1. ‘Ua mavae isi aso, ‘ona toe maliu atu lea o ia i Kapanaumi; ‘ua ‘ave fo‘i le logo ‘ua i ai o ia i le fale.
2. ‘Ona potopoto mai ai lea o tagata e to‘atele, ‘ua lē toe ofi, ‘ua o‘o lava i luma o le faitoto‘a, ‘ona folafola atu lea e ia le ‘upu ‘iā te i latou.
3. ‘Ua ō mai nisi ‘iā te ia, ‘ua ‘aumai le tagata supa, o lo‘o fataina mai e le to‘afa.
4. ‘Ua lē mafai fo‘i i latou ‘ona fa‘alatalata atu ‘iā te ia, auā le motu o tagata, ‘ona latou tatala lea o le taualuga o le fale e tautonu ifo ‘iā te ia, ‘ona latou tu‘utu‘u ifo ai lea o le moega o lo‘o ta‘oto ai le supa.
5. ‘Ua silafia e Iesu lo latou fa‘atuatua, ‘ona fetalai atu lea o ia i le supa, “Lo‘u atali‘i e, ‘ua fa‘amāgaloina au agasala.”
6. Sa nonofo ai nisi o le ‘au tusi‘upu, sa mānatunatu ifo i o latou loto,
7. “Se a le mea ‘ua tautala ai fa‘apea lenei tagata? ‘Ua fāifai i le Atua? E mafaia ‘ea ‘iā te ai ‘ona fa‘amāgaloina o agasala, ‘ua nā o le to‘atasi o le Atua lea.”
8. ‘Ua silafia e Iesu o latou manatu ‘ona fetalai atu ai lea o ia ‘iā te i latou, “Se a le mea ‘ua ‘outou mānatunatu ai i ia mea i o ‘outou loto?
9. Po o le fea e faigofie? Po o le fai atu i le supa, ‘‘Ua fa‘amāgaloina au agasala;’ po o le fai atu, ‘‘Inā tula‘i ia ma ‘ave lou moega ma savali?’
10. ‘Ae peita‘i ‘ina ‘ia ‘outou iloa o i ai i le Atali‘i o le tagata i le lalolagi le pule e fa‘amāgalo ai agasala.” ‘Ua fetalai ane o ia i le supa.
11. “‘Ou te fai atu ‘iā te oe, ‘inā tula‘i ia, ‘inā ‘ave lou moega ma alu atu i lou fale.”
12. ‘Ona tula‘i loa lea o ia, ‘ua ‘ave fo‘i lona moega ma savali ane i luma o i latou uma. ‘Ona ofo tele ai lea o i latou uma ma vivi‘i atu i le Atua, ‘ua fa‘apea, “‘Ua tatou lē iloa mai anamua se mea fa‘apenā.”
13. ‘Ua toe maliu ane Iesu e latalata ane i le vai, ‘ona ō mai lea o le motu o tagata uma ‘iā te ia, ‘ona a‘oa‘o atu lea o ia ‘iā te i latou.
14. ‘Ua maliu ane o ia, ‘ona silafia lea e ia o Levi o le atali‘i o Alefaio, ‘ua nofo i le fale e tali ai lafoga, ‘ona fetalai atu lea o ia, “Mulimuli mai ia ‘iā te a‘u.” ‘Ona tula‘i lea o ia, ‘ua mulimuli atu ‘iā te ia.
15. ‘Ua ta‘oto o ia i lona fale e taumafa, e to‘atele fo‘i tagata ao lafoga ma ē agasala ‘ua ta‘o‘oto e ‘a‘ai fa‘atasi ma Iesu ma ona so‘o; auā e to‘atele i latou, ‘ua latou mulimuli atu fo‘i ‘iā te ia.
16. ‘Ua iloa e le ‘au tusi‘upu ma le ‘au faresaio, o ia o lo‘o taumafa fa‘atasi ma tagata ao lafoga ma tagata agasala, ‘ona latou fai atu lea i ona so‘o, “Se a le mea e ‘ai ai o ia ma inu fa‘atasi ma tagata ao lafoga ma ē ‘ua agasala?”
17. ‘Ua lagona e Iesu, ‘ona fetalai atu lea o ia ‘iā te i latou, “E lē aogā le foma‘i i ē mālōlō, na o ē mama‘i; ‘ua ‘ou lē sau e vala‘au i ē amiotonu, a o ē agasala.”
18. Sa anapopogi le ‘au so‘o o Ioane ma so‘o o le ‘au faresaio; o le mea lea ‘ua latou ō mai ai ma fai mai ‘iā te ia, “Se a le mea e anapopogi ai le ‘au so‘o o Ioane ma so‘o o le ‘au faresaio, a o ou so‘o e lē anapopogi i latou?”
19. ‘Ona fetalai atu lea o Iesu ‘iā te i latou, “Pe mafai ‘ea e aumea a le fa‘ato‘āfaiavā ‘ona anapopogi ‘ina o ‘iā te i latou le fa‘ato‘āfaiavā? Latou te lē mafai ‘ona anapopogi i ona aso o ‘iā te i latou le fa‘ato‘āfaiavā.
20. ‘Ae o‘o i ona po e ‘ave‘eseina ai le fa‘ato‘āfaiavā ‘iā te i latou, ‘ona latou anapopogi ai lea i nā ona aso.
21. “E leai fo‘i se tasi na te fonoa le matuā ‘ofu i le ‘ie fou; a fa‘apea, e māsae le matuā ‘ofu i le fono fou, ‘ona atili ai lea ‘ona māsae.
22. E le utufia fo‘i e se tasi le uaina fou i fagu pa‘u tuai; a fa‘apea, ‘ona pāpā ai lea o fagu pa‘u i le uaina fou, ‘ona masa‘a lea o le uaina, e māumau fo‘i fagu pa‘u; ‘ae peita‘i o le uaina fou e tatau i ai fagu pa‘u fou.”
23. ‘Ua ui ane o ia e latalata i fa‘ato‘aga saito i le sapati, ‘ona ‘o‘oti lea e ona so‘o i ‘au o saito.
24. ‘Ona fai atu lea o le ‘au faresaio ‘iā te ia, “Fa‘auta, se a le mea latou te fai ai le mea e sā ‘ona fai i le sapati?”
25. ‘Ona fetalai atu lea o Iesu ‘iā te i latou, “‘Ua ‘outou lē faitauina ‘ea le mea na faia e Tavita ‘ina ‘ua leai ni ana mea e ‘ai, ‘ua fia ‘ai fo‘i o ia ‘atoa ma i latou sa ‘iā te ia,
26. ‘ua ulu atu o ia i le fale o le Atua i ona po o Aviata le ositaulaga sili, ‘ua ia ‘ai fo‘i areto ‘ua laulauina i luma, ma avane i ē sa ‘iā te ia? O mea e sā ‘ona ‘ai ai o se tasi, nā o le ‘au ositaulaga lava.”
27. ‘Ua ia fetalai atu fo‘i ‘iā te i latou, “‘Ua faia le sapati mo tagata, ‘ae lē faia le tagata mo le sapati.
28. Lenei la, o le Atali‘i o le tagata, o le Ali‘i lava lea o le sapati.”