1. ‘Ona maliu a‘e lea o Iesu i le va‘a, ‘ua maliu atu i le tasi itū, ‘ona o‘o lea i lana lava ‘a‘ai.
2. Fa‘auta fo‘i, ‘ua latou ‘aumai ‘iā te ia le tagata supa, ‘ua ta‘oto i le moega; ‘ua silafia fo‘i e Iesu lo latou fa‘atuatua, ‘ona fetalai atu ai lea o ia i le supa, “Lo‘u atali‘i e, ‘inā fa‘alototele ia oe, ‘ua fa‘amāgaloina au agasala.”
3. Fa‘auta fo‘i, ‘ua fa‘apea ifo nisi o le ‘au tusi‘upu i o latou loto, “‘Ua fāifai lenei tagata i le Atua.”
4. ‘Ua silafia e Iesu o latou manatu, ‘ona fa‘apea atu lea o ia, “Se a le mea ‘ua mānatunatu leaga ai o ‘outou loto?
5. Auā po o le fea e faigofie? po o le fai atu, ‘‘Ua fa‘amāgaloina au agasala;’ po o le fai atu, ‘Tula‘i ia, ‘inā savali?’
6. ‘Ae peita‘i ‘ina ‘ia iloa e ‘outou o i ai i le Atali‘i o le tagata i le lalolagi le pule e fa‘amāgalo ai agasala.” ‘Ona fetalai atu ai lea o ia i le supa, “‘Inā tula‘i ia, ‘inā ‘ave lou moega ma alu i lou fale.”
7. ‘Ona tula‘i ai lea o ia, ‘ua alu i lona fale.
8. ‘Ua iloa e le motu o tagata, ‘ona taufaiofo ai lea; ‘ua latou vivi‘i atu i le Atua lē ‘ua foa‘iina mai le pule fa‘apenā i tagata.
9. ‘Ua maliu ‘ese Iesu i lea mea, ‘ona silafia ai lea e ia o le tagata ‘ua nofo i le fale e tali ai lafoga o Mataio lona igoa; ‘ua fa‘apea atu ‘iā te ia, “‘Inā mulimuli mai ia ‘iā te a‘u.”‘Ona tula‘i ai lea o ia, ‘ua mulimuli atu ‘iā Iesu.
10. ‘Ua ta‘oto o ia i le fale e taumafa, fa‘auta fo‘i, o tagata ao lafoga e to‘atele ma ē ‘ua agasala ‘ua ō mai ai, ‘ua latou ta‘o‘oto e ‘a‘ai fa‘atasi ma Iesu ma ona so‘o.
11. ‘Ua iloa e le ‘au faresaio, ‘ona latou fai atu ai lea i ona so‘o, “Se a le mea ‘ua ‘a‘ai fa‘atasi ai la ‘outou a‘oa‘o ma ē ao lafoga ma ē ‘ua agasala?”
12. A ‘ua lagona e Iesu, ‘ona fetalai atu ai lea o ia ‘iā te i latou, “E lē aogā le foma‘i i ē mālōlō, na o ē mama‘i.
13. ‘Inā ō ia, ‘inā a‘oa‘o po o le a le uiga o lea ‘upu, ‘‘Ou te loto i le alofa, ‘ae lē o le taulaga.’ Auā ‘ou te le‘i sau e vala‘au i ē ‘ua amiotonu, a o ē ‘ua agasala ‘ina ‘ia latou salamō.”
14. ‘Ona ō mai ai lea o so‘o o Ioane ‘iā Iesu, ‘ua fa‘apea mai, “Se a le mea ‘ua anapopogi so‘o ai i matou ma le ‘au faresaio, a o ou so‘o, e lē anapopogi i latou?”
15. ‘Ona fetalai atu ai lea o Iesu ‘iā te i latou, “E mafai ‘ea ‘ona fa‘anoanoa o aumea a le fa‘ato‘āfaiavā i ona aso o ‘iā te i latou le fa‘ato‘āfaiavā? ‘Ae o‘o mai ona aso e ‘ave‘eseina ai ‘iā te i latou le fa‘ato‘āfaiavā, ‘ona latou anapopogi ai lea.
16. E leai se tasi nā te fonoa le matuā ‘ofu i le ‘ie fou; auā e māsae le ‘ofu i lona fono, ‘ona atili ai lea ‘ona māsae.
17. E lē utufia fo‘i le uaina fou i fagu pa‘u tuai; a fa‘apea, ‘ona pāpā ai lea o fagu pa‘u, ‘ona masa‘a lea o le uaina, e māumau fo‘i fagu pa‘u; ‘ae utufia le uaina fou i fagu pa‘u fou, ‘ona fa‘atau saogalemū ai lea.”
18. ‘Ua fetalai atu o Iesu i ia ‘upu ‘iā te i latou, fa‘auta, ‘ua sau le ali‘i, ‘ua ifo mai ‘iā te ia, ‘ua fa‘apea mai, “‘Ua oti nei lava lo‘u afafine; a ‘ia e maliu atu, ma fa‘ae‘e lou ‘a‘ao i luga ‘iā te ia, ‘ona ola ai lea o ia.”
19. ‘Ona tula‘i ai lea o Iesu, ‘ua mulimuli atu ‘iā te ia, o ia ma ona so‘o.
20. Fa‘auta fo‘i, o le fafine na i ai le puna toto i tausaga e sefulu ma le lua, ‘ua alu ane o ia i ona tua, ‘ua ia pa‘i ane i le tu‘upao o lona ‘ofu;
21. auā ‘ua fai ifo o ia i lona loto, “‘Āfai ‘ou te pa‘i atu tau o lona ‘ofu, ‘ou te ola ai.”
22. A ‘ua fāliu Iesu, ‘ua silafia o ia, ‘ona fa‘apea atu ai lea o ia, “Lo‘u afafine e, ‘inā fa‘alototele ia oe, o lou fa‘atuatua ‘ua e mālōlō ai.” ‘Ona mālōlō ai lea o le fafine talu lea lava itū aso.
23. ‘Ua ulufale atu Iesu i le fale o le ali‘i, ‘ona silafia ai lea e ia o ē ili fagufagu ma le motu o tagata ‘ua pā le lauaitu,
24. ‘ua fa‘apea atu o ia ‘iā te i latou, “‘Inā ō ‘ese ia; auā e le‘i oti le teine, ‘ua nā ‘ona moe.” ‘Ona latou tapisa mai ai lea ‘iā te ia.
25. ‘Ua tulia le motu o tagata, ‘ona ulu atu ai lea o ia, ‘ua tago i lona lima, ‘ona tula‘i a‘e lea o le teine.
26. ‘Ona logo atu lea o lenei mea i lea nu‘u uma.
27. ‘Ua maliu ‘ese Iesu i lea mea, ‘ona mulimuli mai ai lea ‘iā te ia o tauaso e to‘alua, ‘ua ‘alalaga ‘ua fa‘apea mai, “Le Alo e o Tavita, ‘ia e alofa mai ‘iā te i mā‘ua”
28. ‘Ua ulufale o ia i le fale, ‘ua ō mai ai ‘iā te ia o ia tauaso ‘ona fetalai atu ai lea o Iesu ‘iā te i lā‘ua, “‘Ua ‘oulua fa‘atuatua mai ‘iā te a‘u ‘ou te mafaia lenei mea?” ‘Ona la fai mai ai lea ‘iā te ia, “Ioe le Ali‘i e.”
29. ‘Ona pa‘i atu lea o Iesu i o la mata, ‘ua fa‘apea atu, “E pei ‘ona ‘oulua fa‘atuatua, ‘ia fa‘apea lava ‘ona faia ‘iā te ‘oulua.”
30. ‘Ona pupula ai lea o lā‘ua mata. ‘Ona matuā fetalai atu ai lea o Iesu ‘iā te i lā‘ua, “‘Ia ‘oulua ne‘i fa‘ailoa atu i se tasi.”
31. A ‘ua la ō ma fa‘alaua‘itele le tala ‘iā te ia i lea nu‘u uma.
32. ‘Ua la ō fa‘auta ‘ua latou ‘aumai ‘iā Iesu le tagata gūgū ‘ua uluitinoina e le temoni.
33. ‘Ua tulia le temoni ‘ona tautala mai ai lea o le gūgū. ‘Ona taufaiofo ai lea o le motu o tagata, ‘ua fa‘apea ane, “E le‘i iloa mai anamua se mea fa‘apenā i Isaraelu.”
34. A ‘ua fai ane le ‘au faresaio, “O le temoni sili ‘ua tulia ai e ia o temoni.”
35. ‘Ua fa‘ata‘amilo Iesu i ‘a‘ai uma ma faoa ‘a‘ai, ‘ua a‘oa‘o i o latou sunako ma tala‘i le tala lelei o le mālō, ‘ua ia fa‘amālōlō fo‘i i ma‘i uma ma ma‘i tigā uma o le nu‘u.
36. ‘Ua silafia e ia le motu o tagata ‘ona mutimutivale ai lea o lona alofa ‘iā te i latou, ‘ona ‘ua lailoa i latou ma tu‘ulafoa‘iina, e pei o mamoe e leai so latou leoleo.
37. ‘Ona fetalai atu lea o ia i ona so‘o, “E tele le saito e seleseleina, a o le ‘au faigaluega e to‘aitiiti ia;
38. o lea ‘ia ‘outou ‘ai‘oi atu ai i le Ali‘i e ana le saito e seleseleina, ‘ina ‘ia ‘a‘auina mai e ia ni ē galulue i lana saito e seleseleina.”