1. O nu‘u nei ‘ua faia ma tofi o le fānauga a Isaraelu i le liliu o Kanana, ‘ua tofia e fai mo i latou e Eleasaro le ositaulaga ma Iosua le atali‘i o Nuno, ma matai sili o itū‘āiga o le fānauga a Isaraelu.
2. ‘Ua faia o latou tofi i le vili mo itū‘āiga e iva ma le vaega o le itū‘āiga, e pei ‘ona fetalai mai o le ALI‘I ‘ia faia e Mose.
3. Auā na avatu e Mose le tofi i itū‘āiga e lua ma le vaega o le itū‘āiga, i le la itū o Ioritana; a ‘ua lē avatu e ia se tofi i sa Levī fa‘atasi ma i latou.
4. Auā o le fānauga a Iosefa e lua itū‘āiga i latou o Manase ma Efaraima. ‘Ua lē avatu fo‘i e i latou se tofi o le lau‘ele‘ele i sa Levī na o ‘a‘ai latou te nonofo ai, ma tuāfanua o i ai mo latou manu ma a latou mea.
5. E pei ‘ona fetalai mai ai o le ALI‘I ‘iā Mose, ‘ua fa‘apea lava ‘ona faia e le fānauga a Isaraelu, ‘ua latou tofia fo‘i le nu‘u.
6. ‘Ona ō mai lea o le fānauga a Iuta ‘iā Iosua i Kilikala; ‘ona fa‘apea mai ai lea ‘iā te ia o Kalepo le atali‘i o Iefune o le sa Kinasā, “‘Ua e silafia le mea na fetalai mai ai le ALI‘I ‘iā Mose le tagata o le Atua ‘iā te i tā‘ua i Katesapanea.
7. Sa fagafulu o‘u tausaga ‘ina ‘ua ‘auina atu a‘u e Mose le ‘au‘auna a le ALI‘I mai Katesapanea e asiasi i le fanua; ‘ona ‘ou ‘aumai ai lea o le ‘upu e tusa ma lo‘u tāofi.
8. A o o‘u uso na o fa‘atasi ma a‘u, na latou fa‘avaivaia loto o le nu‘u; a o a‘u nei, na ‘ou matuā mulimuli atu i le ALI‘I lo‘u Atua.
9. Na tautō fo‘i Mose i lea aso, ‘ua fa‘apea mai, ‘E moni o le nu‘u na solia i ou vae, e fai lea mou tofi ma au fānau e fa‘avavau auā ‘ua e matuā mulimuli i le ALI‘I lo‘u Atua.’
10. O lenei fo‘i, fa‘auta, ‘ua fa‘aolaina a‘u e le ALI‘I, e pei ‘ona fetalai mai o ia, o ia tausaga e fagafulu ma le lima, talu ‘ona fetalai mai le ALI‘I lenei ‘upu ‘iā Mose, a o feoa‘i Isaraelu i le vao; o lenei fo‘i, fa‘auta mai ia, o a‘u nei e valugafulu ma le lima o‘u tausaga i le aso nei.
11. O lo‘o tumau lo‘u malosi i le aso nei e pei o le aso na ‘auina atu ai a‘u e Mose; e pei o lo‘u malosi i lea aso, o lo‘o o fa‘apea fo‘i lo‘u malosi i le aso nei, e tau ai le tau‘a, ma alu atu ma toe sau.
12. O lenei, ‘ia e tu‘uina mai ‘iā te a‘u lenei mauga, na fetalai mai ai le ALI‘I i lea aso; auā ‘ua e fa‘alogo oe i lea aso, sa i lea mea o sa Anakī, ma ‘a‘ai tetele ‘ua nofo ‘olo; ‘āfai e ‘iā te a‘u le ALI‘I, ‘ona ‘ou mafaia lea ‘ona tutuli ‘iā te i latou, e pei ‘ona fetalai mai ai o le ALI‘I.”
13. ‘Ona fa‘amanuia lea o ia e Iosua, ‘ua ia avatu fo‘i o Herepona ‘iā Kalepo le atali‘i o Iefune e fai mōna tofi.
14. O le mea lea na fai ai o Heperona ma tofi o Kalepo le atali‘i o Iefune o le sa Kinasā, e o‘o i le aso nei, ‘ina ‘ua ia matuā mulimuli atu i le ALI‘I le Atua o Isaraelu.
15. O le igoa fo‘i o Heperona anamua o Kiriata-arapa; o Arapa o le tagata sili ia i sa Anakī.‘Ona mapu ai lea o le nu‘u i le tau‘a.#