1. Miingon ang Ginoo kanako,
2. “Tawo, ako, ang Ginoong Dios, nag-ingon ngadto sa nasod sa Israel, ‘Mao na kini ang kataposan sa tibuok yuta sa Israel.
3. Kataposan na ninyo, kay ipahiagom ko na ang akong kasuko. Hukman ko kamo sumala sa inyong mga paggawi. Silotan ko kamo sa inyong mangil-ad nga mga buhat.
4. Dili ko gayod kamo kaloy-an. Silotan ko gayod kamo sa inyong mga paggawi ug sa inyong mangil-ad nga mga buhat, aron mahibaloan ninyo nga ako mao ang Ginoo.’
5. “Ako, ang Ginoong Dios, nag-ingon: Moabot ang sunod-sunod nga kalaglagan.
6. Mao na kini ang kataposan! Matapos na gayod kamo,
7. kamong nagapuyo sa yuta sa Israel. Mao na kini ang adlaw sa inyong kalaglagan. Hapit na gayod ang panahon nga magkaguliyang kamo. Human na ang inyong malipayong mga adlaw sa kabukiran.
8. Sa dili madugay ipatagamtam ko na kaninyo ang labihan kong kasuko. Hukman ko kamo sumala sa inyong mga paggawi. Silotan ko kamo sa inyong mangil-ad nga mga buhat.
9. Dili ko gayod kamo kaloy-an. Silotan ko kamo sumala sa inyong binuhatan ug sa inyong ngil-ad nga mga buhat. Unya mahibaloan ninyo nga ako, ang Ginoo, mao ang nagsilot kaninyo.
10. “Duol na gayod ang adlaw sa kalaglagan! Labihan na gayod ang pagkadaotan ug ang pagpasigarbo sa mga tawo.
11. Ang ilang kabangis mosumbalik kanila ingon nga silot sa ilang pagkadaotan. Walay mahibilin kanila. Ang tanan nilang bahandi mawala.
12. Oo, miabot na gayod ang panahon sa pagsilot. Dili na angay nga malipay ang mga mamalitay, ug dili na usab angay nga magsubo ang mga nagapamaligya, kay ang akong kasuko matagamtaman sa tanan.
13. Kon may mga negosyante pa nga mabilin, dili na sila makabalik pa sa ilang mga negosyo. Kay ang akong giingon mahitungod sa mahitabo sa tibuok katawhan sa Israel mahitabo gayod. Si bisan kinsa nga naghimog daotan dili makaluwas sa iyang kinabuhi.
14. Bisag patingogon pa nila ang trumpeta aron mangandam ang tanan sa pagpakiggira, walay mouban sa pagpakiggira kay mahiagom ang tanan sa akong kasuko.
15. “Ang mga tawo nga anaa sa gawas sa siyudad mamatay sa gira. Ang magpabilin sa sulod sa siyudad mamatay sa sakit ug kagutom.
16. Ug kon may makalingkawas sa kamatayon ug makaikyas ngadto sa kabukiran, mag-agulo sila sama sa salampati, tungod sa ilang mga sala.
17. Mamuypoy ang ilang mga kamot ug ang ilang mga tuhod.
18. Magbisti silag sako ug kagisan nila ang ilang mga ulo sa pagpakita sa ilang pagsubo. Ug mohari kanila ang kahadlok ug kaulaw.
19. Ipanglabay nila ang ilang mga pilak ug mga bulawan diha sa kadalanan nga daw sama kini sa mahugaw nga butang. Dili kini makaluwas kanila sa adlaw nga ipahamtang ko ang akong kasuko. Dili kini makabusog kanila kay mao kini ang hinungdan nga nagpakasala sila.
20. Gipasigarbo nila ang ilang matahom nga mga alahas, ug gigamit nila kini sa paghimo sa mangil-ad nila nga mga dios-dios. Busa himuon ko ang ilang mga bahandi nga sama sa mahugaw nga mga butang alang kanila.
21. Ipailog ko kini sa daotang mga tawo nga mga langyaw, ug ila kining pasipad-an.
22. Pasagdan ko kining mga tawhana sa ilang pagpasipala ug pag-ilog sa akong bililhon nga dapit.
23. “Bihagon ang akong katawhan kay napuno sa pagpinatyanay ug kasamok ang ilang nasod.
24. Ipailog ko ang ilang mga balay sa labihan kadaotan nga mga tawo nga gikan sa ubang mga nasod. Tapuson ko ang ilang pagpasigarbo sa ilang gamhanang mga tawo, ug pasagdan ko nga pasipad-an ang ilang mga simbahan.
25. Kon moabot kanila ang kalisang, mangita sila sa kalinaw. Apan dili nila kini hikaplagan.
26. Moabot kanila ang sunod-sunod nga mga katalagman ug mga daotang balita. Mangayo silag mga mensahe gikan sa mga propeta apan wala silay madawat. Dili na itudlo sa mga pari ang bahin sa Kasugoan ug wala na usay mga tambag gikan sa mga tigdumala.
27. Magsubo ang hari ug mawad-an siyag paglaom, ug magkurog ang mga tawo sa kahadlok. Silotan ko sila sumala sa ilang paggawi. Hukman ko sila sumala sa ilang paghukom sa uban. Unya mahibaloan nila nga ako mao ang Ginoo.”