1. Samtang nagatan-aw ako, may nakita akong morag trono nga hinimo sa bato nga safiro ug nahimutang sa atop-atop nga kristal ibabaw sa ulo sa mga kerubin.
2. Miingon ang Ginoo sa tawo nga nagbistig linen, “Sulod ngadto sa tunga sa mga ligid sa mga kerubin, ug paghakop didto ug mga baga ug isabwag kini ngadto sa siyudad.” Ug nakita ko nga misulod siya.
3. Nagtindog ang mga kerubin sa habagatang bahin sa templo sa dihang misulod ang tawo, ug may panganod nga milukop sa sulod nga hawanan sa templo.
4. Unya mibiya ang gamhanang presensya sa Ginoo gikan sa mga kerubin ug mibalhin ngadto sa pultahan sa templo. Nalukop sa panganod ang templo, ug midan-ag sa hawanan ang kahayag sa gamhanang presensya sa Ginoo.
5. Ang kasikas sa mga pako sa mga kerubin madungog hangtod sa gawas nga hawanan, sama sa tingog sa Makagagahom nga Dios kon siya mosulti.
6. Sa dihang gimandoan sa Ginoo ang tawo nga nagbistig linen nga mokuhag baga sa tunga sa mga ligid ilalom sa mga kerubin, miadto siya ug mitindog tapad sa usa ka ligid.
7. Unya ang usa sa mga kerubin mikab-ot sa kalayo nga diha sa ilang taliwala ug mikuhag baga ug gibutang kini sa kamot sa tawo nga nagbistig linen. Gidawat kini sa tawo ug migawas.
8. Ilalom sa mga pako sa kerubin may makita nga morag kamot sa tawo.
9. May nakita usab akong upat ka ligid, sa kada kilid sa upat ka kerubin. Nagasidlak kini sama sa mahalong bato nga krisolito,
10. ug managsama kinig hitsura, nga daw sa duha ka ligid nga nagkurus,
11. busa makaadto kini ug ang kerubin sa bisan asa nga direksyon nga dili na kinahanglan pang moliso.
12. Ang tibuok lawas sa mga kerubin, apil na ang ilang likod, kamot, ug pako, nalukop sa mga mata, ug mao usab ang mga ligid.
13. Ug nadungog ko nga gitawag kinig, “nagatuyok nga mga ligid.”
14. Ang matag kerubin may upat ka nawong. Ang nahauna dagway sa kerubin, ang ikaduha dagway sa tawo, ang ikatulo dagway sa liyon, ug ang ikaupat dagway sa agila.
15. Unya mikawan ang mga kerubin. Mao kini sila ang buhing mga binuhat nga akong nakita didto sa Suba sa Kebar.
16. Kon asa gani mopaingon ang mga kerubin, adto usab mopaingon ang mga ligid, ug kon molupad sila, uban usab ang mga ligid.
17. Kon magpundo sila, magpundo usab ang mga ligid. Ug kon mokawan sila, mokawan usab ang mga ligid. Kay ang espiritu sa buhing mga binuhat anaa sa mga ligid.
18. Unya ang gamhanang presensya sa Ginoo mibiya sa pultahan sa templo ug mibalhin ibabaw sa mga kerubin.
19. Ug samtang nagatan-aw ako, milupad ang mga kerubin uban ang mga ligid. Mihunong sila sa sidlakang bahin sa pultahan sa templo sa Ginoo, ug ang gamhanang presensya sa Dios sa Israel anaa ibabaw kanila.
20. Mao kini ang mga buhing binuhat nga akong nakita sa ilalom sa Dios sa Israel didto sa Suba sa Kebar. Ug nasayran ko nga kini diay mga kerubin.
21. Ang matag usa kanila may upat ka nawong ug upat ka pako, ug ilalom sa ilang mga pako may morag kamot sa tawo.
22. Ang ilang hitsura sama sa panagway niadtong mga buhing binuhat nga akong nakita didto sa Suba sa Kebar ug ang matag usa kanila nagalakaw nga diretso.