1-3. Ako si Ezekiel nga usa ka pari, anak ni Buzi, ug usa ako sa mga gibihag ngadto sa Babilonia. Usa ka adlaw, sa dihang didto ako sa daplin sa Suba sa Kebar kauban sa ubang mga binihag, nakita kong naabli ang langit ug gigamhan ako sa Ginoo, ug may gipakita siya kanakong mga panan-awon. Nahitabo kini sa ikalimang adlaw sa ikaupat nga bulan sa ika-30 nga tuig. Kini ang ikalimang tuig sa pagkabihag ni Haring Jehoyakin.
4. Samtang nagtan-aw ako, nakita ko ang usa ka bagyo gikan sa amihan. Nagpangilat gikan sa mabagang dag-om ug mihayag ang palibot niini. Ang kilat sa tunga sa dag-om nagasiga nga daw sa naggilak-gilak nga metal.
5. Ug sa tunga sa dag-om adunay upat ka buhing binuhat nga morag tawo,
6-8. apan ang matag usa kanila may upat ka nawong ug upat ka pako. Tul-id ang ilang mga paa, ug ang ilang mga tiil sama sa tiil sa baka ug naggilak-gilak sama sa gipasinaw nga bronsi. Adunay kamot sa tawo ilalom sa ilang tagsa-tagsa ka mga pako,
9. ug ang ilang mga pako nag-abot. Dungan silang manglupad bisan asa paingon nga walay lingi-lingi.
10. Ingon niini ang ilang mga dagway: sa atubangan, dagway ug tawo; sa tuo, dagway ug liyon; sa wala, dagway ug torong baka; ug sa likod, dagway ug agila.
11. Ang ilang duha ka mga pako nakabukhad ug nag-abot sa pako sa ilang tapad, ug ang laing duha pa nila ka pako nagatabon sa ilang mga lawas.
12. Dungan silang manglupad bisan asa paingon nga walay lingi-lingi. Ug kon asa sila dad-a sa espiritu didto usab sila mopaingon.
13. Daw sa nagkalayo nga baga sila kon tan-awon. May naglabay-labay sa ilang tunga nga daw sa nagsiga nga sulo nga labihan kasulaw. Ug gikan sa sulo may mokilab nga kilat.
14. Kining mga buhing binuhat nagngadto-nganhi nga daw kilat.
15. Samtang nagatan-aw ako sa upat ka buhing mga binuhat, may nakita akong ligid diha sa tapad sa matag-usa niining upat ka buhing mga binuhat. Kini nga mga ligid nagdapat sa yuta.
16. Ingon niini ang hitsura sa mga ligid: Naggilak-gilak kini sama sa mahalong bato nga krisolito, ug managsama kini ug hitsura nga daw duha ka ligid nga nagkurus,
17. busa makaadto kini ug ang buhing mga binuhat sa bisan asa nga direksyon nga dili na kinahanglan pang moliso.
18. Ang yantas niini habog ug makahahadlok kay nalukop kini ug mga mata.
19. Kon asa mopaingon ang buhing mga binuhat, kuyog usab ang mga ligid. Ug kon mokawan ang mga binuhat, mokawan usab ang mga ligid.
20. Ang espiritu sa buhing mga binuhat anaa sa mga ligid. Busa kon asa moadto ang espiritu, didto usab moadto ang buhing mga binuhat ug ang mga ligid.
21. Kon asa mopaingon ang buhing mga binuhat, uban usab kanila ang mga ligid. Ug kon magpundo sila, magpundo usab ang mga ligid. Ug kon mokawan sila, mokawan usab ang mga ligid, kay ang ilang espiritu anaa sa mga ligid.
22. Sa ibabaw sa ulo sa buhing mga binuhat may atop-atop nga daw kristal nga naggilak-gilak, ug kahibulongan kining tan-awon.
23. Sa ilalom niini nagabukhad ang duha ka pako sa matag buhing mga binuhat, ug nag-abot ang ilang mga pako sa ilang tapad. Ang laing duha nila ka pako nagatabon sa ilang mga lawas.
24. Kon molupad sila, madungog ko ang kasikas sa ilang mga pako nga sama sa haganas sa tubig, o daw sama sa tingog sa Makagagahom nga Dios, o daw sama sa kasaba sa daghang mga sundalo. Ug kon magpundo sila, tik-opon nila ang ilang mga pako.
25. Samtang nagtik-op ang ilang mga pako, may tingog gikan sa ibabaw niadtong atop-atop sa ilang ulohan.
26. Ug didto may morag trono nga hinimo gikan sa batong safiro, ug may naglingkod niini nga sama sa tawo.
27. Nakita ko nga gikan sa iyang hawak pataas, daw sama siya sa naggilak-gilak nga metal nga daw nagkalayo. Ug gikan sa iyang hawak paubos, daw sama siya sa nagadilaab nga kalayo, ug gilibotan siya sa kahayag nga labihan kasulaw.
28. Ang kahayag sa iyang palibot nahisama sa bangaw human sa ulan.Ingon niadto ang gahom sa Ginoo. Pagkakita ko niadto mihapa ako, ug may nadungog akong tingog nga nakigsulti kanako.