Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25

Feagaiga Tuai

Feagaiga Fou

2 Tupu 21 O LE TUSI PA'IA - Ekalesia Katoliko Roma (RSCB)

O Manase le Tupu o Iuta

1. O le sefulu ma le lua o tausaga o Manase na fai ai o ia ma tupu; e limagafulu ma le lima o tausaga na ia tupu ai i Ierusalema. O le igoa fo‘i o lona tinā o Efiseva.

2. Na ia faia le amio leaga i luma o le ALI‘I, fa‘apei o amio leaga a nu‘u na tulia e le ALI‘I i luma o le fānauga a Isaraelu.

3. ‘Ua na toe faia fo‘i mea maualuluga sa fa‘aumatia e Esekia lona tamā, ma na fai fo‘i fatafaitaulaga o Paala, ‘ua na fai fo‘i le tupua o Asaira, fa‘apei ‘ona faia e Aapo le tupu o Isaraelu ma na ifo fo‘i i ‘au uma a le lagi ma ‘au‘auna i ai.

4. ‘Ua ia fai fo‘i fatafaitaulaga i le fale o le ALI‘I, o le mea na fetalai mai ai le ALI‘I, “O Ierusalema ‘ou te tu‘u ai lo‘u igoa.”

5. ‘Ua ia fai fo‘i fatafaitaulaga mo ‘au uma a le lagi i lotoā uma e lua o le fale o le ALI‘I.

6. ‘Ua ia fa‘aui ane fo‘i lona atali‘i i le afi, ‘ua ‘i‘ite fo‘i i ao o le lagi ma fai togafiti fa‘ataulāitu, ‘ua sā‘ili fo‘i i aitu vavalo ma taulāitu; e tele lava le amio leaga na ia faia i luma o le ALI‘I e fa‘a‘ono‘ono ai.

7. O le tupua fo‘i o Asaira na ia faia, ‘ua ia fa‘atūina i le fale sa fetalai ai le ALI‘I ‘iā Tavita ma Solomona lona atali‘i, “O le fale nei ‘atoa ma Ierusalema ‘ua ‘ou filifilia i itū‘āiga uma o Isaraelu ‘ou te tu‘u ai lo‘u igoa e fa‘avavau.

8. ‘Ou te lē toe tuli‘eseina Isaraelu i le lau‘ele‘ele na ‘ou avatu ai i o latou tamā, tau lava ‘ina ne‘i latou lē ‘ana‘ana ia fai mea uma na ‘ou poloa‘i atu ai ‘iā te i latou, ‘atoa ma le tulafono uma na poloa‘i atu ai e la‘u ‘au‘auna o Mose ‘iā te i latou.”

9. A na latou lē fa‘alogo lava; ‘ua fa‘asesē fo‘i Manase ‘iā te i latou e fai le amio leaga e sili i le amio na faia e nu‘u na fa‘aumatia e le ALI‘I i luma o le fānauga a Isaraelu.

10. ‘Ona fetalai mai lea o le ALI‘I i perofeta ana ‘au‘auna, ‘ua fa‘apea mai,

11. “‘Ona ‘ua faia e Manase le tupu o Iuta, ia mea leaga, e sili ‘ona leaga i mea uma na faia e sa Amorī na muamua ‘iā te ia, ‘ua ia fa‘atupu fo‘i le agasala a Iuta i ana tupua;

12. o le mea lea o lo‘o fa‘apea ‘ona fetalai mai ai o le ALI‘I le Atua o Isaraelu, Fa‘auta, o lo‘o ‘aumai e a‘u le malaia i Ierusalema ma Iuta, e ta‘itasi uma o ē fa‘alogologo i ai ma ta‘alili ai ona taliga e lua.

13. ‘Ou te fālō fo‘i i luga o Ierusalema le fua o Samaria ma le fua fa‘atautau o le ‘āiga o Aapo; ‘ou te fufulu fo‘i i Ierusalema pei ‘ona fufulu e se tasi le tanoa, e fufulu ma fa‘afaō ai.

14. ‘Ou te tu‘ulafoa‘iina fo‘i e o totoe o lo‘u tofi, ‘ou te tu‘u atu fo‘i ‘iā te i latou i lima o ē ‘ua ita mai ‘iā te i latou; e ‘avea ai fo‘i i latou ma tagata o tau‘a ma vete mo i latou uma o ē ita ‘iā te i latou;

15. auā ‘ua faia e i latou le amio leaga i o‘u luma, ‘ua fa‘a‘ono‘ono mai fo‘i ‘iā te a‘u talu lava i le aso na ō mai ai o latou tamā a‘i Aikupito, ‘ua o‘o lava i le aso nei.”

16. ‘Ua fa‘amasa‘a fo‘i e Manase le toto o ē le sala e tele lava, ‘ua na matuā fa‘atumuina ai Ierusalema; ‘ua fa‘aopoopo ai i lana agasala na ia fa‘atupu ai le agasala ‘iā Iuta, ‘ia faia le amio leaga i luma o le ALI‘I.

17. O toe o mea na faia e Manase, ‘atoa ma mea uma na na faia ma lana agasala na agasala ai o ia, e le‘i tusia ‘ea ia mea i le tusi o tala i nofoa‘iga a tupu o Iuta?

18. ‘Ua ta‘oto fo‘i Manase fa‘atasi ma ona tamā, ‘ona tanu ai lea o ia i le lotoā o lona fale, o le lotoā lea o Usa; ‘ona soloa‘i ane ai lea o Amone lona atali‘i e fai ma tupu.

O Amone le Tupu o Iuta

19. O le luafulu ma le lua o ona tausaga na fai ai Amone ma tupu, ‘ae lua tausaga na tupu ai o ia i Ierusalema. O le igoa fo‘i o lona tinā o Mesuleme, o le afafine o Arusa le Iatepa.

20. Na ia faia fo‘i le amio leaga i luma o le ALI‘I, fa‘apei ‘ona faia e lona tamā o Manase.

21. ‘Ua savali fo‘i o ia i le ala uma sa savali ai lona tamā, ‘ua na ‘au‘auna i tupua sa ‘au‘auna i ai lona tamā ma ifo fo‘i i ai.

22. ‘Ua ia tu‘ulafoa‘i fo‘i i le ALI‘I le Atua o ona tamā, ‘ua ia le savali lava i le ala o le ALI‘I.

23. ‘Ona fōua lea o Amone e ana ‘au‘auna, ‘ua latou fasioti fo‘i i le tupu i lona fale.

24. ‘Ona fasioti ai lea e tagata o le nu‘u ‘iā te i latou uma na fōua le tupu o Amone; ‘ua tofia fo‘i e tagata o le nu‘u lona atali‘i o Iosia e fai ma tupu e sui a‘i o ia.

25. O toe o mea a Amone na ia faia, e le‘i tusia ‘ea ia mea i le tusi o tala i nofoa‘iga a tupu o Iuta?

26. ‘Ua tanu fo‘i o ia i lona tu‘ugamau i le lotoā o Usa; ‘ona soloa‘i ane ai lea o Iosia lona atali‘i e fai ma tupu.#