1. ‘Ua matuā puipuia Ieriko e le fānauga a Isaraelu, e leai se alu atu, e leai se sau ai.
2. ‘Ona fetalai mai ai lea o le ALI‘I ‘iā Iosua, “Fa‘auta mai ‘ea, ‘ua ‘ou tu‘uina atu i lou lima o Ieriko, ma lona tupu, ma ona toa malolosi.
3. ‘Ia ‘outou fa‘ata‘amilo i le ‘a‘ai, o ‘au uma o le tau‘a, ia tasi le fa‘ata‘amilosaga i le ‘a‘ai. ‘Ia fa‘apea ‘ona e faia i aso e ono.
4. E ‘ave e ositaulaga e to‘afitu o pū e fitu o le iupelī i luma o le ‘atola‘au; o le aso fitu tou te fa‘ata‘amilo fa‘afitu ai i le ‘a‘ai; e ilia fo‘i pū e le ‘au ositaulaga.
5. A fa‘alevaleva ona ili o le pū o le iupelī, pe a ‘outou fa‘alogo i le leo o le pū, ‘ona ‘alalaga lea o le nu‘u uma ma le leo tele; ‘ona solo ai lea i lalo o le pā o le ‘a‘ai; ‘ona ō a‘e ai lea o le nu‘u uma ta‘itasi i o latou luma.”
6. ‘Ona vala‘auina lea o ositaulaga e Iosua le atali‘i o Nuno, ma na fai atu ‘iā te i latou, “‘Inā ‘ave ia le ‘atola‘au o le feagaiga, ma ia ‘ave e ositaulaga e to‘afitu o pū e fitu o le iupelī, i luma o le ‘atola‘au a le ALI‘I.”
7. ‘Ua ia fai atu fo‘i i le nu‘u, “Ō atu ia, ma fa‘ata‘amilo i le ‘a‘ai, o ē ‘ua sauni i le tau‘a ‘ia ō atu ia i luma o le ‘atola‘au a le ALI‘I.”
8. ‘Ua mavae atu le ‘upu a Iosua i le nu‘u, ‘ona ō atu ai lea o ositaulaga e to‘afitu, o ‘ave e i latou pū e fitu o le iupelī i luma o le ALI‘I, ma latou ilia pū; ‘ua mulimuli atu ‘iā te i latou le ‘atola‘au o le feagaiga a le ALI‘I.
9. ‘Ua ō atu fo‘i e ‘ua sauni i le tau‘a i luma o ositaulaga o ē ili pū; ‘ua mulimuli atu muli‘au i le ‘atola‘au, o sāvavali ositaulaga ma ili pū.
10. ‘Ua fai atu fo‘i Iosua i le nu‘u, na fa‘apea atu, “‘Aua ne‘i ‘outou ‘alalaga; ‘aua fo‘i ne‘i lagona o ‘outou leo; ‘aua fo‘i ne‘i tautala lava, se‘ia o‘o i le aso ‘ou te fai atu ai ‘iā te ‘outou ‘ia ‘alalaga,” ‘ona ‘outou ‘alalaga ai lea.
11. ‘Ua fa‘ata‘amilo le ‘atola‘au a le ALI‘I i le ‘a‘ai, o le fa‘ata‘amilosaga e tasi; ‘ona latou ō mai ai lea i le toagalauapi, i le latou momoe ai i le toagalauapi.
12. ‘Ona tula‘i lea o Iosua i le taeao lava, ‘ua ‘ava‘e fo‘i e ositaulaga le ‘atola‘au a le ALI‘I.
13. O ositaulaga e to‘afitu o ē ‘ave pū e fitu o le iupelī i luma o le ‘atola‘au a le ALI‘I, ‘ua sāvavali lava i latou ma ili pū; ‘ua ō atu fo‘i i o latou luma e ‘ua sauni i le tau‘a; a ‘ua mulimuli atu muli‘au i le ‘atola‘au a le ALI‘I; o sāvavali ositaulaga ma ili pū.
14. O le aso lua fo‘i ‘ua latou fa‘ata‘amilo fa‘atasi ai i le ‘a‘ai, ‘ona latou toe fo‘i mai ai lea i le toagalauapi; sa fa‘apea lava ‘ona latou faia i aso e ono.
15. A o le aso fitu ‘ua latou tula‘i ai i le malama a‘e o le taeao, ma latou fa‘ata‘amilo fa‘apenā i le ‘a‘ai e atu fitu; na o le aso lea ‘ua latou fa‘ata‘amilo fa‘afitu ai le ‘a‘ai.
16. ‘Ua o‘o i le atu fitu, ‘ua ili pū e ositaulaga; ‘ona fai atu ai lea o Iosua i le nu‘u, “‘Inā ‘alalaga ia auā ‘ua foa‘iina mai e le ALI‘I le ‘a‘ai ‘iā te ‘outou.
17. E fa‘atoina le ‘a‘ai, o le ‘a‘ai lava, ma mea uma ‘ua i ai mo le ALI‘I; na o Raava le fafine talitane e ola ia; o ia, ma i latou uma o i le fale ma ia; auā sa natia e ia e na ‘a‘auina na tatou ‘a‘auina atu.
18. A o ‘outou, ‘ia ‘outou ma le mea ‘ua fa‘atoina; ne‘i fa‘atoina ‘outou pe a ‘outou ‘ave se mea ‘ua fa‘atoina; ‘ona ‘outou faia lea o le toagalauapi o Isaraelu ma mea ‘ua fa‘atoina; ma ‘outou fa‘atigāina ai.
19. A o le ario uma, ma le auro, ma ipu ‘apamemea, ma u‘amea, e fa‘asāina lava mo le ALI‘I, e avatua i le mea e teu ai ‘oa a le ALI‘I.”
20. ‘Ua ili pū e ositaulaga, ‘ona ‘alalaga ai lea o le nu‘u; ‘ua fa‘alogo le nu‘u i le leo o le pū, ‘ona ‘alalaga lea o le nu‘u i le leo tele, ‘ona solo ai lea i lalo o le pā, ‘ona ō a‘e ai lea o le nu‘u i le ‘a‘ai ta‘itasi i o latou luma, ‘ua latou ā‘ea fo‘i le ‘a‘ai.
21. ‘Ona matuā fa‘aumatia ai lea e i latou i le pelu o i latou uma sa i le ‘a‘ai, o tane ma fafine, o tama ma toeaina, ‘atoa ma povi, ma mamoe, ma asini.
22. A ‘ua fai atu Iosua i tagata e to‘alua na asiasi le nu‘u, “‘Inā ō ia ‘oulua i le fale o le fafine talitane, ma ‘aumai ai le fafine, ma i latou uma ‘ua ‘iā te ia, e pei ona ‘oulua tautō ‘iā te ia.”
23. ‘Ona ō ai lea o taulele‘a o ē na asiasi i le nu‘u, ma latou ‘aumai ‘iā Raava ma lona tamā, ma lona tinā, ma ona tuagane, ma i latou uma na ‘iā te ia; ‘ua ‘aumaia e i lā‘ua ona ‘āiga uma, ma tu‘u ai i tua o le toagalauapi o Isaraelu.
24. A o le ‘a‘ai ma mea uma na i ai, ‘ua fa‘amūina e i latou i le afi; na o ario, ma auro, ma ipu ‘apamemea, ma u‘amea, ‘ua latou tu‘u ai i le mea e teu ai ‘oa i le fale o le ALI‘I.
25. ‘Ua fa‘aolaina e Iosua o Raava le fafine talitane, ma le ‘āiga o lona tamā, ma i latou uma ‘ina ‘iā te ia; o lo‘o nofo fo‘i o ia i Isaraelu ‘ua o‘o lava i nei ona po; auā sa natia e ia ē na ‘a‘auina na ‘a‘auina e Iosua e asiasi Ieriko.
26. ‘Ua fai atu fo‘i Iosua ‘iā te i latou ‘ia tautō i lea aso, ‘ua fa‘apea atu, “‘Ia malaia i luma o le ALI‘I le tagata e tula‘i, ma toe fa‘atū lenei ‘a‘ai o Ieriko; e fa‘avaeina i lana ulumatua, e fa‘atūina fo‘i puipui i lana ui‘i.”
27. Na ‘iā Iosua le ALI‘I; ‘ua o‘o fo‘i lona logo i le nu‘u uma.