1. O ona po ia na sau ai Ioane le papatiso, ‘ua tala‘i atu i le vao o Iutaia,
2. ‘ua fa‘apea atu, “‘Inā salamō ia ‘outou; auā ‘ua latalata mai le mālō o le lagi.”
3. Auā o ia lava lenei na fai mai ai le perofeta o Isaia, ‘ua fa‘apea mai,“O le leo o lē ‘ua ‘alaga i le vao:‘‘Inā teuteu ia e ‘outou le ala o le Ali‘i,‘ia fa‘alaulelei ona ala.’”
4. A o Ioane ia, sa ‘ofu i le fulufulu kamela ma le fusi pa‘u i lona sulugātiti; a o ana mea e ‘ai, o sē akerise ma le meli vao ia.
5. ‘Ona ō atu ai lea ‘iā te ia o Ierusalema ma Iutaia uma, ‘atoa ma le itū uma o Ioritana;
6. ‘ua papatisoina fo‘i i latou i Ioritana e ia, ‘ua ta‘u atu e i latou a latou agasala.
7. ‘Ua nā iloa atu le ‘au faresaio ma le ‘au satukaio e to‘atele ‘ua ō mai i lana papatisoga, ‘ona ia fa‘apea atu ai lea ‘iā te i latou, “Fānau a gata fe‘ai e, o ai ‘ea ‘ua na fa‘aali atu ‘iā te ‘outou ‘ia sōsōla ‘ese i le to‘asā atalī?
8. ‘Ia ‘outou fua mai ni fua e tatau ma le salamō;
9. ‘aua fo‘i ne‘i ‘outou manatu e fa‘apea ifo i o ‘outou loto, ‘O Aperaamo, o ia o lo matou tamā;’ auā ‘ou te fai atu ‘iā te ‘outou, e mafaia lava e le Atua ‘ona fa‘atupuina mai i nei ma‘a ni fānau mā Aperaamo.
10. O lo‘o tu‘u nei fo‘i le to‘i i tafu‘e o la‘au; o la‘au uma fo‘i e lē fua mai i fua lelei, e taia ma lafoina i le afi.
11. “O a‘u nei, ‘ou te papatiso atu ‘iā te ‘outou i le vai ‘ina ‘ia salamō; ‘ae peita‘i o lē mulimuli mai e silisili o ia ‘iā te a‘u, e lē aogā a‘u ‘ona tau‘ave i ona se‘evae; o ia lea na te papatisoina atu ‘iā te ‘outou i le Agaga Pa‘ia ma le afi.
12. O i lona ‘a‘ao lana asu, nā te fa‘amamāina ai lana fa‘aputuga saito; nā te fa‘apotopotoina fo‘i ana saito i le fale saito, ‘ae susunuina le otaota o saito i le afi e lē matineia.”
13. ‘Ona maliu atu ai lea o Iesu mai Kalilaia i Ioritana ‘iā Ioane, ‘ia papatisoina ai e ia.
14. A ‘ua vavao e Ioane ‘iā te ia, ‘ua fa‘apea mai, “E ao ‘ona e papatisoina mai o a‘u, a e maliu mai ‘ea oe ‘iā te a‘u?”
15. A ‘ua tali atu Iesu, ‘ua fa‘apea atu ‘iā te ia, “Tu‘u mai nei pea ia; auā e fa‘apea ‘ona tatau ‘iā te i tatou ‘ona fa‘ataunu‘uina o mea tonu uma.” ‘Ona tu‘u mai lea ‘iā te ia.
16. ‘Ua papatisoina Iesu, ‘ona maliu a‘e loa lea o ia nai le vai, fa‘auta fo‘i, ‘ua fa‘aavanoaina le lagi ‘iā te ia, ‘ua ia iloa atu fo‘i le Agaga o le Atua ‘ua afio ifo e peiseaī se lupe, ‘ua o‘o i ona luga.
17. Fa‘auta fo‘i, o le si‘ufofoga mai le lagi, ‘ua fa‘apea mai, “O lo‘u Atali‘i pele lenā, ‘ua ‘ou fiafia lava ‘iā te ia.”#