1. ‘Ona toe sauni ai lea e Iesu o fa‘ata‘oto, ‘ua fa‘apea atu ‘iā te i latou,
2. “E tusa le mālō o le lagi ma le tasi tupu ‘ua na faia le tausama‘aga o lona atali‘i;
3. ‘ua ‘a‘auina atu e ia ana ‘au‘auna e fai atu i ē na tala‘iina, ‘ia ō mai i le tausama‘aga; a ‘ua latou lē mafafai ‘ona ō mai.
4. ‘Ua toe ‘a‘auina atu e ia nisi ‘au‘auna, ‘ua fa‘apea atu, ‘‘Ia ‘outou fai atu i ē na tala‘iina: Fa‘auta, ‘ua ‘ou saunia mea taumafa, ‘ua fafasi a‘u povi ma a‘u manu pepeti, ‘ua saunia fo‘i mea uma; ‘inā ō mai ia i le tausama‘aga.’
5. A ‘ua latou lē fia ō mai, ‘ua ta‘itasi ma alu o le tasi i lona fanua, ma le tasi i lana fa‘atau.
6. A o isi, ‘ua latou pupu‘e i ana ‘au‘auna, ‘ua fa‘aleaga ma fasiotia.
7. ‘Ua fa‘alogo ai le tupu, ‘ona matuā ita ai lea o ia; ‘ua ‘a‘auina atu e ia ana ‘au, ‘ua fa‘aumatia na tagata fasi tagata ma susunu la latou ‘a‘ai.
8. ‘Ona fai atu ai lea o ia i ana ‘au‘auna, ‘‘Ua saunia lava le tausama‘aga, a ‘ua lē aogā i ē na tala‘iina.
9. O lenei, ‘ia ‘outou ō atu i ala tele, o i latou uma tou te iloa ai, tou te tala‘i i ai le tausama‘aga.’
10. ‘Ona ō atu ai lea o ia ‘au‘auna i ala, ‘ua latou fa‘apotopoto uma ē na latou iloa, o ē leaga ‘atoa ma ē lelei; ‘ona tumu ai lea o le mea na fai ai le tausama‘aga i ē na ta‘o‘oto e ‘a‘ai ai.
11. “‘Ona ulufale atu ai lea o le tupu e va‘ava‘ai atu i ē na ta‘o‘oto e ‘a‘ai ‘ua iloa atu ai e ia o le tasi tagata ‘ua lē ‘ofu i le ‘ofu o le tausama‘aga.
12. ‘Ona fai atu ai lea o le tupu ‘iā te ia, ‘Sole, pe fa‘apefea ‘ona e ulufale mai ‘i‘inei ‘ua lē ‘iā te oe le ‘ofu o le tausama‘aga?’ ‘Ona lē gagana ai lea o ia.
13. ‘Ona fai atu ai lea o le tupu i ‘au‘auna, ‘‘Ia ‘outou fusifusia ona vae ma ona lima, ma ‘ave o ia ma lafo i le pouliuli i fafo, e i ai le taufaitagiauē ma le lilivau o nifo.’
14. Auā e to‘atele e ‘ua tala‘iina ‘ae to‘aitiiti ē ‘ua filifilia.”
15. ‘Ona ō ane ai lea o le ‘au faresaio ma taupulepule pe fa‘apefea ‘ona latou mailei ‘iā te ia i ana ‘upu.
16. ‘Ona latou ‘a‘auina mai ai lea ‘iā te ia o latou so‘o fa‘atasi ma le ‘au Herotiano, ‘ua fa‘apea mai, “Le a‘oa‘o e, ‘ua matou iloa o oe le fa‘amaoni, ‘ua e a‘oa‘o fo‘i i le ala o le Atua ma le fa‘amaoni, ‘e te lē mata‘u fo‘i i se tasi; auā e le‘i fa‘ailogaina e oe se tagata.
17. O lenei, ‘ia e ta‘u mai ‘iā te i matou, pe se a lau tāofi? pe sā ‘ea ‘ona avatu o lafoga ‘iā Kaisara pe leai?”
18. A ‘ua silafia e Iesu o latou loto leaga, ‘ua fa‘apea atu, “O ‘outou tagata fa‘afiaamiotonu, se a le mea ‘ua ‘outou tofotofo mai ai ‘iā te a‘u?
19. Fa‘aali mai ia ‘iā te a‘u se tupe o le lafoga.”‘Ona latou avane ai lea ‘iā te ia le tenari.
20. ‘Ona fetalai atu lea o ia ‘iā te i latou, “O ai ‘ea e ona lenei fa‘atagata ma lenei tusi?”
21. ‘Ua latou fai mai ‘iā te ia, “O Kaisara,”‘Ona fetalai atu ai lea o ia ‘iā te i latou, “O lenei, o mea a Kaisara, ‘ia ‘outou avatu ‘iā Kaisara; a o mea a le Atua ‘ia avatu ia i le Atua.”
22. ‘Ua latou fa‘alogo ai, ‘ona latou taufaiofo ai lea; ‘ua latou tu‘ua o ia, ‘ae ō ‘ese.
23. O lea aso ‘ua ō mai ai ‘iā te ia satukaio, o ē tāofi e leai se toetū, ‘ua latou fesili mai ‘iā te ia,
24. ‘ua fa‘apea mai, “Le a‘oa‘o e, ‘ua fai mai Mose, ‘‘Āfai e oti se tasi e leai sana fānau, ‘ia fai lana avā ma avā a lona uso, ‘ia tupu ai se gafa mo lona uso.’
25. Sa ‘iā te i matou le ‘au uso e to‘afitu; na fai avā le ulumatua, ‘ua oti fo‘i o ia; e leai fo‘i sana fānau, o lea na tu‘uina atu ai lana avā mā lona uso.
26. Na fa‘apea fo‘i o lona lua, ma lona to‘atolu, ‘ua o‘o lava i le to‘afitu.
27. Mulimuli ane ‘ua oti fo‘i le fafine.
28. O lenei a o‘o i le toetū, o ai o latou o le to‘afitu e fai māna le avā? auā na fai avā uma ai.”
29. ‘Ona tali atu ai lea o Iesu, ‘ua fa‘apea atu ‘iā te i latou, “‘Ua ‘outou sesē lava, ‘ina ‘ua ‘outou lē iloa ‘upu o Tusi ma le mana o le Atua.
30. Auā a o‘o i le toetū, latou te lē fai avā, pe nofo tane, ‘ae latou te fa‘apei o agelu o i le lagi.
31. A o le toe tutū mai o ē ‘ua oti, tou te le‘i faitau ‘ea i le afioga a le Atua ‘iā te ‘outou, ‘ua fa‘apea mai,
32. ‘O a‘u nei o le Atua o Aperaamo o le Atua fo‘i o Isaako, le Atua fo‘i o Iakopo.’ O le Atua, e lē o se Atua ia o ē ‘ua oti, a o ē ola.”
33. ‘Ua fa‘alogo ai le motu o tagata, ‘ona latou taufaiofo ai le i lana a‘oa‘oga.
34. ‘Ua fa‘alogo le ‘au faresaio ‘ua lē mautali ‘iā te ia le ‘au satukaio, ‘ona latou fa‘apotopoto ma ai lea i lea mea,
35. ‘ona fesili fa‘atofotofo mai ai lea ‘iā te ia o le tasi o i latou, o le a‘oa‘o tulafono, ‘ua fa‘apea mai,
36. “Le a‘oa‘o e, o fea poloa‘iga o i le tulafono ‘ua sili?”
37. ‘Ona fetalai atu ai lea o Iesu ‘iā te ia, “‘‘E te alofa atu i le Ali‘i lou Atua, ma lou loto ‘atoa, ma lou agaga ‘atoa, ma lou manatu ‘atoa.’
38. O le poloa‘iga muamua lenā ma le sili.
39. E fa‘apenā fo‘i lona lua, ‘‘E te alofa atu i lē lua te tuā‘oi, ‘ia fa‘apei o oe lava ‘iā te oe.’
40. O nā poloa‘iga e lua ‘ua ‘autū ai le tulafono uma ma le ‘au perofeta.”
41. ‘Ua fa‘apotopoto le ‘au faresaio, ‘ona fesili atu ai lea o Iesu ‘iā te i latou,
42. ‘ua fa‘apea atu, “Se a la ‘outou tāofi i le Keriso? Se atali‘i ‘ea ia o ai?”‘Ona latou fai mai ai lea ‘iā te ia, “O le alo o Tavita.”
43. ‘Ona fetalai atu ai lea o ia ‘iā te i latou, “O lenei, fa‘apefea ‘ona ta‘ua e Tavita a o i ai o ia i le Agaga, o ia o lona Ali‘i, ‘ua fa‘apea mai,
44. ‘‘Ua fetalai ane le Ali‘i i lo‘u Ali‘i: “‘Ia e nofo i lo‘u itū taumatau,se‘ia ‘ou faia ē ‘ua fai oe mo latou fili ma mea e tu ai ou vae.”’
45. O lenei, ‘āfai ‘ua ta‘ua o ia e Tavita, o le Ali‘i, pe fa‘apefea ‘ona fai o ia mōna atali‘i?”
46. ‘Ae leai se tasi ‘ua na mafaia ‘ona tali mai se ‘upu ‘iā te ia; talu lea aso e lē toe fa‘amalosi ‘ona fesili mai se tasi ‘iā te ia i se mea.