1. Miingon ang Ginoo kanako, “Tawo, pagkuhag tisa ug ibutang kini sa imong atubangan, ug ikulit diha niini ang siyudad sa Jerusalem.
2. Unya ilarawan nga morag gisulong kini sa mga kaaway. Butangi kinig tinapok nga yuta nga masak-an paingon sa paril. Paliboti kinig mga kampo ug mga troso nga pangguba sa paril.
3. Unya pagkuhag lapad nga puthaw ug ibutang kini ingon nga paril sa taliwala nimo ug sa siyudad. Moatubang ka sa siyudad nga daw sa ginasulong mo kini. Usa kini ka timailhan alang sa katawhan sa Israel nga sulongon sila sa ilang mga kaaway.
4. “Human niini, mohigda ka nga magtakilid sa wala, sa pagpakita nga ginapas-an nimo ang sala sa katawhan sa Israel. Pas-anon mo ang ilang sala sumala sa gidaghanon sa mga adlaw sa imong paghigda.
5. Ang usa ka adlaw nagarepresentar ug usa ka tuig. Busa sulod sa 390 ka adlaw pas-anon mo ang ilang mga sala.
6. Pagkahuman, motakilid ka sa tuo ug pas-ana na usab ang sala sa katawhan sa Juda sulod sa 40 ka adlaw; ang usa ka adlaw nagarepresentar gihapon sa usa ka tuig.
7. Tan-awa pag-usab ang larawan sa Jerusalem nga gisulong, ug panghimaraota kini nga walay tabon ang imong bukton.
8. Gapuson ko ikaw ug pisi aron dili ka makaliso-liso hangtod nga mahuman mo ang paglarawan sa pagsulong sa siyudad.
9. “Karon, pagkuhag trigo, barley, mga liso nga utanon, balatong, dawa, ug espelta. Sagola kining tanan sa usa ka sudlanan ug himoang pan. Mao kini ang imong kan-on sulod sa 390 ka adlaw nga nagahigda ka nga nagatakilid sa wala.
10. Mga 240 ka gramo lang sa pagkaon ang imong kan-on matag adlaw sa gitakda nga mga oras.
11. Ug mga tunga sa litro nga tubig ang imong imnon matag adlaw sa gitakda usab nga mga oras.
12. Lutoa ang pan matag adlaw samtang nagatan-aw ang mga tawo. Lutoa kini sama sa pagluto sa pan nga barley. Gamita nga sugnod ang uga nga tae sa tawo. Ug unya kaona ang pan.
13. Kay sama usab niini ang mahitabo sa katawhan sa Israel, magakaon sila sa mga pagkaon nga giisip nga hugaw didto unya sa mga dapit diin ipabihag ko sila.”
14. Apan miingon ako, “O Ginoong Dios, wala ko gayod hugawi ang akong kaugalingon sukad sa bata pa ako hangtod karon. Wala gayod ako sukad makakaon ug mananap nga namatay lang sa iyang kaugalingon o gipatay sa ubang mananap. Wala usab ako sukad makakaon ug mananap nga giisip nga hugaw.”
15. Mitubag ang Ginoo, “Sige, tae na lang sa baka ang gamiton mong sugnod puli sa tae sa tawo.”
16. Miingon pa gayod ang Ginoo, “Tawo, kulangan ko ang pagkaon sa Jerusalem. Sukdon sa mga lumulupyo sa Jerusalem ang ilang pagkaon ug tubig nga imnon. Mokaon sila ug moinom nga may kabalaka ug kahadlok
17. tungod sa kakulang sa pagkaon ug tubig. Magtinan-away sila sa usag usa nga may kalisang. Ug hinay-hinay silang mangamatay tungod sa ilang sala.”