1. ‘Ua fetalai ane fo‘i o ia ‘iā te i latou, “E moni, ‘ou te fai atu ‘iā te ‘outou, o lo‘o tutū mai nisi ‘i‘inei, e lē o‘o ‘iā te i latou le oti, se‘ia latou va‘aia le mālō o le Atua ‘ona o‘o mai ma le mana.”
2. ‘Ua mavae aso e ono, ‘ona ō ai lea o Iesu ma Peteru, ma Iakopo, ma Ioane; ‘ua ia ‘ava‘e ‘iā te i latou i le mauga maualuga, ‘ua na o i latou lava ‘ona liua lea o ia i o latou luma.
3. ‘Ua pupula ona ‘ofu, ‘ua matuā pa‘epa‘e lava pei o le kiona; e leai fo‘i se tagata tā‘ofu i le lalolagi na te mafaia ‘ona fa‘asinasina fa‘apenā.
4. ‘Ua fa‘aali mai fo‘i ‘iā te i latou o Elia ma Mose; ‘ua fetautalatala‘i i latou ma Iesu.
5. ‘Ona fai mai lea o Peteru ‘iā Iesu, ‘ua fa‘apea mai, “Rapi e, e lelei ‘ona ‘ua tatou nonofo ‘i‘inei; se‘i matou faia fo‘i ni fale apitaga se tolu; o le tasi mo oe, o le tasi mo Mose, o le tasi mo Elia.”
6. Auā ‘ua ia lē iloa se ‘upu e fai atu, ‘ina ‘ua mata‘utuia i latou.
7. ‘Ua o‘o mai fo‘i le ao ‘ua ufitia ai i latou; ‘ona tulei mai lea o le si‘ufofoga mai le ao, ‘ua fa‘apea mai, “O lo‘u Atali‘i pele lenā, ‘inā fa‘alogo ia ‘outou ‘iā te ia.”
8. ‘Ona fa‘afuase‘i lea ‘ona va‘ava‘ai solo o i latou, ‘ua lē toe iloa se tasi, ‘ua na o Iesu lava ma i latou.
9. ‘Ua ō ifo i latou i le mauga, ‘ona vavao atu lea o ia ‘iā te i latou, ne‘i latou ta‘u atu i se tasi o mea sa latou va‘aia, se‘ia tu mai le Atali‘i o le tagata nai ē ‘ua oti.
10. ‘Ona latou tāofi ai lea i lea ‘upu, ma fesu‘ea‘i, Pe se a le toetū mai nai ē ‘ua oti?
11. ‘Ona latou fesili lea ‘iā te ia, “Se a le mea e fai mai ai le ‘au tusi‘upu, e ao ‘ona mua‘i sau o Elia?”
12. ‘Ona tali atu lea o ia, ‘iā te i latou, “E lua‘i sau lava Elia, ma toe fuata‘i mea uma; e pei ‘ona tusia fo‘i i le Atali‘i o le tagata, e tigā o ia i mea e tele, ma ‘inosia fo‘i o ia.
13. A ‘ou te fai atu ‘iā te ‘outou, ‘ua mavae ‘ona sau o Elia, ‘ua latou faia fo‘i ‘iā te ia mea uma na latou loto i ai, pei ‘ona tusia ‘iā te ia.”
14. ‘Ua o‘o atu i latou i le ‘au so‘o, ‘ona iloa atu lea o le motu o tagata e to‘atele ‘ua vagaia i latou, ma le ‘au tusi‘upu ‘ua fesilisili ‘iā te i latou.
15. ‘Ua iloa o ia e le motu o tagata uma, ‘ona taufaiofo ai lea o i latou, ‘ua latou taufetuli mai ma fa‘afeiloa‘i mai ‘iā te ia.
16. ‘Ua fesili fo‘i o ia i le ‘au tusi‘upu, “Pe se a se mea tou te fesili ai ‘iā te i latou?”
17. ‘Ona tali mai lea o le tasi o le motu o tagata, “Le a‘oa‘o e, ‘ua ‘ou ‘aumai ‘iā te oe lo‘u atali‘i ‘ua i ai le agaga gūgū;
18. so o se mea e pu‘e ai ‘iā te ia, ‘ona lafotū ai lea ‘iā te ia; ‘ua fāuā le gutu, ‘ua lilivau ona nifo, ‘ua ma‘a‘a fo‘i le tino ‘ua uma fo‘i ‘ona ‘ou fai atu i ou so‘o ‘ina ‘ia latou tulia o ia, a ‘ua lē mafaia e i latou.”
19. ‘Ona tali atu lea o Iesu ‘iā te i latou, ‘ua fa‘apea atu, “Le tupulaga lē fa‘atuatua e, tatou te i ai ma ‘outou se‘ia afea? ‘Ou te fa‘apalepale ‘iā te ‘outou se‘ia afea? ‘Inā ‘aumai ia o ia ‘iā te a‘u.”
20. ‘Ona latou ‘aumaia lea o le tama ‘iā Iesu; ‘ua va‘ai atu le agaga ‘iā Iesu, ‘ona ia fa‘ata‘afiti loa lea o le tama, i le ‘ua pa‘ū o ia i le ‘ele‘ele, ‘ona ta‘afilifili ai lea o ia ma fāuā lona gutu.
21. ‘Ona fesili atu lea o Iesu i lona tamā, “Talu mai anafea ‘ona o‘o o lenā mea ‘iā te ia?”‘Ua fai mai o ia, “Talu ‘ina o tamaitiiti.
22. ‘Ua lafo so‘o fo‘i e le agaga ‘iā te ia i le afi ‘atoa ma le vai, ‘ina ‘ia oti ai o ia; ‘ae peita‘i, ‘ia e alofa mai ‘iā te i matou, ma ‘ia e fesoasoani mai ‘iā te i matou pe ‘āfai ‘e te mafai.”
23. ‘Ona fetalai atu lea o Iesu ‘iā te ia, “‘Ai se mea ‘e te mafaia. Auā e mafaia mea uma lava i lē fa‘atuatua.”
24. ‘Ona ‘alaga loa lea o le tamā o le tama, ‘ua fai atu, “Le Ali‘i e, ‘ua ‘ou fa‘atuatua; ‘ia e fesoasoani i lo‘u lē fa‘atuatua.”
25. ‘Ua silafia e Iesu ‘ua taufetuli mai le motu o tagata, ‘ona vavao atu lea o ia i le agaga leaga, ‘ua fa‘apea atu ‘iā te ia, “O oe na, le agaga gūgū ma le tutuli, ‘ou te fai atu lava ‘iā te oe, ‘inā e alu ia i fafo mai ‘iā te ia, ‘aua fo‘i ‘e te toe alu i totonu ‘iā te ia.”
26. ‘Ona ‘alaga lea o le agaga ma fa‘ata‘afiti tele ‘iā te ia, ‘ona alu lea i fafo; ‘ona liua lea o ia e peiseaī ‘ua oti; ‘ona fai mai ai lea o tagata e to‘atele, “‘Ua oti lava ia.”
27. A o Iesu ‘ua tago ifo o ia i lona lima ma fa‘atū ‘iā te ia, ‘ona tula‘i lea o ia.
28. ‘Ua maliu ane Iesu i le fale, ‘ona fesili lea o ona so‘o ‘iā te ia ‘ina ‘ua na o i latou, “Se a le mea na matou lē mafai ai ‘ona tulia o ia?”
29. ‘Ona fetalai atu lea o ia ‘iā te i latou, “‘Ua nā o le tatalo e mafai ai ‘ona ō ‘ese o mea fa‘apenā.”
30. ‘Ua tu‘ua fo‘i e i latou lenā mea, ‘ua ui ane i Kalilaia; o lona finagalo, fo‘i ‘ina ‘ia lē iloa o ia e se tasi.
31. Auā ‘ua ia a‘oa‘o atu i ona so‘o, ma fetalai atu ‘iā te i latou, “‘Ua tu‘uina atu le Atali‘i o le tagata i lima o tagata, latou te fasioti fo‘i ‘iā te ia; a uma fo‘i ‘ona fasia o ia, e toetū mai o ia i le aso tolu.”
32. A o i latou ‘ua lē malamalama i lea ‘upu, ‘ua matata‘u fo‘i e fesili ‘iā te ia.
33. ‘Ua o‘o i latou i Kapanaumi, sa i le fale o ia, ‘ona fesili lea o ia ‘iā te i latou; “Pe se a na ‘outou fefinaua‘i ai i le ala?”
34. A o i latou ‘ua fa‘alologo; Auā sa latou fefinaua‘i i le ala po o ai so latou e sili?
35. ‘Ua nofo ia i lalo, ‘ona vala‘au atu lea i le to‘atinoagafulu ma le to‘alua, ‘ua fetalai atu ‘iā te i latou, “‘Āfai e fia muamua se tasi ‘ia ‘avea o ia ma mulimuli i tagata uma, ma ‘au‘auna a tagata uma.”
36. ‘Ona tago, lea o ia i le tamaitiiti, ‘ua fa‘atū ‘iā te ia i o latou luma; ‘ua na si‘itia o ia i ona lima, ‘ona fetalai atu lea ‘iā te i latou,
37. “‘Ai sē talia se tamaitiiti fa‘apenei i lo‘u nei igoa, ‘ua talia e ia o a‘u; ‘ai sē talia a‘u, e lē o a‘u ‘ua ia talia, a o ia na ‘auina mai a‘u.”
38. ‘Ona fai mai lea o Ioane ‘iā te ia, ‘ua fa‘apea mai, “Le a‘oa‘o e, na matou iloa le tasi ‘ua tutuli temoni i lou suafa, ‘ua ia le mulimuli mai ‘iā te i tatou; na matou vaoia o ia, auā ‘ua ia le mulimuli mai ‘iā te i tatou.”
39. A ‘ua fetalai atu Iesu, “‘Aua le vaoia o ia; auā e leai se tagata na te faia se vāvega i lo‘u nei igoa, na te vave tautala i se ‘upu leaga ‘iā te a‘u.
40. Auā fo‘i o lē lē ‘au ‘ese ‘iā te i tatou, e ‘au fa‘atasi lea ma i tatou.
41. O sē na te avatua fo‘i se ipu vai ‘iā te ‘outou i lo‘u nei igoa, auā e o Keriso ‘outou; e moni, ‘ou te fai atu ‘iā te ‘outou, e lē māumau ‘iā te ia lona taui.
42. “‘Ai sē na te fa‘atausuaiina se tasi o i latou nei e fa‘atauva‘a o ē fa‘atuatua mai ‘iā te a‘u, e lelei ‘iā te ia pe ana noatia se ma‘aolo i lona ua, ma lafoina o ia i le moana.
43. A fa‘atausuaiina fo‘i oe e lou lima, ‘inā tipi ‘ese ia; e lelei ‘ona e sao i le ola a ‘ua e lima mutu, ‘ae leaga ona lima lua, ‘ae alu i Kēna, i le afi e lē mafai ‘ona tineia.
44. O i ai e lē mamate o latou ilo, e lē tineia fo‘i le afi.
45. A fa‘atausuaiina fo‘i oe e lou vae, ‘inā tipi ‘ese ia; e lelei ‘ona e sao i le ola ‘ua pipili, ‘ae leaga ‘ona lua ni vae, ‘ae lafoina oe i Kēna, i le afi e lē mafai ‘ona tineia.
46. O i ai e lē mamate o latou ilo, e lē tineia fo‘i le afi.
47. A fa‘atausuaiina fo‘i oe e lou mata, ‘inā sali ‘ese ia; e lelei ‘ona e sao i le mālō o le Atua ma le mata e tasi, ‘ae leaga ‘ona lafoina oe ma ou mata e lua i le afi o Kēna.
48. O i ai e lē mamate o latou ilo, e lē tineia fo‘i le afi.
49. “Auā e ta‘itasi uma ma fa‘amasimaina i le afi.
50. O le mea lelei le masima, ‘ae ‘āfai e māgalo le masima, se a se mea tou te fa‘amāi ai? ‘Ia ‘iā te ‘outou le masima ma ‘ia fīfīlemū ‘outou ‘iā te ‘outou.”