1. ‘Ua ulufafo Iesu i le Malumalu, ‘ona fai mai lea o le tasi o ona so‘o ‘iā te ia, “Le a‘oa‘o e, ‘inā silasila ia i nei ma‘a ‘ua tetele lava, ma nei fale ‘ua tetele lava!”
2. A ‘ua tali atu Iesu ‘iā te ia, ‘ua fa‘apea atu, “‘Ua e iloa ‘ea nei fale tetele? E lē tu‘ua le tasi ma‘a i luga o le tasi ma‘a, ‘ae uma lava ‘ona sōloia i lalo.”
3. ‘Ua nofo o ia i le mauga o Olive, e feagai ma le malumalu, ‘ona fesili lemū lea ‘iā te ia o Peteru ma Iakopo, ma Ioane, ma Aneterea,
4. “Se‘i ē ta‘u mai ‘iā te i matou, pe fai afea ia mea? Pe se a fo‘i le fa‘ailoga pe a lata ‘ona taunu‘u o ia mea uma?”
5. ‘Ona tali atu lea o Iesu ‘iā te i latou, “‘Ia ‘outou, ne‘i fa‘asesēina ‘outou e se tasi.
6. Auā e to‘atele ē ō mai i lo‘u nei igoa, ma fa‘apea ane, ‘O a‘u o ia,’ latou te fa‘asesēina fo‘i tagata e to‘atele.
7. Pe a tou fa‘alogo i tau‘a ma tala o tau‘a, ‘aua tou te atuatuvale; auā e tupu lava ia mea; ‘ae le‘i o‘o i le gata‘aga.
8. Auā e si‘i le tau‘a e le tasi nu‘u i le tasi nu‘u, o le tasi mālō fo‘i i le tasi mālō; e i ai fo‘i mafui‘e i lea mea ma lea mea, e i ai fo‘i oge; o amataga ia o puapuagā
9. “‘Ia ‘outou ‘iā te ‘outou; auā e tu‘uina atu ‘outou e i latou i fono, ma sasaina ‘outou i sunako, e tutū fo‘i ‘outou i luma o ali‘i ma tupu ‘ona o a‘u, e fai ma molimau ‘iā te i latou.
10. ‘Ia mua‘i tala‘iina fo‘i le tala lelei i nu‘u uma lava e ao ai.
11. Pe a latou ta‘ita‘iina ma tu‘uina atu ‘outou, ‘aua ne‘i ‘outou popole i se ‘upu tou te tautala atu ai, a o‘o mai le taimi, ‘ia ‘outou tautala atu le ‘upu ‘ua foa‘iina atu ‘iā te ‘outou. Auā o ‘upu tou te tautala atu ai e lē mai a ‘outou lea ‘ae mai le Agaga Pa‘ia.
12. E tu‘uina atu fo‘i le uso e le uso ‘ia oti, e tu‘uina fo‘i e le tamā lona atali‘i, e tutū atu fo‘i le fānau i o latou mātua, ‘ina ‘ia fasiotia i latou.
13. E ‘inosia fo‘i ‘outou e tagata uma ‘ona o lo‘u igoa; a o lē tumau se‘ia o‘o i le i‘uga, e fa‘aolaina lea.
14. “Pe a ‘outou iloa le mea e ‘inosia e fa‘atafunaina ai, ‘ua fai mai ai e Tanielu le perofeta, ‘ua tu i le mea e lē tatau ai, (‘inā iloa ia e lē faitau), o ē o i Iutaia i ia ona po, ‘ia latou sōsōla i mauga;
15. o lē ‘ua i luga o le fale, ‘aua ne‘i alu ifo ia i le fale, ‘aua fo‘i ne‘i ulu ai e ‘ave se mea ai lona fale;
16. o lē ‘ua i le vao fo‘i, ‘aua ne‘i toe fo‘i o ia e ‘ave lona ‘ofu.
17. ‘Oi talofa fo‘i i fafine totō, ma ē failele i nā ona aso!
18. A ‘ia ‘outou tatalo ‘ina ne‘i sōsōla ‘outou i le tau malūlū;
19. auā o ia ona aso e i ai le puapuagā, e leai sona tusa talu lava le amataga o mea na faia e le Atua, ‘ua o‘o mai i ona po nei, e lē toe fa‘apea fo‘i amulī.
20. ‘Āfai fo‘i e lē fa‘apu‘upu‘uina ia aso e le Ali‘i, e leai se tagata e fa‘aolaina; ‘ae peita‘i ‘ona o lana ‘au filifilia, ‘ua ia fa‘apu‘upu‘uina ai ia aso.
21. “‘Āfai fo‘i e fai ane se tasi ‘iā te ‘outou i ia ona po, ‘Fa‘auta, o ‘i‘inei le Keriso;’ pe fa‘apea, ‘Fa‘auta, o ‘i‘ilā;’ ‘aua ne‘i fa‘alogo i ai.
22. Auā e tutū mai Keriso pepelo, ma perofeta pepelo, ma latou faia fa‘ailoga ma vāvega, ‘ina ‘ia fa‘asesē ai ē ‘ua filifilia lava, pe ‘āfai e mafai ai.
23. ‘Ia ‘outou fa‘auta, ‘ua ‘ou mua‘i ta‘uina atu ‘iā te ‘outou ia mea uma.
24. “O aso fo‘i ia pe a mavae atu lenā puapuagā, e fa‘apogisāina ai le lā, e lē susulu mai fo‘i le masina,
25. e pa‘u‘ū mai fetū o le lagi, e lūlūina fo‘i ‘au o le lagi.
26. ‘Ona iloa atu lea e i latou ‘o le Atali‘i o le tagata ‘ua sau i ao’ ma le mana tele ma le mamalu.
27. ‘Ona ‘a‘auina mai lea e ia o ana agelu, latou te fa‘apotopotoina ē ‘ua filifilia e ia mai matāmatagi e fa; e amata i le tulu‘iga o le lalolagi e o‘o atu i le tulu‘iga o le lagi.
28. “‘Ia ‘outou mātau le fa‘ata‘oto i le mati; pe a fa‘ato‘ā tutupu ona tātupu, ma matala mai ona lau, ‘ona ‘outou iloa ai lea ‘ua latalata mai le tau vevela.
29. E fa‘apea fo‘i ‘outou, pe a iloa ia mea ‘ua tutupu mai, ‘ia ‘outou iloa ‘ua latalata mai ia, ‘ua i faitoto‘a lava.
30. E moni, ‘ou te fai atu ‘iā te ‘outou, E lē mavae lenei tupulaga, se‘ia taunu‘u ia mea uma.
31. E mavae atu le lagi ma le lalolagi; ‘ae peita‘i o a‘u ‘upu, e lē mavae lava ia.
32. “A o lea aso ma lea itū aso e lē iloa e se tasi, e lē iloa lava e agelu i le lagi, po o le Atali‘i; ‘ua nā o le Tamā lava.
33. ‘Ia ‘outou, ‘inā mataala ia, auā tou te lē iloa pe o‘o mai afea ia aso.
34. Fa‘apei o se tagata na alu malaga, na ‘ia tu‘ua lona fale ma avane le pule i ana ‘au‘auna, ‘ua ta‘ito‘atasi fo‘i ma lana lava galuega, ma ‘ua fai atu i le leoleo faitoto‘a ‘ina ‘ia mataala o ia.
35. O lea, ia mataala ai ‘outou; auā tou te lē iloa po o afea e sau ai le ali‘i o le ‘āiga, po o le afiafi, po o le tautuluaga o le po, po o le vivini o moa, po o le taeao,
36. ne‘i fa‘afuase‘i ‘ona sau, e maua mai ‘outou o momoe.
37. O le mea ‘ou te fai atu ‘iā te ‘outou, ‘ou te fai atu ai i tagata uma. ‘Inā mataala ia.”