1. O le amataga o le tala lelei ‘iā Iesu Keriso o le Alo o le Atua.
2. E pei ‘ona tusia i le tusi a Isaia, “Fa‘auta, ‘ou te ‘auina atu la‘u sāvali e muamua atu i ou luma,na te teuteua lou ala.
3. O le leo o lē ‘ua ‘alaga i le vao, ‘‘Inā teuteu ia e ‘outou le ala o le Ali‘i,ia fa‘asasa‘o ona ala.’”
4. ‘Ua o‘o mai Ioane le papatiso i le vao, ma tala‘i atu ai le papatisoga o le salamō ‘ina ‘ia fa‘amāgaloina agasala.
5. ‘Ua ō atu fo‘i le nu‘u uma o Iutaia ‘iā te ia, ‘atoa ma tagata o Ierusalema, mā ‘ua papatisoina i latou uma e ia i le vaitafe o Ioritana, ‘ua ta‘u atu a latou agasala.
6. ‘Ua ‘ofu Ioane i le fulufulu kamela, ma le fusi pa‘u i lona sulugātiti; a o ana mea e ‘ai o sē akerise ma le meli vao ia.
7. ‘Ua tala‘i atu o ia, ‘ua fa‘apea atu, “O lo‘o mulimuli mai le tasi, e silisili o ia ‘iā te a‘u, ‘ou te lē aogā ‘ona punou ifo ma tatala le nonoa o ona se‘e vae.
8. O a‘u nei, ‘ou te papatiso atu ‘iā te ‘outou i le vai; a o ia, na te papatisoina ‘outou i le Agaga Pa‘ia.”
9. O ona pō ia ‘ua maliu atu ai Iesu mai Nasareta o i Kalilaia, ‘ua papatisoina fo‘i o ia e Ioane i Ioritana.
10. ‘Ua maliu a‘e o ia nai le vai, ‘ona iloa loa lea e ia o le lagi ‘ua māsae ma le Agaga ‘ua afio ifo i ona luga, e peiseaī se lupe.
11. ‘Ua o‘o mai fo‘i le si‘ufofoga mai le lagi, ‘ua fa‘apea mai, “O lo‘u Atali‘i pele oe, ‘ou te fiafia ‘iā te oe.”
12. ‘Ona ‘ave ai lea o ia e le Agaga i le vao.
13. Sa i ai fo‘i o ia i le vao i pō e fagafulu, ‘ua fa‘aosoosoina e Satani; sa i ai ma manu fe‘ai, sa ‘au‘auna fo‘i agelu ‘iā te ia.
14. ‘Ua tu‘uina atu Ioane i le fale puipui, ‘ona maliu atu lea o Iesu i Kalilaia, ‘ua tala‘i atu ai le tala lelei i le mālō o le Atua, ‘ua fa‘apea atu,
15. “‘Ua o‘o mai ona pō, ‘ua latalata mai le mālō o le Atua; ‘inā salamō ia ma fa‘atuatua i le tala lelei.”
16. ‘Ua savali ane o ia e latalata ane i le vai o Kalilaia, ‘ona silafia lea e ia o Simona ma Aneterea lona uso, ‘ua la lafo le ‘upega i le vai; auā o tagata fai faiva i lā‘ua.
17. ‘Ona fetalai atu lea o Iesu ‘iā te i lā‘ua, “‘Inā mulimuli mai ia ‘iā te a‘u, ‘ou te faia ‘oulua ma fai faiva i tagata.”
18. ‘Ona la tu‘ua lea o la ‘upega, ‘ae mulimuli atu ‘iā te ia.
19. ‘Ua tuana‘i atu teisi lea mea, ‘ona silafia lea e ia o Iakopo le atali‘i o Sepetaio ma Ioane lona uso, ‘ua i le va‘a, ‘ua fai māsae o latou ‘upega.
20. ‘Ua vala‘au atu lea o ia ‘iā te i lā‘ua ‘ona lā tu‘ua lea o lo la tamā o Sepetaio i le va‘a fa‘atasi ma ‘au‘auna, a ‘ua la mulimuli atu ‘iā te ia.
21. ‘Ua ō fo‘i i latou i Kapanaumi; ‘ona maliu atu lea o ia i le sunako i le sapati ‘ua a‘oa‘o ai.
22. ‘Ua matuā ofo fo‘i i latou i lana a‘oa‘oga; auā ‘ua ia a‘oa‘o ‘iā te i latou e fa‘apei o sē ‘ua i ai le pule, ‘ae lē pei o le ‘au tusi‘upu.
23. Sa i ai fo‘i i lo latou sunako le tagata ‘ua i ai le agaga leaga; ‘ua ‘alaga fo‘i o ia,
24. ‘ua fa‘apea mai, “Auē, Iesu e, le Nasareta! Se a se mea ‘e te mana‘o mai ai ‘iā te i matou? ‘Ua e maliu mai ‘ea ‘ia fa‘aleaga i matou? ‘Ua ‘ou iloa o oe o le Pa‘ia oe o le Atua.”
25. ‘Ona vavao atu lea o Iesu ‘iā te ia, ‘ua fa‘apea atu, “‘Inā fa‘alologo ia ma e alu i fafo mai ‘iā te ia.”
26. ‘Ona fa‘ata‘afiti lea o le agaga leaga ‘iā te ia, ‘ua ‘alaga fo‘i ma le leo tele, ‘ona alu lea o ia i fafo mai ‘iā te ia.
27. ‘Ona taufaiofo ai lea o i latou uma ‘ua latou fesili ai le tasi i le tasi, ‘ua fa‘apea, “Pe se a lenei? Se a fo‘i lenei a‘oa‘oga fou? Auā ‘ua pule o ia i agaga leaga ma fetalai atu i ai, ‘ona latou fa‘alogo lava lea ‘iā te ia.”
28. ‘Ona logo atu lea o le tala ‘iā te ia i le nu‘u uma o Kalilaia.
29. ‘Ua latou ulufafo i le sunako, ‘ona ō atu loa lea i le fale o Simona ma Aneterea, ‘ua ō fa‘atasi ma Iakopo ma Ioane.
30. Sa ta‘oto ai fo‘i le tinā o le avā a Simona i le ma‘i vevela; ‘ona latou ta‘uina atu lea ‘iā Iesu e uiga mo ia.
31. ‘Ona sōsō atu lea o Iesu ‘iā te ia, ‘ua tago ifo i lona lima, ‘ua fa‘atū ‘iā te ia i luga; ‘ona mavae lea o lona ma‘i vevela, ‘ona ‘au‘auna lea o ia ‘iā te i latou.
32. ‘Ua o‘o i le afiafi i le goto o le lā, ‘ona latou ‘aumai lea ‘iā te ia o ē mama‘i uma, ‘atoa ma ē ‘ua uluitinoina e temoni.
33. ‘Ua potopoto uma ane fo‘i le ‘a‘ai i le faitoto‘a.
34. ‘Ona ia fa‘amālōlōina lea o tagata e to‘atele na mama‘i i ma‘i ‘ese‘ese, ‘ua ia tulia fo‘i temoni e to‘atele, ‘ua ia lē tu‘u atu fo‘i i temoni e tautala, auā ‘ua latou iloa o ia.
35. O le taeao ‘ua ala pō ai o ia, ‘ona ulufafo lea o ia ma maliu atu i le mea tu‘ufua ma tatalo ai.
36. ‘Ua mulimuli atu fo‘i ‘ia te ia o Simona ma i latou sa ‘iā te ia.
37. ‘Ua latou maua o ia, ‘ona latou fai mai lea ‘iā te ia, “O lo‘o sā‘ili tagata uma ‘iā te oe.”
38. ‘Ona fetalai atu lea o ia ‘iā te i latou, “‘Inā tatou ō atu ia i ‘a‘ai e latalata mai, ‘ia ‘ou tala‘i atu i ai le tala lelei, auā o le mea lea na ‘ou sau ai.”
39. ‘Ua ia tāla‘i fo‘i i o latou sunako i Kalilaia uma ma tutuli temoni.
40. ‘Ua sau le lepela ‘iā Iesu, ‘ua ‘ai‘oi ‘iā te ia ma to‘otuli ‘iā te ia, ma ‘ua fa‘apea mai, “‘Āfai ‘ua e finagalo i ai, ‘e te mafaia ‘ona fa‘amamā ‘iā te a‘u.”
41. ‘Ona mutimutivale lea o le alofa o Iesu ‘iā te ia, ‘ua ‘a‘apa atu lona ‘a‘ao, ‘ua pa‘i atu ‘iā te ia ma fetalai atu ‘iā te ia, “‘Ou te loto i ai, ‘inā mamā ia oe.”
42. ‘Ua fetalai atu o ia, ‘ona te‘a lea o le ma‘i lepela ‘iā te ia, ‘ona mamā ai lea o ia.
43. ‘Ona matuā vavao atu lea o Iesu ‘iā te ia ma tu‘uina atu loa ‘iā te ia e alu.
44. ‘Ua fa‘apea atu fo‘i ‘iā te ia, “‘Ia oe, ne‘i e ta‘u atu sina tala i se tasi; a ‘ia e alu, ma fa‘aali oe i le ositaulaga; ma avane o mea na poloa‘i ai Mose mo lou fa‘amamāina, e fai ma fa‘ailoga ‘iā te i latou.”
45. A ‘ua alu atu o ia, ‘ona matuā tala‘i atu lea ma fa‘asalalau le tala, o lea e le‘i toe mafai ai e ia ‘ona maliu fa‘aali i le ‘a‘ai; a ‘ua nofonofo i mea tu‘ufua; ‘ua latou ō ane fo‘i ‘iā te ia mai itū uma.