1. Na ‘a‘auina atu e Iosua le atali‘i o Nuno ai Setima o tagata e to‘alua e asiasi fa‘alilolilo i le nu‘u, ‘ua fa‘apea atu, “‘Inā ō ia ‘oulua, ‘inā matamata i le nu‘u, o Ieriko lava.” ‘Ona la ō ai lea, ma ulufale atu i le fale o le fafine talitane e igoa ia Raava, ‘ua nonofo ai i lā‘ua.
2. ‘Ona ta‘u atu lea i le tupu o Ieriko, ‘ua fa‘apea atu, “Fa‘auta, ‘ua ō mai ‘i‘inei i le po nei ni tagata mai le fānauga a Isaraelu e va‘ava‘ai i le nu‘u.”
3. ‘Ona alu atu ai lea o le fe‘au a le tupu o Ieriko ‘iā Raava, ‘ua fa‘apea atu, “‘Inā tu‘u mai ia o ia tagata na ō atu ‘iā te oe, o ē na ō atu i lou fale auā ‘ua la ō mai e va‘ava‘ai i le nu‘u uma.”
4. A uma ‘ua ‘ona ‘ave e le fafine o ia tagata e to‘alua, ‘ua nanā ‘iā te i lā‘ua, ma ‘ua fa‘apea ‘ona fai atu, “Na ō mai tagata ‘iā te a‘u, a ‘ou te le‘i iloa pe na ō mai ifea i lā‘ua;
5. ‘ua o‘o ‘ina a punitia o le faitoto‘a, ‘ina ‘ua pouliuli, ‘ona ō atu ai lea o ia tagata; ‘ou te le‘i iloa le mea na ō atu ai ia tagata; ‘ia vave ‘ona tuliloa atu ‘iā te i lā‘ua; auā tou te maua atu i lā‘ua.”
6. A o ia ‘ua uma ‘ona ia ‘ava‘e ‘iā te i lā‘ua i luga o le fale, ma ‘ua tanuma‘i ‘iā te i lā‘ua i la‘au o lino ‘ua na folasia i luga o le fale.
7. ‘Ua tuliloa atu ia tagata ‘iā te i lā‘ua i le ala i Ioritana, i asaga o le vai; ‘ua latou pupuni fo‘i le faitoto‘a ‘ina ‘ua uma ‘ona ō atu o ē na tuliloa ‘iā te i lā‘ua.
8. ‘Ona alu a‘e lea o le fafine ‘iā te i lā‘ua i luga o le fale, a o le‘i ta‘o‘oto i lā‘ua;
9. ‘ua ia fai atu fo‘i i ia tagata, “‘Ua ‘ou iloa ‘ua foa‘iina atu e le ALI‘I le nu‘u ‘iā te ‘outou, ma ‘ua o‘o mai lo ‘outou mata‘utia ‘iā te i matou, ma ‘ua fa‘avaivaia ‘ona o ‘outou e i latou uma e nonofo i le nu‘u.
10. Auā ‘ua matou fa‘alogo na fa‘amateina e le ALI‘I le suāsami o le sami Ulaula ‘ona o ‘outou, ‘ina ‘ua ‘outou ō mai mai Aikupito; ma mea na ‘outou faia i tupu e to‘alua o sa Amorī o Sekono ma Oko, o ē sa i le la itū o Ioritana, na ‘outou fa‘aumatia i lā‘ua.
11. Na matou fa‘alogo i ia mea, ‘ona liu suāvai ai lea o matou loto, ‘ua lē toe i ai lava se malosi i se tagata, ‘ona o ‘outou; auā o le ALI‘I lo ‘outou Atua, o le Atua ia i le lagi i lugā, ma le lalolagi i lalo nei.
12. O lenei, se‘i ‘oulua tautō mai ‘iā te a‘u i le ALI‘I, auā ‘ua ‘ou agalelei atu ‘iā te ‘oulua, ‘ia ‘oulua agalelei mai fo‘i i le ‘āiga o lo‘u tamā, ma ‘ia ‘oulua tu‘u mai ‘iā te a‘u se fa‘ailoga fa‘amaoni;
13. ma ‘ia ‘outou fa‘aolaina lo‘u tamā, ma lo‘u tinā, ma o‘u tuagane, ma o‘u uso, mai latou uma ‘ua ‘iā te i latou, ma ‘ia lavea‘iina i matou a‘i le oti.”
14. ‘Ona tali mai ai lea o ia tagata ‘iā te ia, “O mā‘ua ola e sui a‘i ‘iā te ‘outou i le oti, pe ‘āfai tou te lē ta‘ua la mā‘ua nei fe‘au. A o‘o ‘ina foa‘iina mai e le ALI‘I le nu‘u ‘iā te i matou, ‘ona matou agalelei ai lea, ma fa‘amaoni ‘iā te oe.”
15. ‘Ona tu‘utu‘u ifo ai lea o ia ‘iā te i lā‘ua i le maea i le fa‘amalama; auā sa i luga o le pā o le ‘a‘ai lona fale, na mau ai ia i luga o le pā.
16. ‘Ona fai atu ai lea o ia ‘iā te i lā‘ua, “‘Inā ō atu ia ‘oulua i le mauga, ne‘i ‘outou fetaia‘i ma ē o tuliloa ‘iā te ‘oulua, ‘ia ‘oulua lalafi ai i po e tolu, se‘ia toe fo‘i mai le tuliloaga, mulimuli ane ‘ona ō ai lea o ‘oulua i lo ‘oulua ala.”
17. ‘Ona fai mai ai lea o ia tagata ‘iā te ia, “E māgalo i mā‘ua i lau tautoga nei, na ma tautō ai ‘ina ‘ua e fai mai.
18. Fa‘auta mai, a matou ō mai i le nu‘u, ia e nonoa lenei maea fu‘a mūmū i le fa‘amalama na e tu‘utu‘u ifo ai i mā‘ua; ‘e te fa‘apotopoto mai ‘iā te oe i lou fale o lou tamā, ma lou tinā, ma ou uso, ‘atoa ma le ‘āiga uma o lou tamā.
19. ‘Ai se tasi e ulu atu i fafo i le faitoto‘a o lou fale, e i luga o lona ulu lona toto, ‘ae māgalo i mā‘ua; ai se tasi lua te i ai ma oe i le fale, e i luga o mā‘ua ulu lona toto pe ‘āfai e o‘o se lima ‘iā te ia.
20. ‘Ae ‘āfai ‘e te ta‘u atu la mā‘ua nei fe‘au, ‘ona māgalo ai lea o i mā‘ua i lau tautoga na e fai mai ma te tautō ai.”
21. ‘Ona fai atu ai lea o ia, “‘Ia fa‘apea ‘ona faia e pei o a ‘oulua ‘upu.” ‘Ua ia tu‘uina atu o i lā‘ua e o, ‘ona la ō ai lea. ‘Ua nonoa fo‘i e ia le maea mūmū i le fa‘amalama.
22. ‘Ona la ō ai lea, ‘ua la o‘o atu i le mauga, ‘ua nonofo ai i aso e tolu, ‘ina se‘ia toe fo‘i mai le tuliloaga; na sā‘ilia i lā‘ua e le tuliloaga i le ala uma, ‘ae le‘i maua.
23. ‘Ona toe fo‘i mai ai lea o ia tagata e to‘alua, ‘ua la ō ifo i le mauga, ma la sopo‘ia atu le vai, ma ō atu ‘iā Iosua le atali‘i o Nuno, ‘ua fa‘amatalaina atu ‘iā te ia o mea uma na o‘o ‘iā te i lā‘ua;
24. na la fai atu fo‘i ‘iā Iosua, “‘Ua tu‘uina mai lava e le ALI‘I le nu‘u uma i o tatou lima; i le ma ‘ua fa‘avaivaia o ē nonofo uma i le nu‘u ‘ona o i tatou.”#