1. Usa ka higayon, mianhi kanako ang mga tigdumala sa Israel ug nanglingkod sila sa akong atubangan aron sa pagpangayog mensahe gikan sa Ginoo.
2. Miingon ang Ginoo kanako,
3. “Tawo, kining mga tawhana nagmahal pag-ayo sa ilang mga dios-dios nga mao ang nagtukmod kanila sa pagpakasala, busa nganong tugotan ko man sila nga mangayog mensahe gikan kanako?
4. Karon, ingna sila nga ako, ang Ginoong Dios, nag-ingon: Si bisan kinsa nga Israelinhon nga nagmahal pag-ayo sa iyang mga dios-dios nga nagtukmod kaniya sa pagpakasala, unya mangayog mensahe sa Dios gikan sa propeta, ako, ang Ginoo, mao mismo ang motubag kaniya pinaagi sa silot basi sa gidaghanon sa iyang mga dios-dios.
5. Himuon ko kini aron mobalik kanako ang tanang mga Israelinhon nga nahilayo kanako tungod sa ilang mga dios-dios.
6. “Busa karon, ingna ang katawhan sa Israel nga ako, ang Ginoong Dios, nag-ingon, ‘Paghinulsol kamo ug isalikway ang inyong mga dios-dios, ug biyai ang tanan ninyong ngil-ad nga mga buhat.
7. Si bisan kinsa nga Israelinhon o langyaw nga nagapuyo sa Israel, nga mobiya kanako ug magmahal pag-ayo sa iyang mga dios-dios nga mao ang magtukmod kaniya sa pagpakasala, ug unya mangayo ug mensahe kanako pinaagi sa propeta, ako, ang Ginoo, mao mismo ang motubag kaniya pinaagi sa silot.
8. Kontrahon ko siya ug himuon ko siyang usa ka pasidaan ngadto sa mga tawo, ug mahimo siyang hilisgotan. Hinginlan ko siya gikan sa akong katawhan. Unya mahibaloan ninyo nga ako mao ang Ginoo.
9. “ ‘Apan kon ang usa ka propeta nadani sa paghatag ug panagna niana nga tawo, kini tungod kay ako, ang Ginoo, mao ang nagdani kaniya. Silotan ko siya ug hinginlan gikan sa akong katawhan nga mga Israelinhon.
10. Managsamang silotan ang propeta ug ang tawong nangayo kaniyag mensahe.
11. Himuon ko kini aron ang mga Israelinhon dili na mobiya kanako, ug dili na nila hugawan ang ilang kaugalingon pinaagi sa ilang pagpakasala. Mahimo silang akong katawhan, ug ako mahimong ilang Dios. Ako, ang Ginoong Dios, ang nag-ingon niini.’ ”
12. Miingon ang Ginoo kanako,
13. “Tawo, kon makasala kanako ang usa ka nasod pinaagi sa pagluib kanako, silotan ko kini, ug kuhaon ko ang tinubdan sa ilang pagkaon. Padad-an ko silag kagutom aron mangamatay sila ug ang ilang mga mananap.
14. Bisan pag anaa uban kanila si Noe, si Daniel, ug si Job, sila lang ang maluwas tungod sa ilang pagkamatarong. Ako, ang Ginoong Dios, ang nag-ingon niini.
15. “O kaha padad-an kog mabangis nga mga mananap kana nga nasod aron sa pagpatay sa iyang mga lumulupyo, ug mahimong awaaw kini nga dapit ug wala nay mag-agian niini tungod sa kahadlok sa mabangis nga mga mananap.
16. Bisan pag anaa uban kanila si Noe, si Daniel, ug si Job, ako, ang Ginoong Dios nga buhi, nanumpa nga dili gayod niining tulo maluwas ang ilang mga anak kondili ang ila rang kaugalingon. Ug ang maong nasod mahimong awaaw.
17. “O kaha padad-an kog gira kana nga nasod aron sa pagpatay sa mga lumulupyo niini ug sa ilang mga mananap,
18. bisan pag anaa uban kanila si Noe, si Daniel, ug si Job, ako, ang Ginoong Dios nga buhi, nanumpa nga dili gayod niining tulo maluwas ang ilang mga anak kondili ang ila rang kaugalingon.
19. “O kaha padad-an kog sakit kana nga nasod aron mangamatay ang mga lumulupyo niini ug ang ilang mga mananap,
20. bisan pag anaa uban kanila si Noe, si Daniel, ug si Job, ako, ang Ginoong Dios nga buhi, nanumpa nga dili gayod niining tulo maluwas ang ilang mga anak kondili ang ila rang kaugalingon tungod sa ilang pagkamatarong.
21. “Sa pagkatinuod, ako, ang Ginoong Dios, nag-ingon nga alaot ang Jerusalem kon padad-an ko kini sa upat ka bug-at nga mga silot — gira, kagutom, mabangis nga mga mananap, ug mga balatian — nga mopatay sa mga lumulupyo niini ug sa ilang mga mananap.
22. Apan may mahibiling buhi kanila, ug pagadad-on sila dinhi sa Babilonia ug iipon kaninyo ingon nga mga bihag. Makita ninyo kon unsa kadaotan ang ilang gawi ug ang ilang mga binuhatan, ug mawala ang kalain sa inyong buot sa akong pagsilot sa Jerusalem.
23. Mawala ang kalain sa inyong buot kon makita ninyo ang ilang gawi ug ang ilang mga binuhatan, ug masabtan ninyo nga may hinungdan nganong gihimo ko kadto sa Jerusalem. Ako, ang Ginoong Dios, ang nag-ingon niini.”