1. ‘Ua latalata i latou i Ierusalema, ‘ua o‘o i Petefake i le mauga o Olive, ‘ona ‘a‘auina atu ai lea e Iesu ona so‘o e to‘alua,
2. ‘ua fa‘apea atu ‘iā te i lā‘ua, “Lua te ō atu i le ‘a‘ai ‘ua lumana‘i ‘oulua, ‘ona iloa atu loa lea e ‘oulua le asini ‘ua nonoa, o lana tama fo‘i ‘ua fa‘atasi ma ia; lua te tatalaina, i le ta‘ita‘i mai ai ‘iā te a‘u.
3. ‘Āfai e fai ane se tasi se ‘upu ‘iā te ‘oulua, ‘ia ‘oulua fai atu, ‘E mana‘o i ai le Ali‘i;’ ‘ona tu‘u mai ai lea e ia.”
4. ‘Ua o‘o nei mea uma, ‘ina ‘ia taunu‘u ai le ‘upu a le perofeta, ‘ua fa‘apea mai:
5. “‘Ia ‘outou fai atu i le tama fafine a Siona,fa‘auta, o lo‘o afio mai ‘iā te oe lou Tupu.‘Ua agamalū o ia, o lo‘o ti‘eti‘e i le asini,o le tama‘i asini fo‘i.”
6. ‘Ona ō ai lea o ia so‘o, ‘ua faia fo‘i e i lā‘ua pei ‘ona fetalai atu ai o Iesu ‘iā te i lā‘ua.
7. ‘Ua la ta‘ita‘iina mai fo‘i le asini ma le tama‘i asini, ‘ua fa‘ae‘e i ai o latou ‘ofu ma fa‘ati‘eti‘e ai o ia.
8. O le to‘atele o le motu o tagata ‘ua fofola o latou ‘ofu i le ala; o isi fo‘i ‘ua latou sala i lālā o la‘au ma folasia ai le ala.
9. O le motu o tagata ‘ua muamua ma ē ‘ua mulimuli, ‘ua ‘alalaga i latou, ‘ua fa‘apea mai, “Osana i le Alo o Tavita; ‘ia manuia lē afio mai i le suafa o le Ali‘i. Osana i mea e aupito i luga.”
10. ‘Ua o‘o o ia i Ierusalema, ‘ona vevesi ai lea o le ‘a‘ai uma, ‘ua fa‘apea ane, “O ai ‘ea lenei?”
11. ‘Ona fa‘apea atu ai lea o le motu o tagata, “O Iesu lenei le perofeta mai Nasareta i Kalilaia.”
12. ‘Ua ulufale atu Iesu i le malumalu o le Atua, ‘ona ia tulia uma lea i fafo o ē na fefa‘ataua‘i i le malumalu, ma na fuli i lalo laulau a ē na sui tupe, ma nofoa o ē na fa‘atau lupe.
13. ‘Ua fa‘apea atu o ia ‘iā te i latou, “‘Ua tusia, ‘E ta‘ua lo‘u fale, o le fale tatalo;’ a ‘ua faia e ‘outou ma ana o ē fao mea.”
14. ‘Ona ō mai ai lea ‘iā te ia i le malumalu o ē tauaso ma ē pipili, ‘ua na fa‘amālōlō ‘iā te i latou.
15. ‘Ua iloa atu e le ‘au ositaulaga sili ma le ‘au tusi‘upu o vāvega ‘ua faia e ia, o tamaiti fo‘i ‘ua ‘alalaga i le malumalu, ‘ua fa‘apea ane, “Osana i le Alo o Tavita”; ‘ona matuā tigā ai lea o i latou,
16. ‘ona fa‘apea mai ai lea o i latou ‘iā te ia, “‘Ua e lagona ‘ea a latou ‘upu?”‘Ona fetalai atu ai lea o Iesu ‘iā te i latou, “Ioe; tou te le‘i faitaulia lava ‘ea, ‘‘Ua e saunia le vi‘iga mai gutu o tama meamea ma tama fesusui?’”
17. ‘Ona tu‘ua lea o i latou e ia, ‘ae maliu atu i tua o le ‘a‘ai ‘ua o‘o i Petania, ‘ua nofo ai.
18. O le taeao ‘ua fo‘i atu ai o Iesu i le ‘a‘ai, ‘ua fia taumafa.
19. ‘Ua silafia e ia le mati e tasi i le auala, ‘ua o‘o atu i ai, ‘ae leai se mea na maua ai, ‘ua na o lau, ‘ona fa‘apea atu ai lea o ia i ai, “‘Aua ne‘i toe tutupu ni ou fua e o‘o i le fa‘avavau.” ‘Ona mago loa lea o le mati.
20. ‘Ua iloa atu e le ‘au so‘o, ‘ona latou taufaiofo ai lea, ‘ua fa‘apea ane, “‘Ua fa‘apea ‘ona vave mago o le mati nei!”
21. A ‘ua tali atu Iesu, ‘ua fa‘apea atu ‘iā te i latou, “E moni, ‘ou te fai atu ‘iā te ‘outou, ‘Āfai ‘ua ‘iā te ‘outou le fa‘atuatua, ma ‘outou lē māsalosalo, ‘ona faia lea e ‘outou e lē na o le mea ‘ua faia i le mati, ‘ae ‘āfai tou te fai atu i le mauga lenei, ‘‘Ia si‘itia oe, ma lafoina i le sami,’ ‘ona faia lava lea.
22. O mea uma fo‘i tou te ole mai ai i le tatalo ‘ua i ai le fa‘atuatua, e maua lava e ‘outou.”
23. ‘Ua ulufale atu o Iesu i le malumalu, ‘ua a‘oa‘o, ‘ona ō mai a lea ‘iā te ia o ositaulaga sili ma toeaina o le nu‘u, ‘ua fa‘apea mai, “O le a ‘ea le pule ‘e te fai ai na mea? O ai fo‘i sa na tu‘uina atu ‘iā te oe lenei pule?”
24. ‘Ona tali atu lea o Iesu, ‘ua fa‘apea atu ‘iā te i latou, “‘Ou te fesili atu fo‘i a‘u ‘iā te ‘outou se ‘upu e tasi; ‘āfai tou te ta‘u mai ‘iā te a‘u, ‘ona ‘ou ta‘uina atu lea le pule ‘ou te fai ai nei mea.
25. Se papatisoga ‘ea a Ioane mai fea? Mai le lagi ‘ea, pe mai tagata?”‘Ona latou felafolafoa‘i ai lea, ‘ua fa‘apea ane, “‘Āfai tatou te fai atu, ‘Mai le lagi’ ‘ona fai mai ai lea o ia ‘iā te i tatou, ‘Se a fo‘i le mea tou te lē talitonu ai ‘iā te ia?’
26. ‘Āfai fo‘i tatou te fai atu, ‘Mai tagata;’ ‘ua tatou fefefe i le motu o tagata auā o la latou lea tāofi uma ‘iā Ioane, o le perofeta o ia.”
27. ‘Ona latou tali mai ai lea ‘iā Iesu, ‘ua fa‘apea mai, “Matou te lē iloa”‘Ona fetalai atu ai lea o ia ‘iā te i latou, “‘Ou te lē ta‘u atu fo‘i ‘iā te ‘outou le pule ‘ou te fai ai nei mea.
28. “O le a so ‘outou manatu? O le tasi tagata e to‘alua ona atali‘i ‘ua alu atu o ia i le ulumatua, ‘ua fa‘apea atu, ‘Sole, ‘inā alu ia i le asō, se‘i e galue i la‘u tōvine’
29. ‘Ona tali mai ai lea o ia, ‘ua fa‘apea mai, ‘‘Ou te musu’; ‘ae mulimuli ane ‘ua salamō o ia, ‘ua alu.
30. ‘Ona alu atu ai lea o le tamā i le tasi, ‘ua fa‘apea fo‘i lana ‘upu ‘iā te ia. ‘Ona tali mai ai lea o ia, ‘ua fa‘apea mai, ‘Le ali‘i e, ‘ou te alu’; a ‘ua lē alu lava o ia.
31. O ai ‘ea, ‘ia lā‘ua na faia le loto o lo la tamā?” ‘Ona latou fa‘apea mai ai lea ‘iā te ia, “O le ulumatua.”‘Ona fa‘apea atu lea o Iesu ‘iā te i latou, “E moni, ‘ou te fai atu ‘iā te ‘outou, E muamua atu tagata ao lafoga ma fafine talitane ‘iā te ‘outou i le mālō o le Atua.
32. Auā na sau Ioane ‘iā te ‘outou i le ala o le amiotonu, ‘ae tou te le‘i talitonu ‘iā te ia; a ‘ua talitonu ‘iā te ia tagata ao lafoga ma fafine talitane. Sa ‘outou iloa fo‘i ia mea ‘ae tou te le‘i salamō ai lava ma talitonu ‘iā te ia.
33. “‘Ia ‘outou fa‘alogo mai i le tasi fa‘ata‘oto, o le tasi matai na fai le tōvine, ‘ua ia lotoāina i le pā, ‘ua ‘eli ai le soligāvine, ‘ua faia fo‘i le ‘olo, ‘ua tu‘uina atu e ia i ē galulue i vine, ‘ona alu malaga ai lea o ia i le nu‘u ‘ese.
34. ‘Ua latalata ona po e matua ai le fuata, ‘ona ‘a‘auina atu ai lea e ia o ana ‘au‘auna i ē galulue i vine, ‘ia maua ona fua.
35. ‘Ona pupu‘e ai lea o ē galulue i vine i ana ‘au‘auna, ‘ua latou sasa i le tasi ma fasioti le isi ma fetogi le tasi i ma‘a.
36. ‘Ona toe ‘a‘auina atu ai lea e ia o isi ‘au‘auna e sili ‘ona to‘atele i ē na muamua, a ‘ua fa‘apea lava a latou amio ‘iā te i latou.
37. ‘Ae mulimuli ane ‘ua i ‘auina atu ai e ia o lona atali‘i ‘iā te i latou, ‘ua fa‘apea ane, ‘Latou te āva mai i lo‘u atali‘i.’
38. A o ia tagata galulue i vine, ‘ua iloa atu lona atali‘i, ‘ona latou fetautalatala‘i ai lea, ‘O le suli lenei; ō mai ia, tatou te fasiotia o ia, ‘ae fai mo i tatou lona fanua.’
39. ‘Ona latou pu‘e ai lea ‘iā te ia, ‘ua lafo ‘iā te ia i tua o le tōvine, ‘ona latou fasiotia ai lea.
40. O lenei, pe a sau le ali‘i e ona le tōvine, se a se mea na te faia i tagata galulue i vine?”
41. ‘Ona latou fai mai ai lea ‘iā te ia, “E matuā fa‘aumatia e ia na tagata amio leaga; ‘ona tu‘uina atu ai lea e ia o le tōvine i nisi tagata galulue i vine, latou te avatu ‘iā te ia ona fua i ona tausaga.”
42. ‘Ua fetalai atu Iesu ‘iā te i latou, “Tou te le‘i faitaulia lava ‘ea i Tusi: ‘O le ma‘a na lafoa‘iina e tufuga fai fale,‘ua fai lea ma ma‘a tulimanu aupitoaluga;o le mea lea na faia e le Ali‘i,tatou te ofo ai pe a va‘ava‘ai atu i ai?’
43. O le mea lea ‘ou te fai atu ai ‘iā te ‘outou, E ‘ave‘esea le mālō o le Atua ‘iā te ‘outou, ‘ae tu‘uina atu i se nu‘u e ‘aumai ai ona fua.
44. O sē e pa‘ū i luga o lea ma‘a, e gaugau ai o ia; a o se tasi e pa‘ū ifo i ai le ma‘a, e nutipalaina ai o ia.”
45. ‘Ua fa‘alogo le ‘au ositaulaga sili ma faresaio i ana fa‘ata‘oto, ‘ona latou iloa ai lea, o i latou lava ia na ia fetalai mai ai.
46. ‘Ona latou fia pu‘e ai lea ‘iā te ia, a ‘ua latou fefefe i le motu o tagata; auā o la latou tāofi, o le perofeta o ia.