1. O ia ona aso ‘ua ui atu ai Iesu i tosaito i le sapati; ‘ua fia ‘a‘ai fo‘i ona so‘o, ‘ona ‘o‘oti ai lea e i latou o ‘au saito ma ‘a‘ai ai.
2. ‘Ua iloa atu e le ‘au faresaio, ‘ona latou fa‘apea atu ai lea ‘iā te ia, “Fa‘auta, ‘ua faia e ou so‘o le mea e sā ‘ona fai i le sapati.”
3. A ‘ua fetalai atu o ia ‘iā te i latou, “E le‘i faitaulia ‘ea e ‘outou le mea na faia e Tavita, ‘ina ‘ua fia ‘ai o ia, ‘atoa ma i latou sā ‘iā te ia.
4. Na ulufale o ia i le fale o le Atua, na ‘ai fo‘i e ia areto ‘ua laulauina i luma, o mea e sā ‘ona ‘ai ai o ia, ‘atoa ma i latou sa ‘iā te ia, e gata lava i le ‘au ositaulaga?
5. E le‘i faitaulia ‘ea fo‘i e ‘outou i le tulafono, o sapati uma ‘ua solia ai le sapati e le ‘au ositaulaga i le malumalu, ‘ae lē sala i latou?
6. ‘Ou te fai atu fo‘i ‘iā te ‘outou, o ‘i‘inei lē ‘ua sili i le malumalu.
7. ‘Ana ‘outou iloa le uiga o lea ‘upu, ‘‘Ou te loto i le alofa, ‘ae lē o le taulaga,’ po ‘ua ‘outou le fa‘asalaina o ē lē sala.
8. Auā o le Atali‘i o le tagata, o le Ali‘i lava ia o le sapati.”
9. ‘Ua maliu ‘ese Iesu i lea mea, ‘ona ulu atu ai lea o ia i lo latou sunako.
10. Fa‘auta fo‘i, sā i ai le tagata ‘ua gase lona lima; ‘ona latou fesili mai ai lea ‘iā te ia, ‘ua fa‘apea mai. “E tatau ‘ea ‘ona fa‘amālōlō i le sapati?” ‘ina ‘ia latou momoli ‘iā te ia.
11. ‘Ona fetalai atu ai lea o Iesu ‘iā te i latou, “O ai ‘ea so ‘outou e ana le mamoe e tasi, ‘āfai fo‘i e pa‘ū o ia i le lua i le sapati, e lē tago ‘ea i ai ma ‘ava‘e i luga?
12. E lē sili lava ‘ea le tagata i le mamoe? O lea, e tatau ai ‘ona agalelei i le sapati.”
13. ‘Ona fetalai atu ai lea o ia i le tagata, “‘Inā fa‘aloaloa ia o lou lima.”‘Ona fa‘aloaloa ai lea e ia, ‘ona toe lelei ai lea, ‘ua pei o le tasi.
14. A ‘ua ō i fafo le ‘au faresaio, ‘ona latou taupulepule ai lea ‘iā te ia, ‘ina ‘ia latou fasioti ‘iā te ia.
15. A ‘ua silafia e Iesu, ‘ona maliu ‘ese ai lea o ia i lea mea; ‘ua mulimuli mai fo‘i ‘iā te ia le motu o tagata e to‘atele; ‘ona fa‘amālōlōina ai lea e ia o i latou uma;
16. ‘ua matuā fetalai atu fo‘i o ia ‘iā te i latou, ‘aua ne‘i latou fa‘alaua‘i tele ia;
17. ‘ina ‘ia taunu‘u ai le ‘upu a le perofeta o Isaia, ‘ua fa‘apea mai:
18. “Fa‘auta, o la‘u ‘au‘auna na ‘ou filifilia,o la‘u pele o lo‘o fiafia i ai lo‘u loto;‘ou te tu‘uina atu lo‘u Agaga i ona luga,e fa‘ailoa atu e ia le fa‘amasinoga i nu‘u ‘ese.
19. E lē finau ia, e lē ‘alaga fo‘i o ia,e lē lagona fo‘i lona leo e se tasi i ala.
20. E lē gagau e ia le u ‘ua gapēpē,e lē tinei fo‘i e ia le vavae ‘ua mū itiiti;se‘ia fa‘amanumālō e ia le fa‘amasinoga.
21. O lona igoa fo‘i e fa‘amoemoe i ai nu‘u ‘ese.”
22. ‘Ona ‘aumaia lea ‘iā Iesu o le tagata ‘ua uluitinoina e le temoni, o le tauaso fo‘i o ia ma gūgū; ‘ona fa‘amālōlōina ai lea e Iesu o ia, ‘ona tautala ai lea ma va‘ai lē sa tauaso ma gūgū.
23. ‘Ona taufaiofo ai lea o le motu o tagata uma, ‘ua fa‘apea ane, “Po o le atali‘i ‘ea lenei o Tavita?”
24. A ‘ua lagona e le ‘au faresaio, ‘ona latou fai ane ai lea, “‘Ana lē se anoa Pelesepulo le ali‘i o temoni, e lē tulia e lenā tagata o temoni.”
25. A ‘ua silafia e Iesu o latou manatu, ‘ona fetalai atu ai lea o ia ‘iā te i latou, “O mālō uma ‘ua fevaevaea‘i e fa‘aumatia ia; o ‘a‘ai uma fo‘i po o ‘āiga e fevaevaea‘i e lē tumau ia.
26. ‘Āfai fo‘i e tulia e Satani ia Satani, ‘ona fevaevaea‘i lea o Satani ‘iā te ia lava; pe fa‘apefea fo‘i ‘ona tumau o lona mālō?
27. ‘Āfai fo‘i o Pelesepulo ‘ou te tulia ai o temoni, po o ai ‘ua tulia ai temoni e a ‘outou fānau? O le mea lea e fai ai i latou ma fa‘amasino ‘iā te ‘outou.
28. ‘Ae ‘āfai o le Agaga o le Atua ‘ou te tulia ai o temoni, ‘ua o‘o mai lava ‘iā te ‘outou le mālō o le Atua.
29. E mafai fa‘apefea se tasi ‘ona ulu atu i le fale o le tagata malosi, ma vete ana mea? se‘ia mua‘i fusifusia le tagata malosi, i le vete ai lona fale.
30. O sē lē ‘au ‘iā te a‘u, e ‘au ‘ese lea ‘iā te a‘u; o sē e lē fa‘aputu fa‘atasi ma a‘u, e fa‘ata‘ape‘ape lea.
31. O le mea lea ‘ou te fai atu ai ‘iā te ‘outou, o agasala uma ma ‘upu fāifai e fa‘amāgaloina ia i tagata; a o lē fāifai i le Agaga, e lē fa‘amāgaloina lea i tagata.
32. ‘Ai sē fai ‘upu i le Atali‘i o le tagata, e fa‘amāgaloina lea; a o lē fai ‘upu i le Agaga Pa‘ia, e lē fa‘amāgaloina lea i le olaga nei po o le atalī.
33. “‘Ia ‘outou ta‘ua le la‘au e lelei, ma ona fua fo‘i e lelei; a lē o lea, ‘ia ‘outou ta‘ua le la‘au leaga ma ona fua fo‘i e leaga; auā o ona fua ‘ua ‘iloga ai le la‘au.
34. Fānau a gata fe‘ai e, ‘outou o lo‘o leaga, e mafaia fa‘apefea ‘ona ‘outou ‘upu lelei? Auā o le tele o mea i le loto e tautala mai ai le gutu.
35. ‘Ua ‘aumai mea lelei e le tagata amio lelei i mea lelei ‘ua teu i lona loto; o le tagata amio leaga fo‘i, ‘ua ‘aumai mea leaga i mea leaga ‘ua teu i lona loto.
36. A ‘ou te fai atu ‘iā te ‘outou, o ‘upu fa‘atauva‘a uma e faia e tagata, latou te talatala atu ai le tala i le aso fa‘amasino.
37. Auā o au ‘upu e ta‘uamiotonuina ai oe, o au ‘upu fo‘i e fa‘asalaina ai oe.”
38. ‘Ona tali mai ai lea o isi o le ‘au tusi‘upu ma le ‘au faresaio, ‘ua fa‘apea mai, “Le a‘oa‘o e, ‘ua matou fia iloa se fa‘ailoga ‘iā te oe.”
39. A ‘ua tali atu Iesu, ‘ua fa‘apea atu ‘iā te i latou, “O le tupulaga leaga ma le mulilulua ‘ua latou sā‘ilia mai se fa‘ailoga; e leai se fa‘ailoga e avatua i ai ‘ua nā o le fa‘ailoga o Iona le perofeta.
40. Auā e pei o Iona sa i le manava o le i‘a tele i ao e tolu ma po e tolu, e fa‘apea fo‘i ‘ona i ai o le Atali‘i o le tagata i lalo i le ‘ele‘ele i ao e tolu ma po e tolu.
41. E tutū mai tagata o Nineva i le fa‘amasinoga fa‘atasi ma le tupulaga nei e fa‘asala i ai; auā na latou salamō i le tala‘iga a Iona; fa‘auta fo‘i, o ‘i‘inei lē sili ‘iā Iona.
42. E tutū mai fa‘atasi le tupu fafine o le itū i saute ma le tupulaga nei i le fa‘amasinoga, o fa‘asala i ai; auā na sau o ia mai le gata‘aga o le lalolagi e fa‘alogologo i le poto o Solomona; fa‘auta fo‘i o ‘i‘inei lē sili ‘iā Solomona.
43. “Pe a alu i fafo i le tagata le agaga leaga, ‘ona fealua‘i ai lea o ia i nu‘u naumati, ‘ua sā‘ili se mālōlōga, ‘ae lē maua.
44. ‘Ona fa‘apea ane ai lea o ia, ‘‘Ou te fo‘i atu i lo‘u fale na ‘ou sau ai;’ ‘ua alu i ai, ‘ona iloa ai lea ‘ua tu‘ufua, ‘ua uma fo‘i ‘ona tafitafi ma teuteu.
45. ‘Ona alu ai lea o ia, ‘ua nā ‘aumaia isi agaga e to‘afitu e sili lo latou leaga i lona, ‘ona latou ulufale atu ai lea, ‘ua nonofo ai; ‘ona sili ai lea o le leaga le tulaga o lea tagata i lo le tulaga muamua. E fa‘apea fo‘i ‘ona fai i lenei tupulaga leaga.”
46. ‘Ua tautala o Iesu i le motu o tagata, fa‘auta, ‘ua tutū mai i fafo o lona tinā ma ona uso, ‘ua fia tautala ma ia.
47. ‘Ona fai mai ai lea o le tasi ‘iā te ia, “Fa‘auta, ‘ua tutū mai i fafo lou tinā ma ou uso, ‘ua fia tautala ma oe.”
48. ‘Ona tali atu ai lea o Iesu, ‘ua fa‘apea atu i lē na ta‘u mai ‘iā te ia, “O ai ‘ea lo‘u tinā? O ai fo‘i o‘u uso?”
49. ‘Ona fa‘aloaloa ai lea e ia o lona ‘a‘ao i ona so‘o, ‘ua fa‘apea atu, “Fa‘auta, o lo‘u tinā ma o‘u uso,
50. auā o lē faia le finagalo o lo‘u Tamā o i le lagi, o lo‘u uso lea ma lo‘u tuafafine ma lo‘u tinā.”