1. Toe het ek gekyk en let op, in die ruimte wat bo-oor die koppe van die gérubs was, het iets soos ’n saffiersteen in ’n vorm wat lyk soos ’n troon, bo hulle verskyn.
2. Hy het met die man wat in linne aangetrek was gepraat en gesê: “Gaan in tussen die draaiende wiele onder die gérub in en maak jou hande vol met kole van vuur vanaf tussen die gérubs en strooi dit oor die stad.” Hy het voor my oë ingegaan.
3. Die gérubs het aan die regterkant van die tempel gestaan toe die man ingegaan het en die wolk het die binnehof gevul.
4. Toe het die Gemanifesteerde Teenwoordigheid van יהוה vanaf die gérub af opgestyg na die drumpel van die tempel en die tempel is gevul met die wolk en die hof was vol van die helderheid van die Gemanifesteerde Teenwoordigheid van יהוה.
5. Verder is die geluid van die gérubs se vlerke gehoor tot in die buitenste hof, soos die stem van God, die Almagtige, as Hy praat.
6. Dit het gebeur toe Hy die man wat in linne aangetrek is beveel en gesê het: “Vat vuur van tussen die draaiende wiele, van tussen die gérubs uit,” hy ingegaan en langs ’n wiel gaan staan het.
7. Toe steek ’n gérub sy hand uit van tussen die gérubs, af na die vuur wat tussen die gérubs was, vat daarvan en gee dit in die hande van die man wat in linne aangetrek is; wat dit gevat en uitgegaan het.
8. Dit het gelyk of die gérubs die vorm van ’n mens se hand onder hulle vlerke het.
9. Toe het ek gekyk en let op, vier wiele langs die gérubs; een wiel langs elke gérub en die voorkoms van die wiele was soos die kleur van topaas (beril).
10. Wat hulle voorkoms betref, al vier het dieselfde voorkoms gehad, asof een wiel binne-in ’n ander wiel was.
11. Wanneer hulle beweeg, het hulle in enige van hulle vier rigtings beweeg sonder om te draai as hulle beweeg, maar hulle het gevolg in die rigting waarheen hulle kyk, sonder om te draai as hulle beweeg.
12. Hulle hele liggaam, hulle rûe, hulle hande, hulle vlerke en die wiele was vol oë reg rondom, die wiele het aan al vier van hulle behoort.
13. Die wiele is voor my ore “draaiende wiele” genoem.
14. Elkeen het vier gesigte gehad: die eerste gesig was die gesig van ’n gérub, die tweede gesig die gesig van ’n mens, die derde die gesig van ’n leeu en die vierde die gesig van ’n arend.
15. Toe het die gérubs opgestyg. Hulle is die lewende wesens wat ek by die K’varrivier gesien het.
16. Wanneer die gérubs beweeg, sal die wiele langs hulle beweeg en wanneer die gérubs hulle vlerke oplig om van die grond af op te styg, het die wiele nie weggedraai van langs hulle nie.
17. Wanneer die gérubs stilstaan, staan die wiele stil en wanneer hulle opstyg, sal die wiele saam met hulle opstyg, want die gees van die lewende wesens was in hulle.
18. Toe het die Gemanifesteerde Teenwoordigheid van יהוה vanaf die drumpel van die tempel vertrek en oor die gérubs gaan staan.
19. Toe die gérubs weggegaan het, het hulle hul vlerke opgelig en voor my oë van die grond af opgestyg met die wiele langs hulle en hulle het gaan stilstaan by die ingang van die oostelike poort van die huis van יהוה en die Gemanifesteerde Teenwoordigheid van die God van Yisra’el het oor hulle gehang.
20. Dit is die lewende wesens wat ek onder die God van Yisra’el gesien het by die K’varrivier; ek het dus geweet dat hulle gérubs was.
21. Elkeen het vier gesigte en elkeen het vier vlerke gehad en onder hulle vlerke was die vorm van mensehande.
22. Wat die vorm van hulle gesigte betref, dit was dieselfde gesigte wie se voorkoms ek by die K’varrivier gesien het; elkeen het reguit vorentoe gegaan.