1. ‘Ua uma ‘ona poloa‘i e Iesu i ona so‘o e to‘asefulu ma le to‘alua, ‘ona maliu ‘ese ai lea o ia i lea mea, e a‘oa‘o atu ma tala‘i atu i o latou ‘a‘ai.
2. ‘Ua fa‘alogo o Ioane i le fale puipui i galuega a Keriso, ‘ona ‘a‘auina mai ai lea e ia ni ona so‘o se to‘alua,
3. ‘ua fa‘apea mai ‘iā te ia, “O oe ‘ea lē maliu mai, pe matou te fa‘atali i se tasi?”
4. ‘Ona tali atu ai lea o Iesu, ‘ua fa‘apea atu ‘iā te i lā‘ua, “‘Inā ō atu ia ‘oulua ma fa‘ailoa atu ‘iā Ioane o mea nā ‘oulua fa‘alogo i ai ma va‘ai i ai;
5. ‘ua pupula tauaso ma ‘ua sāvavali pipili, ‘ua fa‘amamāina lepela ma ‘ua logo tutuli, ‘ua fa‘atutūina o ē na oti ma ‘ua folafolaina fo‘i le tala lelei i ē matitiva.
6. E manuia fo‘i sē lē tausuai ‘ia te a‘u.”
7. ‘Ua la ō, ‘ona o‘o ane lea o le lauga a Iesu i le motu o tagata ‘iā Ioane, “Na ‘outou ō atu ‘ea i le vao e matamata i ni ā? O lē ū ‘ea ‘ua lūlūina e le matagi?
8. Pe na ‘outou ō lava e matamata i ni ā? O le tagata ‘ea ‘ua ‘ofu i ‘ofu malūlū? Fa‘auta, o ē ‘o‘ofu i ‘ofu malūlū o i maota o tupu i latou.
9. A o le a ‘ea na ‘outou ō atu e matamata i ai? O le perofeta ‘ea? E moni, ‘ou te fai atu ‘iā te ‘outou, E sili lava ia i le perofeta.
10. Auā o ia lea ‘ua tusi mai i ai,‘Fa‘auta, ‘ou te ‘auina atu la‘u sāvali i ou luma,o lē na te teuteua lou ala i ou luma.’
11. E moni, ‘ou te fai atu ‘iā te ‘outou, e le‘i tu mai i ē na fānanau i fafine sē sili ‘iā Ioane le papatiso; a o lē aupito itiiti i le mālō o le lagi, e sili lea ‘iā te ia.
12. Na āfua mai i ona po o Ioane le papatiso, ‘ua o‘o i nei ona po, ‘ua taufaoa ai le mālō o le lagi, o lo‘o ‘ua ‘avea fa‘amalosi fo‘i e i latou o taufao.
13. Auā ‘ua vavalo mai le ‘au perofeta uma ma le tulafono, ‘ua o‘o lava ‘iā Ioane.
14. ‘Āfai fo‘i tou te loto ‘ina talia, o Elia lava lea na tu‘u e sau.
15. O lē ‘ua i ai taliga e fa‘alogo ai, ‘inā fa‘alogo mai ia o ia.
16. “‘Ou te fa‘atusaina i ni ā lenei tupulaga? E tusa ia ma tamaiti ‘ua nonofo i malae ma vala‘au atu ‘iā latou aumea,
17. ‘ua fa‘apea atu, ‘‘Ua matou fa‘aili atu ‘iā te ‘outou, ‘ae tou te le‘i sa‘asa‘a mai;‘ua matou tagi auē ‘iā te ‘outou, ‘ae tou te le‘i taufaitagitu‘i mai.’
18. Auā na sau Ioane, e le‘i ‘ai e le‘i inu fo‘i ia; ‘ona latou fai ane ai lea, ‘‘Ua ‘iā te ia le temoni.’
19. ‘Ua sau fo‘i le Atali‘i o le tagata, ‘ua ‘ai o ia ma inu; ‘ona latou fai ane ai lea, ‘Fa‘auta, o le tagata ‘ai tele ma le inu uaina, o le uō a tagata ao lafoga ma ē agasala.’ ‘Ae ta‘uamiotonuina le poto e ana galuega.”
20. ‘Ona to‘atama‘i ai lea o Iesu i ‘a‘ai na fai ai le tele o ona vāvega, auā latou te le‘i salamō.
21. “‘Oi talofa ‘iā te oe Koasini! ‘oi talofa ‘iā te oe Petesaita! auā ‘ana faia i Turo ma Saitonu o vāvega na faia ‘iā te ‘outou, po ‘ua leva ‘ona latou salamō i le ‘ie talatala ma le lefulefu.
22. O lea ‘ou te fai atu ai ‘iā te ‘outou, E feoloolo Turo ma Saitonu i le aso fa‘amasino ‘iā te ‘outou.
23. O oe fo‘i Kapanaumi, ‘ua fa‘aeaina e o‘o i le lagi e lafotūina oe i lalo lava i seoli; auā, ana faia i Sotoma o vāvega na faia ‘iā te oe, po ‘ua tumau ia ‘ua o‘o i nei ona po.
24. O lea fo‘i ‘ou te fai atu ai ‘iā te ‘outou, E feoloolo le nu‘u o Sotoma i le aso fa‘amasino ‘iā te oe.”
25. O lea lava itū aso ‘ua fetalai atu ai Iesu, ‘ua fa‘apea atu, “‘Ou te fa‘afetai ‘iā te oe, lo‘u Tamā e, le Ali‘i o le lagi ma le lalolagi, ‘ina ‘ua e nanā ia mea i ē popoto ma ē atamamai, a ‘ua fa‘aalia atu ia mea i tama valevale.
26. O lea lava, lo‘u Tamā e, auā o lou finagalo lava lea.
27. ‘Ua tu‘uina mai mea uma ‘iā te a‘u e lo‘u Tamā; e leai fo‘i se tasi ‘ua iloa le Atali‘i, ‘ua nā o le Tamā; e leai fo‘i se tasi ‘ua iloa le Tamā, ‘ua nā o le Atali‘i ma sē ‘ua loto le Atali‘i e fa‘aali atu i ai.
28. “‘Ia ‘outou ō mai ‘iā te a‘u, o ‘outou uma o ē tigāina ma mafatia i avega, o a‘u fo‘i e mālōlō ai ‘outou.
29. ‘Ia ‘outou amoina la‘u amo ma ‘ia ‘outou fa‘aa‘oa‘o ‘iā te a‘u, auā o a‘u lē agamalū ma le loto maulalo; ‘ona maua lea e ‘outou o le mālōlōga mo ‘outou agaga.
30. Auā e ‘avegofie la‘u amo, o la‘u avega fo‘i e māmā ia.”