Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28

Feagaiga Tuai

Feagaiga Fou

Mataio 10 O LE TUSI PA'IA - Ekalesia Katoliko Roma (RSCB)

O ‘Aposetolo e To‘asefulu ma le To‘alua

1. ‘Ua vala‘au atu Iesu i ona so‘o e to‘asefulu ma le to‘alua, ‘ona tu‘u atu lea e ia ‘iā te i latou le pule i agaga leaga, ‘ina ‘ia tutuli ‘iā te i latou ma fa‘amālōlō i ma‘i uma ma ma‘i tigā uma.

2. O igoa nei o le ‘au ‘aposetolo e to‘asefulu ma le to‘alua; e muamua Simona e igoa ‘iā Peteru ma Aneterea lona uso, o Iakopo le atali‘i o Sepetaio ma Ioane lona uso,

3. o Filipo ma Patolomaio, Toma ma Mataio le ao lafoga, o Iakopo le atali‘i o Alefaio ma Tataio,

4. o Simona le Kanana ma Iuta le Sekara, o ia fo‘i na fa‘alata ‘iā te ia.

Galuega Tala‘i o le To‘asefulu ma le Lua

5. ‘Ua ‘a‘auina atu e Iesu lenei to‘asefulu ma le to‘alua, ‘ua ia fetalai atu ‘iā te i latou, ‘ua fa‘apea atu, “‘Aua tou te ui i ala o nu‘u ‘ese, ‘aua fo‘i tou te ō atu i se ‘a‘ai o Samaria;

6. ‘ae lelei ‘ona ‘outou ō atu i mamoe o le ‘āiga o Isaraelu ‘ua lē iloa.

7. A ‘outou ō, ‘ia ‘outou tala atu, ‘ia fa‘apea atu, ‘‘Ua latalata mai le mālō o le lagi.’

8. ‘Ia ‘outou fa‘amālōlō i ē mama‘i, fa‘amamā lepela, fa‘atutū i ē ‘ua oti, tutuli i temoni. ‘Ua maua fua ‘outou, ‘ia ‘outou foa‘ifuaina atu.

9. ‘Aua ne‘i teu ma ‘outou auro, po o ario, po o ‘apamemea i o ‘outou fusi.

10. ‘Aua fo‘i le ‘ave se taga i le malaga ‘aua fo‘i le ta‘ilua o ‘ofu tino, po se‘evae, po o se to‘oto‘o; auā e tatau ‘ona avatu le mea ‘ai i lē fai galuega.

11. O se ‘a‘ai po se faoa ‘a‘ai tou te o‘o atu i ai, ‘ia fesili po o ai sē i ai ‘ua tatau; ‘ia ‘outou nonofo ai i le tou ō ai.

12. A ‘outou ulufale atu i se ‘āiga, ‘ia ‘outou ofo alofa atu i ai.

13. Pe ‘āfai fo‘i ‘ua tatau le ‘āiga, ‘ia o‘o atu i ai la ‘outou fa‘amanuia; ‘ae ‘āfai ‘ua lē tatau, ‘ia toe fo‘i mai ai ‘iā te ‘outou la ‘outou fa‘amanuia.

14. ‘Ai sē lē talia ‘outou, pe lē fa‘alogo ‘iā ‘outou ‘upu, a ‘outou ō atu nai lea fale po o lea ‘a‘ai, ‘ia ‘outou tūtū atu le ‘ele‘ele mai ‘outou vae.

15. E moni, ‘ou te fai atu ‘iā te ‘outou, O le aso fa‘amasino e feoloolo ai Sotoma ma Komoro i lea lava ‘a‘ai.

O Puapuagā o le a o‘o Mai

16. “Fa‘auta, ‘ou te ‘a‘au atu ‘iā te ‘outou e pei o mamoe i le vā o luko; o lenei, ‘ia ‘outou atamamai pei o gata, a ‘ia fīfīlemū pei o lupe.

17. ‘Ia ‘outou ma tagata; auā latou te tu‘uina atu ‘outou i fono ma latou sasa ‘iā te ‘outou i o latou sunako.

18. E ta‘ita‘iina atu fo‘i ‘outou i luma o ali‘i ma tupu ‘ona o a‘u, e fai ma molimau ‘iā te i latou ‘atoa ma nu‘u ‘ese.

19. Pe a latou tu‘uina atu ‘outou, ‘aua tou te popole pe fa‘apefea, pe se a fo‘i tou te fai atu ai, auā e foa‘iina mai ‘iā te ‘outou i lea lava itū aso se ‘upu tou te fai atu ai.

20. Auā e lē o ‘outou e tautala atu ai, a o le Agaga o lo ‘outou Tamā e tautala mai ai i totonu ‘iā te ‘outou.

21. E tu‘uina atu le uso e le uso ‘ia oti, e tu‘uina atu fo‘i le fānau e le tamā; e tutū atu fo‘i le fānau i o latou mātua ‘ina ‘ia fasiotia i latou.

22. E ‘inosia fo‘i ‘outou e tagata uma ‘ona o lo‘u igoa; a o lē tumau se‘ia o‘o atu i le gata‘aga, e fa‘aolaina o ia.

23. Pe a latou fa‘asauā ‘iā te ‘outou i le tasi ‘a‘ai, ‘ia ‘outou sōsōla i se tasi; auā e moni, ‘ou te fai atu ‘iā te ‘outou, e lē so‘o ‘a‘ai o Isaraelu ‘iā te ‘outou se‘ia sau le Atali‘i o le tagata.

24. “E lē sili le so‘o i le a‘oa‘o e lē sili fo‘i le ‘au‘auna i lona ali‘i;

25. tau lava ‘ina ‘avea le so‘o ‘ia fa‘apei o lona a‘oa‘o, o le ‘au‘auna fo‘i ‘ia fa‘apei o lona ali‘i. ‘Āfai ‘ua latou ta‘ua le matai o le ‘āiga o Pelesepulo, e lē sili ‘ea ‘ona fa‘apea atu fo‘i i tagata o le ‘āiga?

‘Aua le Matata‘u

26. “O lenei, ‘aua tou te matata‘u ‘iā te i latou; auā e leai se mea o lo‘o ufiufitia e lē fa‘aalia, e leai fo‘i se mea lilo e lē fa‘ailoaina.

27. ‘Ou te fai atu ‘iā te ‘outou i le pouliuli tou te ta‘u atu lea i le malamalama; o le mea fo‘i ‘ua lagona i o ‘outou taliga, ‘ia ‘outou tala‘i atu i luga o fale.

28. ‘Aua fo‘i tou te matata‘u i ē fasioti le tino, ‘ae latou te lē mafaia ‘ona fasioti le agaga; ‘ae lelei ‘ona ‘outou matata‘u i lē ‘ua mafai ‘ona fano ‘iā te ia le agaga ‘atoa ma le tino i Kēna.

29. E lē fa‘ataulia ‘ea ni manu iti se lua i le asari? E leai fo‘i so lā‘ua e pa‘ū i le ‘ele‘ele e aunoa ma lo ‘outou Tamā.

30. A o ‘outou lauulu lava ‘ua faitaulia uma ia.

31. O lea ‘aua tou te matata‘u ai; e sili ‘outou i manu iti e tele.

O le Fa‘afitia ma le Ta‘uta‘u atu o Keriso

32. “O lenei, ‘ai sē na te ta‘uta‘u a‘u i luma o tagata, o a‘u fo‘i ‘ou te ta‘uta‘uina o ia i luma o lo‘u Tamā o i le lagi.

33. ‘Ai sē fa‘afiti fo‘i ‘iā te a‘u i luma o tagata, ‘ou te fa‘afitia fo‘i o ia i luma o lo‘u Tamā o i le lagi.

E lē o le Filemū a o le Pelu

34. “‘Aua tou te mānatunatu ‘ua ‘ou sau e avatu le filemū i le lalolagi; ‘ou te le‘i sau e avatu le filemū, a o le pelu.

35. Auā ‘ua ‘ou sau e fa‘amāsesei le tagata ma lona tamā,o le tama teine fo‘i e fa‘amāsesei ma lona tinā,o le avā fo‘i e fa‘amāsesei ma le tinā o lana tane.

36. E fai fo‘i le tagata ma fili o lona ‘āiga.

37. O lē ‘ua tele lona alofa i lona tamā po o lona tinā ‘ae itiiti ‘iā te a‘u, e lē aogā lea ‘iā te a‘u; o lē ‘ua tele fo‘i lona alofa i lona atali‘i po o lona afafine, ‘ae itiiti ‘iā te a‘u, e lē aogā fo‘i lea ‘iā te a‘u.

38. O sē lē ‘ave lona satauro ma mulimuli mai ‘iā te a‘u, e lē aogā fo‘i lea ‘iā te a‘u.

39. O lē maua lona ola, e māumau ai ‘iā te ia. O lē fa‘amaumau i lona ola ‘ona o a‘u, e maua e ia.

O le Taui

40. “O lē talia ‘outou, ‘ua talia e ia o a‘u; o lē talia fo‘i a‘u, ‘ua talia e ia o lē na ‘auina mai a‘u,

41. O lē talia fo‘i o se perofeta i le igoa o le perofeta, e maua e ia le taui o le perofeta; o lē talia fo‘i se tagata amiotonu i le igoa o le tagata amiotonu, e maua e ia le taui o le tagata amiotonu.

42. ‘Ai sē avane fo‘i tau lava se ipu vai malūlū e inu ai se tasi o i latou nei e fa‘atauva‘a i le igoa o le so‘o, e moni, ‘ou te fai atu ‘iā te ‘outou, e lē māumau lona taui.”