1. ‘Ua uma ‘ona sopo‘ia atu o Ioritana e le nu‘u uma ‘ona fetalai mai ai lea o le ALI‘I ‘iā Iosua, ‘ua fa‘apea mai,
2. “‘Inā fa‘ifa‘i mai ia ni o ‘outou tagata e to‘atinoagafulu ma le to‘alua, o le itū‘āiga ma le tagata e to‘atasi;
3. ‘ia ‘outou fai atu fo‘i ‘iā te i latou, ‘ia fa‘apea atu, ‘‘Ia ‘outou ‘ava‘e ma‘a e sefulu ma le lua a‘i lenei mea i totonu o Ioritana, o le mea sa tūtūmau ai vae o ositaulaga; ma ‘ia ‘outou avatu ai, ma tu‘u ai i le mea e momoe ai, tou te momoe ai i le po nanei.’”
4. ‘Ona vala‘au atu ai lea o Iosua i tagata e to‘asefulu ma le to‘alua na tofia e ia a‘i le fānauga a Isaraelu, ta‘itasi le itū‘āiga ma le tagata e to‘atasi.
5. ‘Ua fai atu fo‘i Iosua ‘iā te i latou, “‘Ia ‘outou ui atu i luma o le ‘atola‘au a le ALI‘I, lo ‘outou Atua, i totonu o Ioritana, ma ‘ia ‘outou ta‘itasi ma si‘i a‘e se ma‘a i lona ua, e tusa ma le faitau o itū‘āiga o le fānauga a Isaraelu;
6. ‘ina ‘ia faia lenei mea ma fa‘ailoga ‘iā te ‘outou, pe a fesili mai a ‘outou fānau i se aso, e fa‘apea mai, ‘Pe se a ‘ea le uiga o nā ma‘a ‘iā te ‘outou?’
7. ‘Ona ‘outou tali atu ai lea ‘iā te i latou, na vavaeina le vai o Ioritana i luma o le ‘atola‘au o le feagaiga a le ALI‘I, na ui atu ai i Ioritana, ‘ona vavaeina ai lea o le vai o Ioritana. E faia fo‘i na ma‘a ma fa‘amanatuga i le fānauga a Isaraelu e fa‘avavau.”
8. ‘Ua fa‘apea ‘ona faia e le fānauga a Isaraelu e pei ‘ona fai atu ai o Iosua; ‘ua latou ‘ava‘e ma‘a e sefulu ma le lua ai totonu o Ioritana, e pei ‘ona fetalai mai ai o le ALI‘I ia Iosua, e tusa ma le faitau o itū‘āiga o le fānauga a Isaraelu, ma latou avatu ai i le mea na momoe ai, ma tu‘u ai i lea mea.
9. ‘Ua fa‘atūina fo‘i e Iosua o ma‘a e sefulu ma le lua i totonu o Ioritana, i le mea na tutū ai vae o ositaulaga o ē na ‘ave le ‘atola‘au o le feagaiga; o i ai fo‘i i lea mea ‘ua o‘o i le aso nei.
10. ‘Ua tutū i totonu o Ioritana o ositaulaga o ē na ‘ave le ‘atola‘au, se‘ia uma ‘ona fai o mea uma na fetalai mai ai le ALI‘I ‘iā Iosua e fai atu ai i le nu‘u, e pei o mea uma na poloa‘i mai ai Mose ‘iā Iosua; ‘ona fa‘ata‘alise ai lea o le nu‘u, ma latou sopo‘ia atu ai.
11. ‘Ua uma ‘ona sopo‘ia atu e le nu‘u uma, ‘ona ui atu ai lea o le ‘atola‘au a le ALI‘I ma ositaulaga i luma o le nu‘u.
12. Na sopo‘ia atu le fānauga a Reupena, ma le fānauga a Kato, ma le tasi vaega o le itū‘āiga o Manase, o sauni i le tau‘a, i luma o le fānauga a Isaraelu, e pei ‘ona fai mai ai o Mose ‘iā te i latou;
13. pe fa sefulu o afe o i latou o sauni i le tau‘a, na ui atu ai i luma o le ALI‘I, e tau ai le tau‘a i le ‘ele‘ele laugatasi o Ieriko.
14. O le aso lea na fa‘atupuina ai e le ALI‘I le mamalu o Iosua i luma o Isaraelu uma; na latou matata‘u ‘iā te ia, e pei ‘ona latou matata‘u ‘iā Mose, i aso uma o lona ola.
15. ‘Ua fetalai mai fo‘i le ALI‘I ‘iā Iosua, ‘ua fa‘apea mai,
16. “‘Ia e fai atu i ositaulaga o ē ‘ave le ‘atola‘au o le tulafono, ‘ia latou ō a‘e i Ioritana.”
17. ‘Ona fai atu ai lea o Iosua i ositaulaga, ‘ua fa‘apea atu, “Ō a‘e ia ‘outou i Ioritana.”
18. ‘Ona ō a‘e ai lea o ositaulaga o ē na ‘ave le ‘atola‘au o le feagaiga a le ALI‘I nai totonu o Ioritana, ma ‘ua tutū a‘e alofivae o ositaulaga i le lau‘ele‘ele matūtū; ‘ona toe tafe mai ai lea o le vai o Ioritana i lona alā vai, ‘ua lofia fo‘i ona ‘auvai uma lava, e pei o anamua.
19. Na ō a‘e le nu‘u nai Ioritana i le aso e sefulu o le masina muamua, ma latou tolauapi i Kilikala, i le tuā‘oi i sasa‘e o Ieriko.
20. ‘Ona fa‘atūina lea e Iosua i Kilikala o na ma‘a e sefulu ma le lua na latou ‘ava‘e i Ioritana.
21. ‘Ua ia fai atu fo‘i i le fānauga a Isaraelu, ‘ua fa‘apea atu, “A fesili mai i se aso a ‘outou fānau i o latou tamā, e fa‘apea mai, ‘Pe se a le uiga o nā ma‘a?’
22. ‘Ona ‘outou fa‘ailoa atu ai lea ‘iā ‘outou fānau, ‘ia fa‘apea atu, ‘Na sopo‘ia mai Ioritana nei, e Isaraelu i le ‘iliti vai matūtū.’
23. Auā na fa‘amateina e le ALI‘I lo ‘outou Atua le vai o Ioritana i o ‘outou luma, ‘ina se‘ia tou sopo‘ia atu, e pei ‘ona faia e le ALI‘I lo ‘outou Atua i le sami Ulaula, na ia fa‘amateina i o tatou luma ‘ina se‘ia tatou sopo‘ia atu;
24. ‘ina ‘ia iloa e nu‘u uma o le lalolagi e malosi le ‘a‘ao o le ALI‘I; ‘ina ‘ia ‘outou matata‘u i le ALI‘I lo ‘outou Atua i aso uma lava.”#