1. O lana nofoa‘iga na alu a‘e ai Nepukanesa le tupu o Papelonia, ‘ona ‘au‘auna ai lea o Ioakima ‘iā te ia i tausaga e tolu, ‘ona toe fōua ai lea e ia o ia.
2. ‘Ona ‘a‘auina lea ‘iā te ia e le ALI‘I o ‘au a Kaletaia ma ‘au a Suria ma ‘au a Moapi, ‘atoa ma ‘au a le fānauga a Amoni, na ia ‘a‘auina i latou i Iuta e fa‘aumatia a‘i, pei o le afioga a le ALI‘I na tulei mai i ana ‘au‘auna le ‘au perofeta.
3. O le afioga lava a le ALI‘I na o‘o ai lea mea ‘iā Iuta, ‘ina ‘ia na ‘ave ‘ese ‘iā te i latou i ona luma ‘ona o agasala a Manase, e tusa ma mea uma na ia faia;
4. auā fo‘i le toto o ē le sala na ia fa‘amaligiina, auā na ia fa‘atumuina Ierusalema i le toto o ē le sala; na lē mafai e le ALI‘I ‘ona fa‘amāgaloina ai.
5. O toe o mea na faia e Ioakima ma mea uma na ia faia, e le‘i tusia ‘ea ia mea i le tusi o tala i nofoa‘iga a tupu o Iuta?
6. ‘Ua ta‘oto fo‘i Ioakima fa‘atasi ma ona tamā; ‘ona soloa‘i ane ai lea o Ioakina lona atali‘i e fai ma tupu.
7. E le‘i toe sau fo‘i le tupu o Aikupito a‘i lona lava nu‘u; auā na faoa e le tupu o Papelonia mea uma sa i le tupu o Aikupito, pau mai i le alia o Aikupito pau mai i le vaitafe o Eufirate.
8. O le sefulu ma le valu o ona tausaga na fai ai Ioakina ma tupu, e tolu fo‘i masina na tupu ai o ia i Ierusalema. O le igoa o lona tinā o Neuseta le afafine o Elenatana o le Ierusalema.
9. Na faia fo‘i e ia le amio leaga i luma o le ALI‘I, pei o mea uma na faia e lona tamā.
10. O ona po ia na ō a‘e ai ‘au‘auna a Nepukanesa le tupu o Papelonia i Ierusalema, ona vagaia lea o le ‘a‘ai.
11. ‘Ua sau lava Nepukanesa le tupu o Papelonia i le ‘a‘ai, na vagaia fo‘i e ana ‘au‘auna.
12. ‘Ona alu atu ai lea o Ioakina le tupu o Iuta i le tupu o Papelonia, o ia ma lona tinā ma ana ‘au‘auna, ma ali‘i sa ‘iā te ia ma ana ‘au‘auna sili, na ‘ave fo‘i o ia e le tupu o Papelonia i le tausaga e valu o lana nofoa‘iga.
13. ‘Ua ia ‘ave ‘ese ai fo‘i ‘oloa uma lava na i le fale o le ALI‘I ma ‘oloa uma na i le fale o le tupu; na ia vavae‘eseina fo‘i mea auro uma na faia e Solomona le tupu o Isaraelu i le malumalu o le ALI‘I, pei ‘ona fetalai mai ai o le ALI‘I.
14. ‘Ua ia fa‘atāfeaina fo‘i Ierusalema uma, o ali‘i uma fo‘i, ‘atoa ma ē totoa uma, ‘ua sefulu afe o ē na fa‘atāfeaina; o tufuga uma fo‘i, ‘atoa ma ē galulue i u‘amea, e le‘i toe se tasi, na o tagata matitiva lava o le nu‘u.
15. ‘Ua ia fa‘atāfeaina fo‘i Ioakina i Papelonia, o le tinā fo‘i o le tupu ma avā a le tupu ma ana ‘au‘auna sili, ‘atoa ma ali‘i sili o le nu‘u, ‘ua ia fa‘atāfeaina nai Ierusalema i Papelonia.
16. O tagata totoa uma e fitu afe ma tufuga ma ē galulue i u‘amea e tasi le afe, o i latou uma na malolosi ma lavātia tau‘a, na fa‘atāfeaina i latou e le tupu o Papelonia i Papelonia.
17. ‘Ona tofia lea e le tupu o Papelonia o Matania le uso o le tamā o Ioakina e fai ma tupu e sui a‘i o ia; na na sui fo‘i lona igoa ‘iā Setekaia.
18. O le luafulu ma le tasi o ona tausaga ‘ua fai ai Setekaia na tupu, e sefulu ma le tasi tausaga na tupu ai o ia i Ierusalema. O le igoa o lona tinā o Hamutala, le afafine o Ieremia le Lipena.
19. Na ia faia le amio leaga i luma o le ALI‘I pei o mea uma na faia e Ioakima.
20. Auā o le to‘asā o le ALI‘I ‘iā Ierusalema ma Iuta, ‘ua o‘o ‘ina lafoa‘iina ai i latou a‘i ona luma; ‘ua fōua ai fo‘i le tupu o Papelonia o Setekaia.#