Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25

Feagaiga Tuai

Feagaiga Fou

2 Tupu 12 O LE TUSI PA'IA - Ekalesia Katoliko Roma (RSCB)

O le Tala i mea na Tutupu i le Nofoa‘iga a Ioasa

1. O le fitu tausaga o Ieu na fai ai Ioasa ma tupu; o tausaga e fagafulu na fai ai o ia ma tupu i Ierusalema. O le igoa fo‘i o lona tinā o Sevi o le Peresepa.

2. ‘Ua faia fo‘i e Ioasa le amiotonu i luma o le ALI‘I i ona aso uma na a‘oa‘o atu ai Ieoiata le ositaulaga ‘iā te ia.

3. Na ‘ona ‘ua lē ‘ave‘eseina mea maualuluga; na fai taulaga pea le nu‘u ma fa‘amū mea manogi i mea maualuluga.

4. ‘Ua fai atu Ioasa i le ‘au ositaulaga, “O tupe uma o mea e fa‘apa‘iaina e ‘aumaia i le fale o le ALI‘I, o tupe a tagata ta‘ito‘atasi ‘ua faitaulia, o tupe o togiola e fa‘apei ‘ona fa‘atatauina le tagata ma tupe uma e manatu i ai le loto a le tagata e ‘aumai i le fale o le ALI‘I.

5. O ositaulaga ‘ia ta‘itasi ma talia ia tupe i tagata ‘ua latou masani ma ‘ia latou toe fa‘aso‘o i mea ‘ua lepetia o le fale, i mea uma e iloa ai se mea ‘ua lepetia.”

6. ‘Ua o‘o i le luafulu ma le tolu o tausaga o Ioasa le tupu, a ‘ua lē fa‘aso‘oina e le ‘au ositaulaga o mea ‘ua lepetia o le fale.

7. ‘Ona ‘a‘ami ai lea e Ioasa le tupu o Ieoiata le ositaulaga ‘atoa ma le ‘au ositaulaga, ‘ua fai atu ‘iā te i latou, “Pe se a ‘ea le mea ‘ua ‘outou le fa‘aso‘o ai i mea ‘ua lepetia o le fale? O lenei, ‘aua ne‘i toe talia tupe i tagata ‘ua ‘outou masani, a ‘ia tu‘u atu ai lava e fai ai mea ‘ua lepetia o le fale.”

8. ‘Ona usiusita‘i ai lea o le ‘au ositaulaga, o le a le toe talia tupe i le nu‘u, e le fa‘aso‘o fo‘i mea na lepetia o le fale.

9. ‘Ona ‘ave ai lea e Ieoiata le ositaulaga o le ‘atola‘au, ‘ua fai fo‘i le gutu i lona ufi, ‘ona tu‘u ai lea i tafatafa o le fatafaitaulaga i le itū taumatau o le tagata e ulu mai i le fale o le ALI‘I; ‘ona fafao lea i ai e ositaulaga na leoleo i le faitoto‘a o tupe uma ‘ina ‘aumaia i le fale o le ALI‘I.

10. ‘Ua latou iloa e tele tupe i le ‘atola‘au, ‘ona ō a‘e ai lea o le tusi‘upu a le tupu ma le ositaulaga sili, ‘ua fafao i taga ma faitau i tupe na maua i le fale o le ALI‘I.

11. ‘Ona la avatu ai lea o tupe na faitauina ‘iā te i latou ‘ua fai le galuega ē na leoleo i le fale o le ALI‘I; ‘ua latou tu‘u atu ai i tufuga ma tufuga ati fale, ē na galulue i le fale o le ALI‘I,

12. o ē ati pā fo‘i ma ē talai ma‘a; e fa‘atau a‘i fo‘i la‘au ma ma‘a talai e fa‘aso‘o a‘i mea ‘ua lepetia o le fale o le ALI‘I, ‘atoa ma mea uma na avatu mo le fale e fa‘aso‘o a‘i.

13. A o tupe na ‘aumaia i le fale o le ALI‘I e le‘i fai a‘i mo le fale o le ALI‘I ni tanoa ario, po o sele lamepa, po o ipu, po o pū, ni mea auro po o mea ario lava;

14. a ‘ua latou avatu ai i ē na fai le galuega ma ‘ua latou fa‘aso‘o ai le fale o le ALI‘I.

15. ‘Ua la lē fa‘amasino fo‘i i tagata na la tu‘uina atu i ai tupe e avatu i ē faigaluega; auā ‘ua latou fa‘amaoni.

16. O tupe ‘ona o le sesē ma tupe ‘ona o agasala na lē ‘aumaia ia i le fale o le ALI‘I; e a ositaulaga ia.

O le Fa‘amata‘u o Asaeli i Ierusalema

17. O ona po ia na alu a‘e ai Asaeli le tupu o Suria, ‘ua tau ma Kata, ‘ua ā‘ea fo‘i; ‘ona fa‘asaga atu ai lea o Asaeli o le a alu a‘e e tau ma Ierusalema.

18. ‘Ona ‘ave ai lea e Ioasa le tupu o Iuta o mea pa‘ia uma na fa‘asāina e ona tamā o Iosefatu, ma Ioramo, ma Aasaia, o tupu o Iuta, ‘atoa ma ana lava mea pa‘ia, ‘atoa ma auro uma na i ai i mea e teu ai ‘oloa o le fale o le ALI‘I ‘atoa ma le fale o le tupu, ‘ua avatu ai ‘iā Asaeli le tupu o Suria; ‘ona alu ‘ese ai lea o ia i Ierusalema.

O le oti o Ioasa

19. O toe o mea na faia e Ioasa, ‘atoa ma mea uma na faia e ia, e le‘i tusia ‘ea i le tusi o tala i nofoa‘iga a tupu o Iuta?

20. ‘Ua tula‘i, fo‘i ana ‘au‘auna ‘ua fou, ‘ua fasioti ‘iā Ioasa i le fale o Milo e ui ifo ai i Sila.

21. Auā o Iosaka le tama tane a Semea ma Iosapa le tama tane a Someli, o ana ‘au‘auna, na la fasi ‘iā te ia, ‘ona oti ai lea o ia; ‘ua latou tanu ‘iā te ia fa‘atasi ma ona tamā i le ‘a‘ai a Tavita. ‘Ona soloa‘i ane ai lea o Amasia lona atali‘i e fai ma tupu.