1. ‘Ua toe ulu atu o ia i le sunako, sa i ai fo‘i le tagata na gase lona lima.
2. ‘Ona latou lamalama lea ‘iā te ia, pe na te fa‘amālōlōina o ia i le sapati, ‘ina ‘ia latou molia o ia.
3. ‘Ua fetalai atu o ia i le tagata ‘ua gase lona lima, “‘Inā tula‘i mai ia i totonu.”
4. ‘Ona fetalai atu lea o ia ‘iā te i latou, “Pe sā ‘ea le mea e lelei e tatau ‘ona fai i le sapati, po o le agaleaga; o le fa‘aola po o le fasioti?”A ‘ua latou fa‘alologo.
5. ‘Ua ia silasila solo ‘iā te i latou ma le to‘asā, ‘ina ‘ua tigā o lona finagalo, auā o latou loto ‘ua ma‘a‘a, ‘ona fetalai atu lea o ia i le tagata, “‘Inā fa‘aloaloa ia lou lima.” ‘Ona fa‘aloaloa ai lea e ia, ‘ona toe lelei ai lea o lona lima, ‘ua pei o le tasi.
6. ‘Ona ō lea i fafo o le ‘au faresaio, ‘ua taupulepule loa i latou ma le ‘au Herotiano, ‘ina ‘ia latou fasioti ‘iā te ia.
7. A o Iesu, ‘ua maliu atu o ia ma ona so‘o e latalata ane i le vai; ‘ua mulimuli atu fo‘i ‘iā te ia le motu o tagata e to‘atele mai Kalilaia ma Iutaia,
8. ma Ierusalema, ‘atoa ma Itumaia, ma tala atu o Ioritana, ‘atoa ma i latou mai le itū o Turo ma Saitonu, e to‘atele lava ‘ua ō mai ‘iā te ia, ‘ina ‘ua latou fa‘alogo i ia mea sa faia e ia.
9. ‘Ua fetalai atu fo‘i o ia i ona so‘o ‘ia fa‘atali mai se va‘a la‘itiiti ‘iā te ia, auā o le motu o tagata ‘ina ne‘i fetaomi mai i latou ‘iā te ia.
10. Auā e to‘atele na ia fa‘amālōlōina, o lea ‘ua fetaomi mai ai ‘iā te ia o ē na maua i ma‘i tigā, ‘ina ‘ia latou papa‘i mai ‘iā te ia.
11. O agaga leaga fo‘i, ‘ua latou iloa mai o ia, ‘ona fa‘apa‘u‘ū lea o i latou i ona luma, ma latou ‘alalaga, ‘ua fa‘apea mai, “O oe lava o le Alo o le Atua.”
12. A ‘ua matuā vavao atu o ia ‘iā te i latou, ‘aua ne‘i latou fa‘aalia o ia.
13. ‘Ua maliu a‘e o ia i le mauga, ‘ona vala‘au atu lea o ia i ē ‘ua ia finagalo i ai; ‘ona latou ō mai lea ‘iā te ia.
14. ‘Ona tofia lea e ia le to‘atinoagafulu ma le to‘alua, ‘ina ‘ia latou fa‘atasi ma ia, ‘ina ‘ia ‘a‘auina atu fo‘i i latou e tala‘i le tala lelei;
15. ‘ina ‘ia tu‘uina atu fo‘i le pule ‘iā te i latou, latou te fa‘amālōlō ai ma‘i ma tutuli ai temoni.
16. ‘Ua ia tofia le to‘atinoagafulu ma le to‘alua; o Simona lē na ia fa‘aigoa ‘iā Peteru;
17. ma Iakopo le atali‘i o Sepetaio, ma Ioane le uso o Iakopo; ‘ua ia fa‘aigoa fo‘i ‘iā te i lā‘ua o Poaneki, o lona uiga, o tagata faititili;
18. ma Aneterea ma Filipo ma Patolomaio ma Mataio ma Toma ma Iakopo le atali‘i o Alefaio ma Tataio ma Simona o le Kanana,
19. ma Iuta le Sekara, o lē na fa‘alataina o ia.
20. ‘Ua ō atu i latou i le fale; ‘ona toe potopoto mai ai lea o le motu o tagata ‘ua lē mafai ai i latou ‘ona ‘a‘ai.
21. ‘Ua fa‘alogo ai lona ‘āiga, ‘ona latou ō atu ai lea e pu‘e ‘iā te ia; auā na latou fa‘apea ane, “‘Ua valea o ia.”
22. A o le ‘au tusi‘upu o ē na ō ifo mai Ierusalema, ‘ua fa‘apea ane i latou, “O ‘iā te ia Pelesepulo, o le ali‘i fo‘i o temoni, e tuli ai e ia o temoni.”
23. ‘Ua vala‘au atu o ia ‘iā te i latou, ‘ona fetalai atu lea ‘iā te i latou i fa‘ata‘oto, “E mafai fa‘apefea e Satani ‘ona tulia o Satani?
24. ‘Āfai fo‘i e fevaevaea‘i se mālō, e lē mafai ‘ona tumau o lenā mālō.
25. ‘Āfai fo‘i e fevaevaea‘i se ‘āiga, e lē mafai ‘ona tumau o lenā ‘āiga.
26. ‘Āfai fo‘i e tete‘e atu e Satani ‘iā te ia lava, ma fevaevaea‘i o ia, ‘ona lē mafai ai lea ‘ona tumau o ia, ‘ae o‘o i lona i‘uga.
27. E leai sē na te mafaia ‘ona ulu atu i le fale o le tagata malosi, ma ‘ave ana mea, se‘ia mua‘i noanoatia le tagata malosi, i le ‘ave ai lea o mea o lona fale.
28. “E moni, ‘ou te fai atu ‘iā te ‘outou, E fa‘amāgaloina agasala uma a tagata ‘atoa ma ‘upu fāifai uma latou te fāifai ai;
29. a o lē fāifai i le Agaga Pa‘ia, e lē fa‘amāgaloina o ia, a lē tu a lē tu lava; ‘ae peita‘i e nofo sala o ia i le agasala e fa‘avavau”
30. auā na latou fai mai, “O ‘iā te ia le agaga leaga.”
31. ‘Ona ō mai ai lea o lona tinā ma ona uso, ‘ua tutū i fafo ma fe‘au atu ‘iā te ia, ma vala‘au atu ‘iā te ia.
32. ‘Ua nonofo vagavagai ‘iā te ia le motu o tagata, ‘ua latou fai ane fo‘i ‘iā te ia, “Fa‘auta, o lou tinā ma ou uso o i fafō, o sā‘ili ‘iā te oe.”
33. ‘Ona tali atu lea o ia ‘iā te i latou, “O ai ‘ea lo‘u tinā? O ai fo‘i o‘u uso?”
34. ‘Ona silasila solo ai lea o ia i ē nonofo vagavagai ‘iā te ia, ‘ua fa‘apea atu, “Fa‘auta i lo‘u tinā ma o‘u uso.
35. auā o lē faia le finagalo o le Atua o lo‘u uso lea ma lo‘u tuafafine ma lo‘u tinā.”