Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16

Feagaiga Tuai

Feagaiga Fou

Mareko 4 O LE TUSI PA'IA - Ekalesia Katoliko Roma (RSCB)

O le Fa‘ata‘oto i le Tagata Lūlū Saito

1. ‘Ua toe amata o ia ‘ona a‘oa‘o atu e latalata i le vai, ‘ua potopoto mai ai ‘iā te ia le motu o tagata e to‘atele; o le mea lea na maliu a‘e ai o ia i le va‘a, ‘ua nofo ai, a o le motu o tagata uma sa i le ‘auvai i latou.

2. E tele mea ‘ua ia a‘oa‘o atu ai ‘iā te i latou i fa‘ata‘oto, ‘ua fa‘apea atu fo‘i o ia ‘ina ‘ua a‘oa‘o atu:

3. “‘Inā fa‘alogologo mai ia ‘outou; fa‘auta, o le tagata lūlū saito, ‘ua alu atu o ia e lūlū ai saito.

4. ‘Ua ia lūlū saito, ‘ona pa‘ū lea o isi i le auala, ‘ona ō ane lea o manu felelei, ‘ua ‘a‘ai ai.

5. ‘Ua pa‘ū fo‘i isi i le mea papa, e itiiti lava le ‘ele‘ele sa i ai; ‘ae lē ola lelei, auā o le ‘ele‘ele e itiiti.

6. ‘Ua alu a‘e le lā, ‘ua velasia ai, ‘ona magumagu ai lea, ‘ona ‘ua leai ni a‘a.

7. ‘Ua pa‘ū fo‘i isi i le vao tuitui, ‘ua tutupu a‘e le vao tuitui, ‘ona fētina‘iina ai lea, e le‘i fua mai lava.

8. A ‘ua pa‘ū isi i le ‘ele‘ele lelei, ‘ua tutupu a‘e, ma tupu tele, ‘ua fua mai, e ta‘itolu sefulu i nisi, o ta‘iono sefulu i nisi, ‘ae ta‘iselau i nisi.”

9. ‘Ua ia fetalai atu fo‘i ‘iā te i latou, “O lē ‘ua i ai taliga e fa‘alogo ai, ‘inā fa‘alogo mai ia o ia.”

O le Tāua o le Fa‘ata‘oto

10. ‘Ua to‘atasi o ia, ‘ona fesili ane lea ‘iā te ia o ē ‘ua fa‘atasi ma ia, ‘atoa ma le to‘atinoagafulu ma le to‘alua i le fa‘ata‘oto.

11. ‘Ona fetalai atu lea o ia ‘iā te i latou, “‘Ua foa‘iina atu ‘iā te ‘outou ‘ina ‘ia ‘outou iloa mea lilo, o le mālō o le Atua; a o i latou o i tua, ‘ua fai atu mea uma ‘iā te i latou i fa‘ata‘oto;

12. ‘ina ‘ia‘latou lē iloai lo latou matuā va‘ai;‘ina ‘ia latou lē lagona fo‘i,i lo latou matuā fa‘alogologo;‘ina ne‘i liliuina i latou,ma fa‘amāgaloina a latou agasala.’”

O le Fa‘amalamalamaga o le Fa‘ata‘oto o le Lūlū Saito

13. ‘Ua ia fetalai atu fo‘i ‘iā te i latou, “Tou te lē iloa ‘ea lenei fa‘ata‘oto? Pe fa‘apefea fo‘i ‘ona ‘outou iloa o fa‘ata‘oto uma?

14. O lē lūlū saito, e lūlū ia i le ‘upu.

15. O i latou ia i le auala e lūlūina ai le ‘upu; a latou fa‘alogo ai, ‘ona alu ane loa lea o Satani, ma ‘ave‘eseina le ‘upu na lūlūina i o latou loto.

16. E fa‘apea fo‘i i latou na lūlūina i le mea papa, o i latou ia ‘ua fa‘alogo i le ‘upu, ‘ona talia loa lea ma le fiafia.

17. ‘Ae peita‘i ‘ua leai ni o latou a‘a, ‘ua fa‘alētumau i latou; pe a tupu le puapuagā, po o le sauā ‘ona o le ‘upu, ‘ona latou tausuai loa lea.

18. O i latou fo‘i sa lūlūina i le vao tuitui, o i latou ia o ē na fa‘alogo i le ‘upu,

19. a o le loto popole i mea o lenei lalolagi, ma le pepelo o le ‘oa, ma le tu‘inanau i nisi mea, ‘ua o‘o atu i totonu o le loto, ‘ua fētina‘iina ai le ‘upu, ‘ona lē fua mai lava lea.

20. A o i latou na lūlūina i le ‘ele‘ele lelei: o i latou ia o ē ‘ua fa‘alogo i le ‘upu, ma latou talia, ma fua mai e ta‘itolugafulu i nisi, e ta‘iono sefulu i nisi, e ta‘iselau fo‘i i nisi.”

O le Molī i Lalo o le Mea e Fua ai Saito

21. ‘Ua fetalai atu fo‘i o ia ‘iā te i latou, “E ‘aumai ‘ea se molī ‘ina ‘ia tu‘uina i lalo o le mea e fua ai saito, po o i lalo o le moega? E lē fa‘atūina ‘ea i luga o le tu‘ugāmolī?

22. Auā e leai se mea e lilo e lē fa‘aalia; e leai fo‘i se mea e natia, ‘ae i‘u ‘ina fa‘ailoa lava.

23. O lē ‘ua i ai taliga e fa‘alogo ai, ‘inā fa‘alogo mai ia o ia.”

24. ‘Ua ia fetalai atu fo‘i ‘iā te i latou, “‘Ia ‘outou i mea tou te fa‘alogo i ai; o le fua tou te fua atu ai, e toe fuaina mai ai ‘iā te ‘outou; o ‘outou o ē fa‘alogologo, e fa‘aopoopoina ‘iā te ‘outou.

25. Auā o lē ‘ua i ai mea, e avatua pea ‘iā te ia; a o lē ‘ua leai ni ana mea, e ‘ave‘eseina le mea ‘ua ‘iā te ia.”

O le Fa‘ata‘oto i Saito e Tutupu A‘e

26. ‘Ua ia fetalai atu fo‘i, “O le mālō o le Atua ‘ua fa‘apei o le tagata ‘ua na lūlūina saito i le ‘ele‘ele.

27. ‘Ua moe fo‘i o ia i le po, ma ala i le ao; a ‘ua totogo a‘e le saito, ma tutupu, ‘ua na lē iloa pe na fa‘apefea ia;

28. auā ‘ua tupu fua ia i le ‘ele‘ele; e muamua ona lau, ‘ona o‘o lea i lona fuga mai, mulimuli ane fo‘i ‘ua i ai saito matua.

29. A afu le saito, ‘ona selesele loa lea, auā ‘ua o‘o i ona po e selesele ai.”

O le Fa‘ata‘oto i le Fua o le Sinapi

30. ‘Ua fetalai atu fo‘i o ia, “Se a se mea tatou te fa‘atusa i ai le mālō o le Atua? Se a fo‘i se fa‘ata‘oto tatou te fa‘atusaina ai?

31. E tusa ia ma le fua o le sinapi; a totōina i le ‘ele‘ele, e sili ‘ona la‘itiiti i fua uma e tutupu i le ‘ele‘ele.

32. Pe a totōina fo‘i, ‘ona tupu a‘e lea, ‘ua ‘avea fo‘i ma la‘au tele, ‘ua sili i la‘au uma e afu, ‘ua fai fo‘i ‘ona la tetele, e mafai ai e manu felelei ‘ona momoe i lalo o lona paolo.”

33. ‘Ua ia fetalai atu fo‘i le ‘upu ‘iā te i latou i fa‘ata‘oto fa‘apenā e tele, e fa‘atatau i mea ‘ua mafai ‘ona latou lagona.

34. ‘Ua na o fa‘ata‘oto na ia fetalai atu ai ‘iā te i latou; ‘ae peita‘i na ia fa‘amatalatalaina mea uma i ona so‘o i tua.

‘Ua Vavao e Iesu le Matagi

35. O lea lava aso, ‘ua o‘o i le afiafi, ‘ona fetalai atu lea o ia ‘iā te i latou, “‘Inā tatou ō atu ia i le tasi itū.”

36. ‘Ua latou tu‘ua le motu o tagata, ‘ua i le va‘a o ia, ‘ona latou ‘avea loa lea o ia; ‘ua fa‘atasi fo‘i ma ia isi va‘a iti.

37. ‘Ona tō mai lea o le afā, o le matagi tele lava; ‘ona fati mai ai lea o peau i totonu o le va‘a, ‘ua tumu ai.

38. A o ia, sa i le taumuli, ‘ua tofā i le aluga; ‘ona latou, fafagu lea ‘iā te ia, ma fai mai ‘iā te ia, “Le a‘oa‘o e, ‘e te lē manatu mai ‘ea ‘iā te i matou a fano?”

39. ‘Ona tula‘i lea o ia ma na vavao atu i le matagi, ‘ua fetalai atu fo‘i i le vai, “Fa‘alologo ia, ‘inā malū ia.” ‘Ona mate lea o le matagi, i le ‘ua matuā malū.

40. ‘Ona fetalai atu lea o ia ‘iā te i latou, “Se a le mea tou te fefefe ai fa‘apea? Se a le mea tou te lē fa‘atuatua mai ai?”

41. ‘Ona matuā matata‘u lava lea o i latou ma fetautalatala‘i i latou, “Po o ai lava lenei, ‘ina ‘ua usiusita‘i lava le matagi ma le vai ‘iā te ia?”