1. Miingon ang Ginoo kanako,
2. “Tawo, ingna ang pangulo sa Tyre nga ako, ang Ginoong Dios, nag-ingon: Sa imong pagkagarboso nagaingon ka nga ikaw usa ka dios nga nagalingkod sa trono taliwala sa kadagatan. Apan ang tinuod, bisan kon nagahunahuna ka nga maalam ka sama sa usa ka dios, dili ka Dios kondili tawo ka lamang.
3. Nagahunahuna ka nga mas maalam ka pa kay kang Daniel, ug walay sekreto nga dili mo mahibaloan.
4. Pinaagi sa imong kaalam ug kahibalo naadunahan ka ug nakatigom ug bulawan ug plata sa tagoanan sa imong bahandi.
5. Pinaagi sa imong abilidad sa pagnegosyo, nadugangan pa gayod ang imong bahandi, ug tungod sa imong bahandi nahimo kang garboso.
6. Busa ako, ang Ginoong Dios, nag-ingon nga tungod kay nagahunahuna ka nga maalam ka sama sa usa ka dios,
7. pasulongon ko kanimo ang mga langyaw nga pinakabangis sa tanang nasod. Panglaglagon nila ang matahom nimong kabtangan nga imong naangkon pinaagi sa imong kaalam, ug mawala ang imong kadungganan.
8. Masakit nga kamatayon ang imong maangkon; itambog ka nila sa kinahiladman sa dagat.
9. Tan-awon ta kon makaingon ka pa ba gihapon nga ikaw usa ka dios atubangan sa mga mopatay kanimo. Alang kanila usa ka lang ka tawo ug dili dios.
10. Mamatay ka sa kamot sa mga langyaw sama sa kamatayon sa usa ka tawong wala nakaila kanako. Mahitabo gayod kini, kay ako, ang Ginoong Dios, ang nag-ingon niini.”
11. Miingon pag-usab ang Ginoo kanako,
12. “Tawo, pag-awit ug awit sa pagbangotan alang sa hari sa Tyre. Ingna siya nga ako, ang Ginoong Dios, nag-ingon: Kaniadto usa ikaw ka panig-ingnan sa pagkaperpekto. Maalam ka ug matahom kaayo.
13. Didto ka kaniadto sa Eden, sa hardin sa Dios. Gidekorasyonan ka sa nagkalain-laing matang sa mahalong mga bato: rubi, topasio, emerald, krisolito, onix, haspe, safiro, turquiso, ug berilo. Gidekorasyonan ka usab ug bulawan nga giandam nang daan alang kanimo sa adlaw nga ikaw gilalang.
14. Gipili ko ikaw ingon nga kerubin nga magbalantay sa akong balaan nga bukid. Naglakaw ka taliwala sa naggilak-gilak nga mga bato.
15. Walay ikasaway sa imong paggawi sukad sa paglalang kanimo hangtod nga naghimo ka ug daotan.
16. Ang imong daghang mga negosyo nahimong hinungdan sa imong kabangis ug nagpakasala ka. Busa giabog ko ikaw gikan sa akong balaan nga bukid; gipapahawa ko ikaw, kerubin nga magbalantay gikan sa naggilak-gilak nga mga bato.
17. Nahimo kang garboso tungod sa imong katahom. Gigamit mo sa kabuang ang imong kaalam aron mahimo kang bantogan. Mao nga gilabay ko ikaw sa yuta, ug nahimo kang talan-awon sa ubang mga hari.
18. Tungod sa imong daghang mga sala ug pagpanglimbong sa negosyo, gipasipalahan mo ang mga dapit diin ikaw nagasimba. Busa atubangan sa tanang nagatan-aw kanimo, gisunog ko ang imong dapit ug naugdaw ka. Nahimo ka na lang nga abo diha sa yuta.
19. Ang tanang nasod nga nakaila kanimo nahadlok sa imong gidangatan. Makalilisang ang imong kataposan, ug mahanaw ka na hangtod sa kahangtoran.”
20. Miingon ang Ginoo kanako,
21. “Tawo, pag-atubang sa Sidon ug panghimaraota kini.
22. Ingna siya nga ako, ang Ginoong Dios, nag-ingon: Gikontra ko ikaw, Sidon. Dayegon ako sa mga tawo kon silotan ko na ikaw, ug mahibaloan nila nga ako mao ang Ginoo. Niining paagiha, mapakita ko kanimo ang akong pagkabalaan.
23. Padad-an ko ikaw ug katalagman. Ug tungod niini, mobaha ang dugo diha sa imong mga kadalanan. Atakihon ka gikan sa nagkalain-laing direksyon ug daghan gayod ang mangamatay sa imong mga lumulupyo. Unya mahibaloan nila nga ako mao ang Ginoo.
24. “Wala na unyay kasikbit nga mga nasod nga mobiaybiay sa Israel, nga mosakit kanila daw sa hait nga mga tunok. Unya mahibaloan nila nga ako mao ang Ginoong Dios.”
25. Miingon pa gayod ang Ginoong Dios, “Tigomon ko na pagbalik ang katawhan sa Israel gikan sa mga nasod diin sila nagkatibulaag. Pinaagi niining himuon ko kanila, mapakita ko ang akong pagkabalaan ngadto sa mga nasod. Magpuyo na dayon ang mga Israelinhon sa ilang kaugalingong yuta, ang yuta nga gihatag ko sa akong alagad nga si Jacob.
26. Magpuyo sila didto nga malinawon. Magpatindog silag mga balay ug magtanom ug mga ubas. Wala nay magsamok-samok kanila kon silotan ko na ang tanan nilang kasikbit nga mga nasod nga nagabiaybiay kanila. Unya mahibaloan nila nga ako mao ang Ginoo nga ilang Dios.”