1. ‘Ua potopoto ane ‘iā Iesu le ‘au faresaio, ma nisi o le ‘au tusi‘upu, o ē ‘ua ō mai mai Ierusalema.
2. ‘Ua latou iloa nisi o ona so‘o ‘ua ‘a‘ai i latou ma o latou lima ‘ua leaga, o lona uiga, ‘ua lē fafanoina.
3. Auā o le ‘au faresaio, ‘atoa ma Iutaia uma e lē ‘a‘ai i latou ‘ina se‘ia uma ‘ona fafano lelei o latou lima; o lo‘o tāofi i latou i ‘uputu‘u a ē anamua.
4. A ō mai fo‘i i latou mai le malae, pe ‘āfai latou te lē mulumulu, ‘ua lē ‘a‘ai lava; o isi fo‘i mea e tele ‘ua latou talia, ma tāofi i ai, o le fufuluina o ipu e inu ai, ma ipu, ma ipu ‘apamemea.
5. ‘Ona fesili ane lea o le ‘au faresaio ma le ‘au tusi‘upu ‘iā te ia, “Se a le mea e lē usiusita‘i ai ou so‘o i ‘uputu‘u a ē anamua, a ‘ua latou ‘a‘ai ma o latou lima e lē fafanoina?”
6. ‘Ona tali atu lea o ia ‘iā te i latou, ‘ua fa‘apea atu, “‘Ua tatau lelei le valo‘aga a Isaia ‘iā te ‘outou tagata fa‘afiaamiotonu, e pei ‘ona tusia,‘‘Ua vivi‘i mai lenei nu‘u i o latou laugutu,a o latou loto ‘ua taumamao ‘iā te a‘u.
7. E tapua‘i fua mai i latou ‘iā te a‘u,i lo latou fai ma matā‘upu o poloa‘iga a tagata.’
8. Auā ‘ua ‘outou tu‘ua le poloa‘iga a le Atua, ‘ae tāofi i ‘uputu‘u a tagata.”
9. ‘Ua fetalai atu fo‘i o ia ‘iā te i latou, “‘Ua lelei tele lo ‘outou fa‘alēaogāina le poloa‘iga a le Atua, ‘ina ‘ia ‘outou tāofi a ‘outou ‘uputu‘u.
10. Auā ‘ua fai mai Mose, ‘‘Ia e āva i lou tama ma lou tinā;’ i le ma lea, ‘O lē fai ‘upu leaga i le tamā po o le tinā, ‘ia fasiotia lava ia.’
11. A ‘ua ‘outou fai mai, ‘āfai e fai ane se tagata i le tamā po o le tinā, ‘‘Ai se mea ‘ua ‘iā te a‘u e aogā ‘iā te oe ‘ua kopano lea,’ o lona uiga, o le taulaga i le Atua.
12. ‘Ona ‘outou lē toe tu‘uina atu lea ‘iā te ia, ‘ina ‘ia faia se mea mā lona tamā po o lona tinā.
13. ‘Ua ‘outou fa‘alēaogāina ai le afioga a le Atua ‘iā ‘outou ‘uputu‘u, ‘ua ‘outou tu‘uina mai. O isi fo‘i mea fa‘apenā e tele ‘ua ‘outou faia.”
14. ‘Ona vala‘au atu lea o Iesu i le motu o tagata uma, ‘ua fetalai atu ‘iā te i latou, “Fa‘alogo uma, mai ia ‘outou ‘iā te a‘u, ma ‘ia ‘outou lagona.
15. E leai se mea o lo‘o i fafo o le tagata e alu ane i totonu ‘iā te ia e mafai ‘ona leaga ai o ia; a o mea e sau mai totonu ‘iā te ia, o mea ia e leaga ai le tagata.
16. O lē ‘ua i ai taliga e fa‘alogo ai, ‘inā fa‘alogo mai ia o ia.”
17. ‘Ua ulufale atu o ia i le fale, ‘ua tu‘ua le motu o tagata, ‘ona fesili ane lea o ona so‘o ‘iā te ia i le uiga o le fa‘ata‘oto.
18. ‘Ona fetalai atu lea o ia ‘iā te i latou, “E fa‘apea fo‘i ‘ea ‘outou ‘ona vālelea? Tou te lē iloa ‘ea, o mea i fafo uma e alu ane i totonu o le tagata e lē mafai ‘ona leaga ai o ia?
19. Auā e lē o‘o ia mea i lona loto, a o le manava; e o‘o ane fo‘i i fafo i le maliuga.” O lea ‘ua ta‘umamāina ai e ia o mea ‘ai uma.
20. ‘Ua fetalai atu fo‘i o ia, “O le mea e sau mai totonu o le tagata, o le mea lea e leaga ai le tagata.
21. Auā e alu a‘e mai le loto o le tagata o le manatu leaga, o le faita‘aga, o le gaoi, o le fasioti tagata, o le mulilua,
22. o le manumanu, o le amio leaga, o le pepelo, o le mataitu, o le matau‘a, o ‘upu leaga, o le fa‘amaualuga, o le lē mafaufau.
23. O ia mea leaga uma e sau mai totonu, ma e leaga ai le tagata.”
24. ‘Ua tula‘i o Iesu nai lea mea, ‘ona maliu ane lea i le lau‘ele‘ele o Turo ma Saitonu; ‘ua ulu atu o ia i le fale, ‘ua finagalo fo‘i ‘ina ‘ia lē iloa o ia e se isi; ‘ae lē mafai ‘ona fa‘aliloina o ia.
25. Auā o le fafine ‘ua i lana tama teine le agaga leaga, ‘ua na fa‘alogo i le tala ‘iā Iesu, ‘ona sau ai lea o ia ‘iā Iesu, ‘ua fa‘apa‘ū mai i ona vae;
26. O le fafine Eleni ia, na fānau i Suria Foinie, ‘ua ia fa‘atoga ‘iā te ia, ‘ina ‘ia tulia i fafo le temoni i lana tama.
27. A ‘ua fetalai atu Iesu ‘iā te ia, “Se‘ia lua‘i mā‘o‘ona le fānau auā e lē tatau ‘ona ‘ave mea e ‘ai a le fānau ma lafo i ta‘ifau.”
28. ‘Ona tali mai lea o ia ‘iā Iesu, ‘ua fa‘apea mai, “Le Ali‘i e, e moni a oe; ‘ae ui i lea o ta‘ifau i lalo o le la‘o‘ai e ‘a‘ai i latou i toe ‘aiga a fānau.”
29. ‘Ona fetalai atu ai lea o Iesu ‘iā te ia, “‘Inā alu ia ‘ona o lau ‘upu lenā; ‘ua te‘a le temoni sa i totonu i lau tama teine.”
30. ‘Ona alu atu lea o ia i lona fale, ‘ua maua ai lana tama teine o ta‘oto i luga o le moega, a ‘ua te‘a le temoni.
31. ‘Ona toe tu‘ua lea e Iesu o le itū o Turo ma Saitonu, ‘ua o‘o atu i le vai o Kalilaia; ‘ua ui atu i le itū o Tekapoli.
32. ‘Ona latou ‘aumai lea ‘iā Iesu le tagata tutuli, ‘ua leo ‘o‘olo; ‘ua latou ‘ai‘oi fo‘i ‘iā te ia ‘ina ‘ia fa‘ae‘e o ia lona ‘a‘ao i luga ‘iā te ia.
33. ‘Ona ta‘ita‘i ‘ese lea e Iesu ‘iā te ia i le motu o tagata, ‘ua tu‘u ona tamatama‘i lima i totonu o ona taliga, ‘ua feanu fo‘i ma pa‘i ane i lona laulaufaiva.
34. ‘Ua silasila a‘e o ia i le lagi, ‘ua ōi, ‘ona ia fetalai atu lea ‘iā te ia, “Efata,” o lona uiga, “‘Ia avanoa.”
35. ‘Ona pūpū loa lea o ona taliga, ‘ua matala fo‘i le noanoaga o lona laulaufaiva, ‘ona tautala lelei mai ai lea.
36. ‘Ona ia vavao atu lea fo‘i ‘iā te i latou, ‘aua latou te ta‘u atu i se tasi; ‘ae ui lava ‘ina vavao e ia ‘iā te i latou, ‘ua atili ai ‘ona latou tala‘i atu ai lava.
37. ‘Ua fa‘apea atu ma le ofo ‘ua matuā tele, “‘Ua mālie lava ana mea uma ‘ua fai; ‘ua ia fa‘alogoa ē sa tutuli, ‘atoa ma ē sa gūgū ‘ua ia fa‘agaganaina.”#