Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24

Feagaiga Tuai

Feagaiga Fou

Iosua 17 O LE TUSI PA'IA - Ekalesia Katoliko Roma (RSCB)

O le Tofi o le Itū‘āiga o Manase

1. ‘Ua fai fo‘i le tofi o le itū‘āiga o Manase, auā o ia o le ulumatua a Iosefa; mo Makiro le ulumatua a Manase, o le tamā o Kiliata; auā o ia o le toa, na ‘iā te ia Kiliata ma Vasana.

2. ‘Ua fai le tofi o le fānauga a Manase, o ē na totoe, e tusa ma o latou ‘āiga; mo le fānauga a Apieseru, ma le fānauga a Eleka, ma le fānauga a Aserieli, ma le fānauga a Sakema, ma le fānauga a Eferu, ma le fānauga a Semita; o le fānau ia o Manase le atali‘i o Iosefa, o tama tane ia e tusa ma o latou ‘āiga.

3. A o Selofeata le atali‘i o Eferu, le atali‘i lea o Kiliata, le atali‘i lea o Makiro, le atali‘i lea o Manase, e leai sona atali‘i na o ona afafine; o igoa nei o ona afafine, o Maala, ma Noa, ma Hakelu, o Meleka, ma Tiresa.

4. ‘Ua latou fa‘alatalata mai i luma o Eleasaro le ositaulaga, ma luma o Iosua le atali‘i o Nuno, ma luma o ali‘i sili, ‘ua fa‘apea mai, “Na poloa‘i mai le ALI‘I ‘iā Mose e ‘aumai ‘iā te i matou se tofi fa‘atasi ma o matou tuagane.” ‘Ona avatu lea e ia ‘iā te i latou le tofi fa‘atasi ma le ‘au uso o lo latou tamā, e tusa ma le afioga a le ALI‘I.

5. Na maua e Manase o tofi e sefulu, e fa‘aopoopo i le nu‘u o Kiliata ma Vasana, o i le la itū o Ioritana;

6. auā ‘ua fai e afafine o Manase le tofi fa‘atasi ma ona atali‘i; o atali‘i fo‘i o Manase ‘ua totoe ‘ua ‘iā te i latou le nu‘u o Kiliata.

7. O le tuā‘oi o Manase, ‘ua āfua mai i Asera i Mekemeta, e feagai ma Sekema; ‘ua alu atu le tuā‘oi i le itū taumatau, e o‘o atu i ē nonofo i Enetapua.

8. ‘Ua ia Manase le lau‘ele‘ele o Tapua; a o Tapua i le tuā‘oi o Manase, ‘ua i le fānauga, a Efaraima.

9. ‘Ua alu ifo le tuā‘oi i le alia o Kana, i le itū i saute o le alia; o ‘a‘ai ia o Efaraima o i totonu o ‘a‘ai o Manase; o le tuā‘oi fo‘i o Manase o i le itū i matū o le alia, ma lona gata‘aga o le sami lea.

10. O le itū i saute, ‘ua ia Efaraima lea; ma le itū i matū, ‘ua ia Manase lea; o le sami fo‘i o lo la tuā‘oi; ‘ua soso‘o fo‘i o la tuā‘oi i Asera i le itū i matū, ma Isakara i sasa‘e.

11. ‘Ua ia Manase i Isakara ma Asera, o Peteseana ma ona faoa ‘a‘ai, ma Ipelamo ma ona faoa ‘a‘ai, ma ē nonofo i Toro ma ona faoa ‘a‘ai, ma ē nonofo i Enetoro ma ona faoa ‘a‘ai, ma ē nonofo i Tanaka ma ona faoa ‘a‘ai, ma ē nonofo i Mekito ma ona faoa ‘a‘ai; nu‘u e tolu.

12. A ‘ua lē mafai e le fānauga Manase ‘ona tutuli o tagata o ia ‘a‘ai; a ‘ua finau sa Kananā e nonofo pea i lenā nu‘u.

13. ‘Ua o‘o ‘ina malosi o le fānauga a Isaraelu, ‘ona latou totogi atu ai lea o sa Kananā ‘ia fai taulaga; a ‘ua lē matuā tulia i latou.

‘Ua Fa‘atagisia e Manase ma Efaraima nisi o ‘Ele‘ele

14. ‘Ona fai mai lea o le fānauga a Iosefa ‘iā Iosua, ‘ua fa‘apea mai, “Se a ‘ea le mea ‘ua e ‘aumai ai ‘iā te a‘u na o le tofi e tasi, ma le vaega e tasi e fai mo‘u tofi, o a‘u fo‘i lo le nu‘u tele lava, auā ‘ua fa‘amanuia a‘u e le ALI‘I e o‘o i le aso nei?”

15. ‘Ona tali atu ai lea o Iosua ‘iā te i latou, “‘Āfai o oe o le nu‘u tele, ‘inā alu a‘e ai oe i le vao tele, ma fa‘ato‘ā mo oe i lea mea se fanua i le nu‘u o sa Perisē, ma sa Rafā, pe ‘āfai e lauitiiti ‘iā te oe le mauga o Efaraima.”

16. ‘Ona fai mai ai lea o le fānauga a Iosefa, “E lē maua e i matou le mauga; ‘ua fai fo‘i kariota u‘amea e sa Kananā uma o ē nonofo i le nu‘u o le vanu, o i latou o i Peteseana ma ona faoa ‘a‘ai, ‘atoa ma i latou o i le vanu o Isereelu.”

17. ‘Ona fai atu lea o Iosua i le ‘āiga o Iosefa, o Efaraima ma Manase, ‘ua fa‘apea atu, “O le nu‘u tele oe, o ‘iā te oe fo‘i le malosi tele, e lē na o le tofi e tasi e fai mo oe.

18. A o le mauga e fai mo oe lea; auā o le vao tele lea, ‘e te fa‘ato‘aina; o ‘iā te oe fo‘i lona gata‘aga; e ui ‘ina fai kariota u‘amea e sa Kananā, ma ‘ua malolosi i latou, ‘e te tulia i latou.”#