1. Miingon ang Ginoo kanako,
2. “Tawo, isugilon kining akong mensahe ngadto sa mga taga-Ehipto. Ingna sila nga ako, ang Ginoong Dios, nag-ingon: Pagminatay kamog hilak tungod sa umaabot ninyo nga kalaglagan.
3. Kay hapit na moabot kanang adlawa, ang adlaw nga maghukom ang Ginoo. Puno sa dag-om ug mangiob kanang adlawa alang sa mga nasod.
4. Pagasulongon ang Ehipto, ug magaantos ang Etiopia. Daghan ang mamatay sa Ehipto, ug panguhaon ang mga bahandi niini, ug gun-obon kini.
5. Niini nga panag-away, mangamatay ang mga taga-Etiopia, Put, Lydia, Arabia, Libya, ug ang uban pang mga nasod nga kaabin sa Ehipto.
6. Ako, ang Ginoong Dios, nag-ingon nga malaglag gayod ang mga kaabin sa Ehipto, ug mawala ang gipasigarbo niyang gahom. Mangamatay ang iyang mga lumulupyo gikan sa Migdol paingon sa Aswan.
7. Mahimong labing awaaw ang Ehipto sa tanang nasod, ug ang iyang mga lungsod mahimong pinakaguba sa tanang mga lungsod.
8. Kon sunogon ko na ang Ehipto ug mangamatay na ang tanang nagadapig kaniya, mahibaloan sa iyang mga lumulupyo nga ako mao ang Ginoo.
9. “ ‘Nianang panahona, magpadala akog mga mensahero nga magsakay ug mga barko nga magpalisang sa mga taga-Etiopia nga nagpahayahay lang. Malisang gayod sila sa higayon nga laglagon ang Ehipto kay sigurado gayod nga moabot kining higayona.’ ”
10. Nag-ingon pa gayod ang Ginoong Dios, “Gamiton ko si Nebucadnezar nga hari sa Babilonia sa pagpamatay sa daghang katawhan sa Ehipto.
11. Siya ug ang iyang mga sundalo, nga mga bangis sa tanang nasod, ipadala ko sa Ehipto sa paglaglag niini. Sulongon nila kini, ug magkatag ang mga patayng lawas bisan asa.
12. Pamalahon ko ang Suba sa Nilo, ug itugyan ko ang Ehipto sa kamot sa daotang mga tawo. Laglagon ko ang tibuok nga nasod sa Ehipto ug ang tanang anaa niini pinaagi sa mga langyaw. Ako, ang Ginoo, ang nag-ingon niini.”
13. Miingon pa gayod ang Ginoong Dios, “Laglagon ko usab ang mga imahen sa mga dios-dios sa Memfis. Wala nay mangulo sa Ehipto, ug pahadlokon ko ang tanang mga lumulupyo niini.
14. Himuon kong awaaw ang Patros, sunogon ko ang Zoan, ug silotan ko ang Tebes.
15. Ipatagamtam ko ang akong kasuko sa Pelusium, ang lig-ong siyudad sa Ehipto. Ug pamatyon ko ang daghang katawhan sa Tebes.
16. Sunogon ko ang Ehipto! Mag-agulo sa kasakit ang Pelusium. Malaglag ang Tebes, ug kanunayng mahadlok ang Memfis.
17. Mangamatay sa gira ang batan-ong mga lalaki sa Heliopolis ug sa Bubastis, ug ang mahibiling mga tawo niining mga lungsod pagabihagon.
18. Kon laglagon ko na ang gahom sa Ehipto, mahimong ngitngit kanang adlawa alang sa Tapanhes. Mawala na ang gipasigarbo nga gahom sa Ehipto. Matabonan siya sa dag-om, ug ang mga lumulupyo sa iyang mga lungsod bihagon.
19. Ingon niana ang akong pagsilot sa Ehipto, ug unya mahibaloan nila nga ako mao ang Ginoo.”
20. Unya sa ikapito nga adlaw sa unang bulan, sa ika-11 nga tuig sa among pagkabihag, miingon ang Ginoo kanako,
21. “Tawo, gibalì ko ang bukton sa Faraon nga hari sa Ehipto. Wala gayoy mibugkos niini aron unta mamaayo ug molig-on pagbalik aron makakupot ug espada.
22. Busa ingna siya nga ako, ang Ginoong Dios, nag-ingon nga kontra ko siya. Balion ko ang duha niya ka bukton, ang maayo ug ang bali nang daan, aron mabuhian niya ang iyang espada.
23. Patibulaagon ko ang mga Ehiptohanon ngadto sa nagkalain-laing mga nasod.
24. Lig-onon ko ang mga bukton sa hari sa Babilonia ug pakuptan ko kaniya ang akong espada. Apan balion ko ang mga bukton sa Faraon, ug magaagulo siya nga samaran ug himalatyon atubangan sa hari sa Babilonia.
25. Lig-onon ko gayod ang mga bukton sa hari sa Babilonia, apan ang mga bukton sa Faraon mahimong inutil. Kon pakuptan ko na ang akong espada sa hari sa Babilonia ug iya kining gamiton batok sa Ehipto, mahibaloan unya sa mga Ehiptohanon nga ako mao ang Ginoo.
26. Patibulaagon ko ang mga Ehiptohanon ngadto sa nagkalain-laing mga nasod, unya mahibaloan nila nga ako mao ang Ginoo.”