘I ‘iā Isaraelu, ‘ua na tu‘uina atu i latou i le lima o Asaeli le tupu o Suria ma le lima o Peniata le atali‘i o Asaeli i aso uma.
4. ‘Ua ‘ai‘oi atu Ioasasa i le ALI‘I, ‘ua fa‘afofoga mai fo‘i le ALI‘I ‘iā te ia; auā ‘ua na silafia le sauāina o Isaraelu ‘ina ‘ua sauā mai le tupu o Suria ‘iā te i latou.
5. ‘Ona foa‘i mai ai lea e le ALI‘I o le fa‘aolataga ‘iā Isaraelu, na latou sao ai i lima o Suria; ‘ona nonofo ai lea o le fānauga a Isaraelu i o latou fale ‘ie, fa‘apei o anamua.
6. ‘Ae peita‘i ‘ua latou le te‘a ‘ese i agasala a le ‘āiga o Ierepoamo, o lē na fa‘atupu le agasala ‘iā Isaraelu, ‘ua latou sāvavali pea i ai; na tumau pea fo‘i le tupua o Asaira i Samaria.
7. ‘Ua na lē fa‘atotoe fo‘i nisi o le nu‘u mo Ioasasa ‘ua na o ē ti‘eti‘e i solofanua e to‘alimagafulu ma kariota e sefulu ma ‘au e sāvavali e sefulu afe; auā na fa‘auma e le tupu o Suria ‘iā te i latou, na ia fai fo‘i i latou ‘ia fa‘apei o le efuefu ‘ina ‘ua solia.
8. O toe o mea na faia e Ioasasa ma mea uma na faia e ia, ‘atoa ma lona fitafita, e le‘i tusia ‘ea i le tusi o tala i nofoa‘iga a tupu o Isaraelu?
9. ‘Ua ta‘oto fo‘i Ioasasa fa‘atasi ma ona tamā, ‘ua latou tanu ‘iā te ia i Samaria; ‘ona soloa‘i ane ai lea o Ioasa lona atali‘i e fai ma tupu.
10. O le tolugafulu ma le fitu o tausaga o Ioasa le tupu o Iuta na fai ai ma tupu Ioasa le atali‘i o Ioasasa ‘iā Isaraelu i Samaria i tausaga e sefulu ma le ono.
11. Na faia fo‘i e ia le amio leaga i luma o le ALI‘I, ‘ua lē te‘a ‘ese o ia i agasala uma a Ierepoamo le atali‘i o Nepata, o lē na fa‘atupu le agasala ‘iā Isaraelu, a ‘ua savali i ai o ia.
12. O toe o mea na faia e Ioasa, ‘atoa ma mea uma na faia e ia ma lona fitafita na ia tau ai ma Amasia le tupu o Iuta, e le‘i tusia ‘ea i le tusi o tala i nofoa‘iga a tupu o Isaraelu?
13. ‘Ua ta‘oto fo‘i Ioasa fa‘atasi ma ona tamā, ‘ona nofo ai lea o Ierepoamo i lona nofoāli‘i. ‘Ua tanumia fo‘i Ioasa i Samaria fa‘atasi ma tupu o Isaraelu.
14. ‘Ua maua Elisaia e le ma‘i na oti ai o ia. ‘Ona alu ifo ai lea o Ioasa le tupu o Isaraelu ‘iā te ia ma tagi i luga o ona mata, ‘ua fa‘apea mai, “Lo‘u tamā e, lo‘u tamā e, le kariota o Isaraelu ma ana ‘au e ti‘eti‘e i solofanua.”
15. ‘Ona fai atu ai lea o Elisaia ‘iā te ia, “Tago ia i le ‘aufana ma ū.” ‘Ona tago ai lea o ia i le ‘aufana ma ū.
16. ‘Ona fai atu ai lea o ia i le tupu o Isaraelu, “‘Ia u‘u lou lima i le ‘aufana,” ‘ona u‘u ai lea i lona lima; ‘ona fa‘ae‘e ai lea e Elisaia o ona lima i lima o le tupu.
17. ‘Ona fai atu ai lea o ia, “Tatala ia le fa‘amalama i sasa‘e.” ‘Ona tatala ai lea e ia. ‘Ona fai atu ai lea o Elisaia, “Fana atu ia.” ‘Ona fana atu ai lea o ia. ‘Ona fai atu ai lea o ia, “O le ū o le olataga mai i le ALI‘I ma le ū o le fa‘aolaina mai Suria, auā ‘e te fasia Suria i Afeka se‘ia e fa‘aumatia.”
18. ‘Ona fai atu ai lea o Elisaia, “Tago ia i ū.” ‘Ona tago ai lea o ia. ‘Ona fai atu ai lea o ia i le tupu o Isaraelu, “Sasa ia i le ‘ele‘ele.” ‘Ona sasa ai lea e ia fa‘atolu, ‘ona tu‘ua ai lea.
19. ‘Ona ita ai lea ‘iā te ia o le tagata o le Atua, ‘ua fa‘apea atu ai, “‘Ana e sasa fa‘alima pe fa‘aono po o pe na ‘e te fasia Suria se‘ia e fa‘aumatia ai; a o lenei, na o le fa‘atolu ‘e te fasia Suria.”
20. ‘Ua oti Elisaia, ‘ua latou tanu fo‘i ‘iā te ia.Na sau fo‘i ‘au a Moapi i le nu‘u i le amataga o le tausaga.
21. Sa latou tanu le tagata, fa‘auta fo‘i, ‘ua latou iloa le ‘au; ‘ona latou lafo ai lea o le tagata i le tu‘ugamau o Elisaia; ‘ua o‘o ifo le tagata, ‘ua papa‘i i ivi o Elisaia, ‘ona toe ola ai lea o ia, ‘ua tu i luga ona vae.
22. A ‘ua fa‘asauā Asaeli le tupu o Suria ‘iā Isaraelu i aso uma o Ioasasa.
23. A ‘ua alofa le ALI‘I ‘iā te i latou, ‘ua alofa mutimutivale mai fo‘i ‘iā te i latou, ‘ua na silasila mai fo‘i ‘iā te i latou ‘ona o lana feagaiga ma Aperaamo, ma Isaako ma Iakopo; e le‘i finagalo fo‘i e fa‘auma ‘iā te i latou, e le‘i lafoa‘i fo‘i ‘iā te i latou ai ona luma i ia ona po.
24. ‘Ua oti Asaeli le tupu o Suria, ‘ona soloa‘i ane ai lea o Peniata lona atali‘i e fai ma tupu.
25. ‘Ua toe fao mai fo‘i e Ioasa le atali‘i o Ioasasa a‘i le lima o Peniata le atali‘i o Asaeli, o ‘a‘ai na ia fao atu nai le lima o Ioasasa lona tamā i le tau‘a. Na tulia fa‘atolu o ia e Ioasa, ‘ua toe maua mai ai e ia ‘a‘ai o Isaraelu.#