1. ‘Ua lagona e Atonesateko le tupu o Ierusalema ‘ua ā‘ea e Iosua o Ai, ma ‘ua fa‘aumatia e ia; e pei ‘ona faia e ia i Ieriko ma lona tupu, ‘ua fa‘apea lava ‘ona faia e ia i Ai ma lona tupu; ma ‘ua fa‘alelei ma Isaraelu e ‘ua nonofo i Kipeona, ma latou fa‘atasi ma i latou;
2. ‘ona latou matuā fefefe ai lea, auā o le ‘a‘ai tele lava Kipeona, e pei o se ‘a‘ai o se tupu; auā fo‘i e sili ia i Ai, o ona tagata uma fo‘i e totoa i latou.
3. ‘Ona alu ai lea o le fe‘au a Atonesateko le tupu o Ierusalema ‘iā Oama le tupu o Heperona, ma Pirama le tupu o Iaremuta, ma Iafia le tupu o Lakisa, ma Tiperi le tupu o Ekelona, ‘ua fa‘apea atu,
4. “Ō mai ia ‘iā te a‘u, ma fesoasoani mai ‘iā te a‘u e fasi ‘iā Kipeona; auā ‘ua fa‘alelei i latou ma Iosua ‘atoa ma le fānauga a Isaraelu.”
5. ‘Ona fa‘apotopoto ai lea o tupu e to‘alima o sa Amorī, o le tupu o Ierusalema, o le tupu o Heperona, o le tupu o Iaremuta, o le tupu o Lakisa, o le tupu o Ekelona, ma latou ō a‘e, o i latou, ma a latou ‘au uma, ‘ona latou tolauapi ai lea i Kipeona, ma latou tau ma ia.
6. ‘Ona alu lea o le fe‘au a tagata o Kipeona ‘iā Iosua i le toagalauapi i Kilikala, ‘ua fa‘apea atu, “‘Aua ‘e te lafoa‘iina au ‘au‘auna; ‘ia e fa‘ata‘alise ‘ona alu a‘e ‘iā te i matou, ma fa‘aolaina i matou, ma fesoasoani ‘iā te i matou; auā ‘ua fa‘apotopotoina e tau ma i matou o tupu uma o sa Amorī, o ē nonofo i le atu mauga.”
7. ‘Ona alu a‘e lea o Iosua nai Kilikala, o ia ma ‘au uma o le tau‘a fa‘atasi ma ia, ‘atoa ma toa malolosi uma.
8. ‘Ona fetalai mai lea o le ALI‘I ‘iā Iosua, “‘Aua ‘e te fefe ‘iā te i latou, auā ‘ua ‘ou tu‘uina atu i latou i ou lima; e leai so latou e tu i ou luma.”
9. ‘Ua o‘o fa‘afuase‘i Iosua ‘iā te i latou; na ‘atoa le po o alu a‘e ia nai Kilikala.
10. ‘Ona tulia lea o i latou e le ALI‘I i luma o Isaraelu, ‘ua fasia fo‘i i latou i le fasi tele i Kipeona; ‘ua tuliloa atu ‘iā te i latou i le ala e alu a‘e i Peteorana; ‘ua fasi ‘iā te i latou e o‘o i Aseka ma Maketa.
11. ‘Ua sōsōla i latou i luma o Isaraelu, na i ai i latou i le ifo a‘i i Peteorana, ‘ona lafo ifo lea e le ALI‘I o ma‘a tetele mai le lagi i o latou luga e o‘o i Aseka, ‘ua oti ai i latou; e to‘atele o ē ‘ua oti i uato‘a i ē na fasia e le fānauga a Isaraelu i le pelu.
12. ‘Ona fai atu ai lea o Iosua i le ALI‘I i le aso na tu‘uina mai ai e le ALI‘I o sa Amorī i luma o le fānauga a Isaraelu, ‘ua fa‘apea atu i luma o Isaraelu,“Le lā e, ‘ia tumau oe i luga o Kipeona;ma oe le masina i luga o le vanu o Ailona.”
13. ‘Ona tumau ai lea o le lā, sa tu fo‘i le masina, ‘ina se‘ia tauia e le nu‘u o ē ita ‘iā i latou. E lē ‘ua tusia ‘ea lenei tala i le tusi a Iasera? ‘Ua tumau le lā i totonu o le lagi, ‘ua lē vave ‘ona alu ifo, ‘ua tumau pei o se aso ‘atoa.
14. E leai fo‘i se aso na muamua pe mulimuli, e tusa ma lenā na fa‘afofogaina ai e le ALI‘I le leo o le tagata; auā na tau le tau‘a e le ALI‘I mo Isaraelu.
15. ‘Ona toe fo‘i lea o Iosua ma Isaraelu uma fa‘atasi ma ia i le toagalauapi i Kilikala.
16. A ‘ua sōsōla ia tupu e to‘alima, ma lalafi i latou i le ana i Maketa,
17. sa ta‘ua mai ‘iā Iosua, ‘ua fa‘apea mai, “‘Ua maua tupu e to‘alima, o lo‘o lalafi i latou i le ana i Maketa.”
18. ‘Ona fai atu ai lea o Iosua, “‘Ia fuli ane ni ma‘a tetele i le gutu o le ana, ma tu‘u i ai ni tagata e leoleo ‘iā te i latou.
19. A o ‘outou, ‘aua ne‘i nonofo ‘outou, a ‘ia tuliloa atu i ē ita ‘iā te ‘outou, ma fafasi i ē o mulimuli, ‘aua ne‘i tu‘u atu i latou e o ‘iā latou ‘a‘ai; auā ‘ua tu‘uina mai i latou e le ALI‘I lo ‘outou Atua i o ‘outou lima.”
20. ‘Ua uma ‘ona fasia i latou e Iosua ma le fānauga a Isaraelu i le fasi e matuā tele lava, ‘ua fa‘aumatia i latou; a o ē na sao o i latou na ō atu i latou i ‘a‘ai nofo ‘olo.
21. ‘Ona toe fo‘i mai lea o le nu‘u uma ‘iā Iosua i le toagalauapi i Maketa ‘ua saogalemū.‘Ua leai se tasi e fa‘agāoioi lona laulaufaiva i se tasi o le fānauga a Isaraelu.
22. ‘Ona fai atu ai lea o Iosua, “‘Inā tō ‘ese ia o ma‘a i le gutu o le ana, ma ‘aumai ‘iā te a‘u mai le ana o ia tupu e to‘alima.”
23. ‘Ua fa‘apea fo‘i ‘ona latou faia ‘ua ‘aumai ‘iā te ia mai le ana ia tupu e to‘alima, o le tupu o Ierusalema, o le tupu o Heperona, o le tupu o Iaremuta, o le tupu o Lakisa, o le tupu o Ekelona.
24. ‘Ua ‘aumai e i latou o ia tupu ‘iā Iosua, ‘ona vala‘au atu lea o Iosua, i tagata uma o Isaraelu, ‘ua fa‘apea atu i ē ‘avea ‘au o le tau‘a, o ē na o fa‘atasi ma ia, “‘Inā fa‘alatalata mai ia, ma soli i ua o ia tupu i o ‘outou vae.” ‘Ona latou fa‘alatalata mai ai lea, ma latou soli i o latou ua i o latou vae.
25. ‘Ua fai atu fo‘i Iosua ‘iā te i latou, “‘Aua tou te fefefe, ‘aua fo‘i tou te matata‘u, ‘ia ‘outou malolosi, ma ia loto tetele; auā e fa‘apea lava ‘ona faia e le ALI‘I ē ita mai uma lava ‘iā te ‘outou, tou te tau ma i latou.”
26. E mulimuli ane ‘ua taia i latou e Iosua, ma fasiotia, ma fa‘atautau ‘iā te i latou i la‘au e lima; ‘ona tautau lea o i latou i la‘au ‘ua o‘o i le afiafi.
27. ‘Ua o‘o i le itū aso e goto ai le la, ‘ona fai atu ai lea o Iosua, ‘ona ‘ave ifo ai lea o i latou ai la‘au, ma lafo ‘iā te i latou i le ana na latou lalafi ai; ‘ua latou avane fo‘i ma‘a tetele i le gutu o le ana, e o‘o lava i le aso nei.
28. O le aso lava lea na maua e Iosua o Maketa, ma fasia i le pelu, ‘ua fa‘aumatia fo‘i e ia lona tupu, o i latou, ma tagata uma sa i ai, ‘ua lē fa‘atoe e ia se tasi; ‘ua faia e ia i le tupu o Maketa e pei ‘ona faia e ia i le tupu o Ieriko.
29. ‘Ona ō lea o Iosua ma Isaraelu uma fa‘atasi ma ia nai Maketa i Lipena; ‘ona latou tau ai lea ma Lipena.
30. ‘Ua tu‘uina mai fo‘i e le ALI‘I lea ‘a‘ai ma lona tupu i lima o Isaraelu; ‘ua fasia ai i le pelu, ma tagata uma sa i ai; ‘ua lē fa‘atoeina ai e ia se tasi; ‘ua faia fo‘i e ia i lona tupu e pei ‘ona faia e ia i le tupu o Ieriko.
31. ‘Ona ō lea o Iosua ma Isaraelu uma fa‘atasi ma ia nai Lipena i Lakisa, ma tolauapi i ai, ma tau ai le tau‘a.
32. ‘Ua tu‘uina mai fo‘i e le ALI‘I o Lakisa i lima o Isaraelu, ‘ua latou ā‘ea fo‘i i le aso lua, ‘ua fasia i le pelu, ma tagata uma sa i ai, e pei o mea uma na faia e ia i Lipena.
33. ‘Ona alu a‘e lea o Orama le tupu o Kasera e fesoasoani ‘iā Lakisa; na fasia fo‘i e Iosua o ia ma lona nu‘u, ‘ua lē fa‘atoeina e ia se tasi mo ia.
34. ‘Ua ō fo‘i Iosua ma Isaraelu uma fa‘atasi ma ia nai Lakisa i Ekelona, ma tolauapi i ai, ma tau ai le tau‘a.
35. ‘Ua ā‘ea ai fo‘i e i latou i lea aso, ma latou fasia i le pelu, ‘ua fa‘aumatia e ia i lea aso o tagata uma sa i ai, e pei o mea uma na faia e ia i Lakisa.
36. ‘Ona alu a‘e lea o Iosua ma Isaraelu uma fa‘atasi ma ia nai Ekelona i Heperona, ma tau ai le tau‘a.
37. ‘Ua latou ā‘ea ai, ma fasia i le pelu, ma lona tupu, ma ona ‘a‘ai uma, ma tagata uma sa i ai; ‘ua lē fa‘atoe e ia se tasi, e pei o mea uma na faia e ia i Ekelona, ‘ua fa‘aumatia e ia, ‘atoa ma tagata uma sa i ai.
38. ‘Ona toe fo‘i mai lea o Iosua ma Isaraelu uma fa‘atasi ma ia i Tiperi, ma tau ai le tau‘a.
39. ‘Ona maua ai lea e ia, ma lona tupu, ma ona ‘a‘ai uma; ‘ua fasia i latou i le pelu, ma fa‘aumatia tagata uma sa i ai, ‘ua lē fa‘atoe e ia se tasi; e pei ‘ona faia e ia i Heperona, ‘ua fa‘apea fo‘i ‘ona faia e ia i Tiperi ma lona tupu; e pei ‘ona faia fo‘i e ia i Lipena ma lona tupu.
40. ‘Ua fasia e Iosua o nu‘u uma o i le atu mauga, ma le itū i saute, ma le nu‘u maulalo, ma le ‘ele‘ele laugatasi, ma o latou tupu uma; ‘ua lē fa‘atoe e ia se tasi; a ‘ua fa‘aumatia o mea ola uma, e pei ‘ona poloa‘i mai ai le ALI‘I le Atua o Isaraelu.
41. ‘Ua fasia i latou e Iosua e āfua mai i Katesapanea e o‘o atu i Kasa, ma le nu‘u uma o Kosena e o‘o atu i Kipeona.
42. O ia tupu uma ma o latou lau‘ele‘ele na maua e Iosua i le tau‘a e tasi; auā o le ALI‘I le Atua o Isaraelu na tau e ia le tau‘a mo Isaraelu.
43. ‘Ona toe fo‘i mai ai lea o Iosua ma Isaraelu uma fa‘atasi ma ia i le toagalauapi i Kilikala.