1. Miingon ang Ginoo kanako,
2. “Tawo, pag-awit ug usa ka awit sa pagbangotan alang sa Tyre,
3. ang lungsod nga dunggoanan sa mga barko ug sentro sa negosyo sa mga nagapuyo sa mga isla. Ingna siya nga ako, ang Ginoong Dios, nag-ingon, ‘Tyre, nagapasigarbo ka nga hingpit ang imong katahom.
4. Gipalapad mo ang imong teritoryo sa kadagatan. Gipatahom ka pag-ayo sa mga nagtukod kanimo.
5. Nahisama ka sa usa ka barko nga hinimo sa mga kahoyng sipres nga gikan sa Senir. Ang imong palo hinimo gikan sa kahoyng sedro nga gikan sa Lebanon.
6. Ang imong mga bugsay hinimo gikan sa mga kahoyng terebinto nga gikan sa Bashan. Ug ang imong salog hinimo sa mga kahoy nga gikan sa mga isla sa Kitim, ug gihaklapan kini sa materyales nga gikan sa bangkil sa elepante.
7. Ang imong layag binordahan nga linen nga gikan sa Ehipto, ug daw sa bandera kining tan-awon. Ang imong trapal kolor asul ug ube nga gikan sa mga isla sa Elisha.
8. Taga-Sidon ug taga-Arvad ang imong mga tigbugsay, ug ang imong hanas nga mga tripulante ang imo ra mismong mga lumulupyo.
9. Ang mga eksperyensyadong panday gikan sa Gebal ang tig-ayo sa imong mga guba. Moanha kanimo ang mga tripulante sa mga barko ug makignegosyo kanimo.
10. Ang imong mga sundalo mga taga-Persia, Lydia, ug Put. Gisab-it nila ang ilang mga taming ug mga helmet diha sa imong dingding, ug nakahatag kini kanimog kadungganan.
11. Mga taga-Arvad ug taga-Helec ang nagabantay palibot sa imong mga paril, ug ang mga taga-Gammad ang nagabantay sa imong mga tore. Gisab-it nila ang ilang mga taming palibot sa imong dingding, ug nakapahingpit kini sa imong kadungganan.
12. “ ‘Nakignegosyo ang mga taga-Tarshish kanimo kay daghan kag bahandi. Gibayloan nila ang imong mga baligya ug plata, puthaw, lata, ug tingga.
13. Nakignegosyo usab kanimo ang taga-Grecia, Tubal, ug Meshec. Gibayloan nila ang imong mga baligya ug mga ulipon ug mga kagamitan nga hinimo sa bronsi.
14. Ang gibaylo usab sa mga taga-Bet Togarma sa imong mga baligya mga kabayo nga pangtrabaho, mga kabayo nga panggira, ug mga mula.
15. “ ‘Nakignegosyo usab kanimo ang mga taga-Dedan, ug daghan kag mga suki sa mga isla. Ang ilang gibayad kanimo mga bangkil sa elepante ug kahoyng ebony.
16. “ ‘Nakignegosyo usab kanimo ang mga taga-Aram tungod sa imong daghang mga produkto. Ang ilang gibaylo sa imong mga baligya mga emerald, mga panapton nga kolor ube, mga binordahang panapton, mahalon nga linen, koral, ug mga rubi.
17. “ ‘Nakignegosyo usab kanimo ang mga taga-Juda ug Israel. Gibayloan nila ang imong mga baligya ug mga igos, dugos, lana, haplas, ug trigo nga gikan sa Minit.
18. “ ‘Nakignegosyo usab kanimo ang mga taga-Damascus tungod sa kadaghan sa imong mga bahandi ug mga produkto. Ang ilang gibaylo sa imong baligya mga bino nga gikan sa Helbon ug delana nga gikan sa Zahar.
19. Ang mga taga-Dan ug taga-Javan nga gikan sa Uzal nakignegosyo usab kanimo. Gibayloan nila ang imong mga baligya ug mga puthaw ug mga panakot nga cassia ug calamus.
20. “ ‘Ang gibaylo sa mga taga-Dedan sa imong mga baligya mga panapton nga panghapin sa buko-buko sa mananap aron lingkoran.
21. “ ‘Nakignegosyo usab kanimo ang mga taga-Arabia ug ang tanang pangulo sa Kedar. Ang ilang gibaylo sa imong mga baligya mga karnero ug mga kanding.
22. “ ‘Nakignegosyo usab kanimo ang mga negosyante sa Sheba ug Raama. Ang ilang gibaylo sa imong mga baligya mao ang tanang klase sa maayong mga panakot, mahalong mga bato, ug bulawan.
23. “ ‘Nakignegosyo usab kanimo ang mga taga-Haran, Cane, Eden, ug ang mga negosyante sa Sheba, Ashur, ug Kilmad.
24. Ang ilang gibaylo sa imong mga baligya mga mahalong bisti, mga panapton nga kolor asul, mga binordahang panapton, ug lain-laing kolor sa carpet nga giparibitihan ug maayo ang pagkatahi.
25. “ ‘Ang mga barko sa Tarshish mao ang tigkarga sa imong mga baligya. Nahisama ka sa usa ka barko nga puno sa mga kargamento samtang nagalawig sa kadagatan.
26. Apan dad-on ka sa imong mga tigbugsay ngadto sa lawod, ug bungkagon ka sa makusog nga hangin nga gikan sa sidlakan.
27. Ang tanang anaa kanimo mangalunod: ang imong bahandi, mga baligya, mga tripulante, mga marinero, mga panday, mga negosyante, ug ang tanan mong mga sundalo. Mangalunod kining tanan sa lawod sa adlaw nga mabungkag ka.
28. “ ‘Mangurog sa kalisang ang mga nagapuyo duol sa dagat inigkadungog nila sa singgit sa mga tripulante nga nagakalunod.
29. Biyaan sa mga tigbugsay ang ilang mga sakayan ug manindog sila sa baybayon uban sa mga marinero ug mga tripulante,
30. ug magminatay silag hilak tungod sa nahitabo kanimo. Sabwagan nilag abog ang ilang mga ulo ug moligid sila sa abo sa pagpakita sa ilang pagsubo.
31. Kiskisan nila ang ilang mga ulo ug magbistig sako samtang magdangoyngoy sila sa kasubo.
32. Sa ilang pagsubo magaawit sila niini nga awit sa pagbangotan: O Tyre, walay nalunod sa lawod sama sa imong pagkalunod!
33. Naglawig ka dala ang imong mga baligya, ug nakatabang kini sa panginahanglan sa daghang mga nasod. Nangadato ang mga hari sa kalibotan tungod sa imong bahandi ug mga baligya.
34. Apan karon nabungkag ka na ug uban kanimo nga nalunod ilalom sa dagat ang imong mga baligya ug ang tanan mong mga tripulante.
35. Ang tanang nagapuyo sa mga isla nalisang gayod sa imong gidangatan. Ang ilang mga hari nangalisang, ug makita gayod kini sa ilang mga panagway.
36. Nagpanglingo ang mga negosyante sa kanasoran sa imong gidangatan. Makalilisang ang imong kataposan, ug mahanaw ka na sa hingpit.’ ”