1. “‘Ia ‘outou, ne‘i avatu ni a ‘outou mea alofa, i luma o tagata, ‘ina ‘ia iloa ai e i latou; a fa‘apea, ‘ona leai ai lea o so ‘outou taui mai lo ‘outou Tamā o i le lagi.
2. “O lea a e avatu ni mea alofa, ‘aua ne‘i e ilia le pū i ou luma, e pei ‘ona faia e tagata; fa‘afiaamiotonu i sunako ma ala, ‘ina ‘ia vi‘ia o i latou e tagata. E moni, ‘ou te fai atu ‘iā te ‘outou, ‘ua maua e i latou lo latou taui.
3. A e avatu ni mea alofa, ‘aua ne‘i iloa e lou lima tauagavale le mea ‘ua faia e lou lima taumatau;
4. ‘ina ‘ia lilo au mea alofa; o lou Tamā fo‘i, o lē silafia i le mea lilo, o ia lava na te avatu se taui ‘iā te oe.
5. “Pe a e tatalo, ‘aua ne‘i e pei o tagata fa‘afiaamiotonu, auā ‘ua latou fia tutū ma tatalo i sunako ma fetaulaigāala, ‘ina ‘ia iloa i latou e tagata. E moni, ‘ou te fai atu ‘iā te ‘outou, ‘ua maua e i latou lo latou taui.
6. A o oe, pe a e tatalo, ‘inā ulu atu ia i lou afeafe ma pupuni lona puipui, i le e tatalo ai i lou Tamā o i le mea lilo; o lou Tamā fo‘i o lē silasila i le mea lilo, na te avatu se taui ‘iā te oe.
7. “A ‘outou tatalo, ‘aua ne‘i tāutu ‘iā ‘outou ‘upu, e pei o nu‘u ‘ese; auā e manatu i latou, o le tele o a latou ‘upu e talia ai i latou.
8. O lenei, ‘aua ne‘i ‘outou fa‘apei o i latou; auā ‘ua silafia e lo ‘outou Tamā mea ‘ua ‘outou matitiva ai, a o le‘i ole atu ‘outou ‘iā te ia.
9. “O lenei, ‘ia fa‘apea ‘outou ‘ona tatalo:Lo matou Tamā e, o i le lagi,‘ia pa‘ia lou suafa.
10. ‘Ia o‘o mai lou mālō.‘Ia faia lou finagalo i le lalolagi, e pei ‘ona faia i le lagi.
11. ‘Ia e foa‘i mai ‘iā te i matou i le aso nei a matou mea e ‘ai e tatau ma le aso.
12. ‘Ia e fa‘amāgalo ‘iā te i matou ‘iā matou agasala,e pei o i matou fo‘i ‘ona matou fa‘amāgaloina atu i ē ‘ua agaleaga mai ‘iā te i matou.
13. ‘Aua fo‘i ‘e te ta‘ita‘iina i matou i le fa‘aosoosoga;a ‘ia e lavea‘i ‘iā i matou ai le leaga.
14. Auā ‘āfai tou te fa‘amāgaloina atu tagata ‘iā latou agasala, e fa‘amāgaloina fo‘i ‘outou e lo ‘outou Tamā o i le lagi.
15. ‘Ae ‘āfai tou te lē fa‘amāgaloina atu tagata ‘iā latou agasala, e lē fa‘amāgaloina fo‘i e lo ‘outou Tamā a ‘outou agasala.
16. “Pe a ‘outou anapopogi, ‘aua ne‘i ‘outou mata fa‘anoanoa pei o tagata fa‘afiaamiotonu; auā ‘ua latou fa‘aleaga o latou mata, ‘ina ‘ia iloa e tagata ‘ua latou anapopogi. E moni, ‘ou te fai atu ‘iā te ‘outou, ‘ua maua e i latou lo latou taui.
17. A o oe, pe a e anapogi, ‘ia u‘u lou ulu ma mulumulu ou mata;
18. ‘ina ‘ia lē iloa e tagata ‘ua e anapogi, nā o lou Tamā o i le mea lilo; o lou Tamā fo‘i o lo‘o silasila i le mea lilo na te avatu se taui ‘ia te oe.
19. “‘Aua tou te fa‘aputu ‘oa mo ‘outou i le lalolagi, o i ai le mogamoga ma le ‘ele e fa‘aumatia ai; o i ai fo‘i tagata gaoi e ‘eli atu, ma gaoi ai.
20. A ‘ia ‘outou fa‘aputu ‘oa mo ‘outou i le lagi, e lē o i ai se mogamoga, po o se ‘ele e fa‘aumatia ai; e lē ō i ai fo‘i tagata gaoi e ‘eli atu ma gaoi ai.
21. Auā o le mea ‘ua i ai lo ‘outou ‘oa, e i ai ‘atoa fo‘i ma o ‘outou loto.
22. “O le molī o le tino, o mata ia; pe ‘āfai fo‘i e lelei ou mata, e malamalama uma ai lou tino.
23. ‘Ae ‘āfai e leaga ou mata, e pouliuli uma ai lou tino. O lenei ‘āfai e pouliuli le malamalama ‘ua i totonu ‘iā te oe, ‘ona matuā tele ai lea o le pouliuli.
24. “E leai sē na te mafaia ‘ona ‘au‘auna i ali‘i e to‘alua; auā e ‘ino‘ino o ia i le tasi, ‘ae alofa atu i le tasi; a lē o lea, e fa‘apipi‘i atu o ia i le tasi, ‘ae fa‘alēaogā i le tasi. Tou te lē mafaia ‘ona ‘au‘auna i le Atua ‘atoa ma le ‘oa.
25. “O le mea lea ‘ou te fai atu ai ‘iā te ‘outou, ‘aua ne‘i ‘outou popole i o ‘outou ola, i mea tou te ‘a‘ai ai ma mea tou te inu ai, po o ‘outou tino, i mea tou te ‘o‘ofu ai. E lē sili ‘ea le ola i le mea e ‘ai ma le tino i le ‘ofu?
26. ‘Ia ‘outou va‘ava‘ai i manu felelei; latou te lē lūlū saito, pe selesele, pe fa‘aputu i fale saito, ‘ae fagaina i latou e lo ‘outou Tamā o i le lagi. E lē sili ‘ea lo ‘outou lelei i lo latou?
27. O ai ‘ea so ‘outou na te mafaia i lona popole ‘ona fa‘ateleina le umi o lona ola i se aga e tasi?
28. Se a fo‘i le mea tou te popole ai i ‘ofu? ‘Ia ‘outou mafaufau i lautalotalo o le vao, pe fa‘apefea ‘ona tupu; latou te lē galulue, latou te lē milo fo‘i;
29. a ‘ou te fai atu ‘iā te ‘outou, o Solomona ma lona matagofie tele na lē ‘ofu o ia pei o le tasi o nā mea.
30. ‘Āfai e fa‘apea ‘ona fa‘a‘ofuina e le Atua le vao o le fanua, o ola mai i le asō, ‘ae lafoina a taeao i le ‘ogāumu; e lē sili ‘ea ‘ona fa‘a‘ofuina o ‘outou e fa‘atuatua itiiti?
31. O lenei, ‘aua ne‘i ‘outou popole ma fa‘apea ane: ‘O a mea tatou te ‘a‘ai ai.’ po o ‘O a fo‘i mea tatou te inu ai.’ po o ‘O a fo‘i mea tatou te ‘o‘ofu ai?’
32. Auā o mea uma ia ‘ua sā‘ilia e nu‘u ‘ese auā ‘ua silafia e lo ‘outou Tamā o i le lagi e aogā ia mea uma ‘iā te ‘outou.
33. A ‘ia ‘outou mua‘i sā‘ili le mālō o le Atua ma lana amiotonu; ‘ona fa‘aopoopoina atu lea o ia mea uma ‘iā te ‘outou.
34. “O lenei, ‘aua tou te popole i le aso a taeao. Auā e popole le aso a taeao i ana lava mea. E tatau i le aso lona lava leaga.