1. O le tofi lenei o le itū‘āiga o le fānauga a Iuta e tusa ma o latou ‘āiga, e o‘o i le tuā‘oi o Etoma, o le vao o Tisina i le itū i saute, o le mea lea e gata mai ai le itū i saute.
2. O lo latou tuā‘oi i le itū i saute ‘ua āfua mai i le mea e gata mai ai le sami ‘O‘ona, e āfua mai fo‘i i le faga e fa‘asaga i le itū i saute;
3. a e alu atu i le itū i saute i le ā‘ega o Akarava, ma ui atu i Tisina, ma alu a‘e i le itū i saute i Katesapanea, ma ui ai i Hasaronu, ma alu a‘e i Atara, ma ui ane i Karaka;
4. ‘ona ui atu ai lea i Asemoni, ma alu atu i le alia o Aikupito; o lona gata‘aga mai o lea tuā‘oi o le sami lea o lo ‘outou tuā‘oi lea i le itū i saute.
5. O le tuā‘oi i sasa‘e o le sami ‘O‘ona, e o‘o atu i le mea e gata mai ai Ioritana.O le tuā‘oi i le itū i matū e āfua mai i le faga o le sami i le mea e gata mai ai Ioritana.
6. ‘Ae alu a‘e le tuā‘oi i Peteokelu, ma ui ai i le itū i matū o Petearapa ‘ua alu a‘e fo‘i le tuā‘oi i le ma‘a o Poana le atali‘i o Reupena.
7. ‘Ona alu a‘e ai lea o le tuā‘oi i Tiperi mai le vanu o Akori, e ui ai i le itū i matū e fa‘asaga atu i Kilikala, e feagai ma le ā‘ega i Atumema, o i le itū i saute o le alia; ‘ona ui ai lea o le tuā‘oi i le vai o Enesemesa, o lona gata‘aga mai o i Enerokelu.
8. ‘Ona alu a‘e ai lea o le tuā‘oi i le vanu o le atali‘i o Hinoma e o‘o atu i le itū i saute o sa Iepusē, o Ierusalema lea e alu a‘e fo‘i le tuā‘oi i le tumutumu o le mauga e feagai ma le vanu o Hinoma i sisifo, o i le mea e gata mai ai le vanu o sa Rafā i le itū i matū;
9. ‘ua tusia fo‘i le tuā‘oi e āfua mai i le tumutumu o le mauga, e o‘o atu i le vaipuna o Nafatoa, ‘ua alu atu fo‘i i ‘a‘ai o le mauga o Eferona; ‘ua tusia fo‘i le tuā‘oi i Paala, o Kiriata-iarima lea.
10. ‘Ona afe lea o le tuā‘oi mai Paala i sisifo, e o‘o atu i le mauga o Seira, ‘ua ui atu fo‘i i le tafatafa o le mauga o Iarima i le itū i matū, o Kasalona lea; ‘ona alu ifo ai lea i Petesemesa, ma ui atu ai i Timena.
11. ‘Ua alu atu le tuā‘oi le tafatafa o Ekerona i le itū i matū; ‘ua tusia fo‘i le tuā‘oi i Sekerona, ma ui ai i le mauga o Paala ma alu atu i Iapenelu; o lona gata‘aga mai o le tuā‘oi o le sami lea.
12. O le tuā‘oi i sisifo o le sami tele lea ma ona tuā‘oi o le tuā‘oi lea o le fānauga a Iuta e fa‘ata‘ali‘oli‘o ai e tusa ma o latou ‘āiga.
13. ‘Ua avatu fo‘i e ia se tofi ‘iā Kalepo le atali‘i o Iefune fa‘atasi ma le fānauga a Iuta, e pei o le afioga a le ALI‘I ‘iā Iosua, o le ‘a‘ai o Arapa le tamā o Anakī, o Heperona lea.
14. ‘Ona tulia lea ai lea mea e Kalepo le atali‘i e to‘atolu o Anaki, o Sesai ma Aimano ma Talemai, o le fānau a Anaki.
15. ‘Ona alu a‘e lea o ia ai lea mea i ē o nonofo i Tiperi; (o le igoa fo‘i o Tiperi anamua o Kiriata-sapera.)
16. ‘Ona fai atu ai lea o Kalepo, “O sē na te fasia Kiriata-sapera ma na maua, ‘ou te avatu ‘iā te ia o Akesa lo‘u afafine e fai māna avā.”
17. ‘Ona maua lea e Otinielu le atali‘i o Kinasa, le uso o Kalepo; ‘ua avatu e ia ‘iā te ia o Akesa lona afafine e fai māna avā.
18. ‘Ua alu atu o ia, ‘ona fa‘aoso atu lea o ia ‘iā te ia, ‘ia ole atu i lona tamā i se fanua. ‘Ua alu ifo o ia nai le asini, ‘ona fai mai ai lea o Kalepo ‘iā te ia, “Se a ‘ea lou mana‘o?”
19. ‘Ona fai atu lea o ia, “‘Ia e foa‘i mai ‘iā te a‘u se mea alofa; ‘ua e avane ‘iā te a‘u le fanua i le itū i saute, ‘ia e foa‘i mai fo‘i ‘iā te a‘u ma ni vaipuna.” ‘Ona avatu ai lea e ia ‘iā te ia o vaipuna o i luga ma vaipuna o i lalo.
20. O le tofi lenei o le itū‘āiga o le fānauga a Iuta, e tusa ma o latou ‘āiga.
21. O ‘a‘ai tupito o le itū‘āiga o le fānauga a Iuta, i le tuā‘oi o Etoma i le itū i saute, o Kapeseelu, ma Eteru, ma Iakuri,
22. ma Kina, ma Timuna, ma Atata,
23. ma Katesa, ma Hasora, ma Itanana,
24. o Sefa, ma Telema, ma Paalota,
25. ma Hasora, ma Hatata, ma Kiriota, ma Hasaronu, o Hasora lea;
26. o Amama, ma Sema, ma Molata,
27. ma Asarakata, ma Hasamoni, ma Petepaleta,
28. ma Asara-suala, ma Peresepa, ma Pisetia,
29. o Paala, ma Iima, ma Asema,
30. ma Elitolita, ma Kiselu, ma Horema,
31. ma Sekeleka, ma Matamana, ma Sanesana,
32. ma Lepaota, ma Seleima, ma Aino, ma Rimoni; o ‘a‘ai uma ia e lua sefulu ma le iva, ‘atoa ma o latou faoa ‘a‘ai.
33. O i le nu‘u maulalo, o Esetaola, ma Soraa, ma Asena,
34. ma Sanoa, ma Enekanima, o Tapua, ma Enama,
35. o Iaremuta, ma Atulame, o Suka, ma Aseka,
36. ma Saraima, ma Atitaima, ma Ketere, ma Keteretaima; o ‘a‘ai e sefulu ma le fa ‘atoa ma o latou faoa ‘a‘ai.
37. O Senana, ma Hatesa, ma Meketala-kato,
38. ma Tileano, ma Mesepa, ma Iokatielu,
39. o Lakisa, ma Posekata, ma Ekelona,
40. ma Kapona, ma Lakemase, ma Kitelisa,
41. ma Kiterota, o Petetakona, ma Naama, ma Maketa; o ‘a‘ai o sefulu ma le ono, ma o latou faoa ‘a‘ai.
42. O Lipena, ma Eteru, ma Asana,
43. ma Iefeta, ma Asena, ma Nisepa,
44. ma Kaila, ma Akasepa, ma Morese; o ‘a‘ai e iva, ma o latou faoa ‘a‘ai.
45. O Ekerona, ma ona ‘a‘ai, ma ona faoa ‘a‘ai.
46. E āfua mai i Ekerona ma le sami, o ‘a‘ai uma e latalata i Asetota, ma o latou faoa ‘a‘ai.
47. O Asetota, ma ona ‘a‘ai, ma ona faoa ‘a‘ai, o Kasa, ma ona ‘a‘ai, ma ona faoa ‘a‘ai, e o‘o atu i le alia o Aikupito, ma le sami tele, ma ona tuā‘oi.
48. O i le atu mauga, o Samira ma Iatira, ma Suka,
49. ma Tana, ma Kiriata-sena, o Tiperi lea,
50. ma Anapa, ma Esetemoa, ma Anima
51. ma Kosena, ma Holona, ma Kilo; o ‘a‘ai e sefulu ma le tasi, ma o latou faoa ‘a‘ai.
52. O Arapa, ma Tuma, ma Eseana,
53. ma Ianuma, ma Petetapua, ma Afeka,
54. ma Umeta, ma Kiriata-arapa, o Heperona lea, ma Seora; o ‘a‘ai e iva ma o latou faoa ‘a‘ai.
55. O Meona, ma Karamelu, ma Sofa, ma Iutaa,
56. ma Isereelu, ma Iakatoma, ma. Sanoa;
57. o Kaino, o Kipea, ma Timena; o ‘a‘ai e sefulu ma o latou faoa ‘a‘ai.
58. O Aliula, o Petesura, ma Kitoru,
59. ma Mearata, ma Peteanata, ma Aletekono; o ‘a‘ai e ono ma o latou faoa ‘a‘ai.
60. O Kiriatapaata, o Kiriata-iarima lea, ma Rapa; o ‘a‘ai e lua ma o la faoa ‘a‘ai.
61. O i le vao, e Petearapa, o Metina, ma Sekaka,
62. ma Nivasana, ma le ‘a‘ai o masima ma Enokati; o ‘a‘ai e ono ma o latou faoa ‘a‘ai.
63. A o sa Iepusē, o ē nonofo i Ierusalema, na lē mafai ‘ona tulia i latou e le fānauga a Iuta; a ‘ua nonofo fa‘atasi o sa Iepusē ma le fānauga a Iuta i Ierusalema ‘ua o‘o i le aso nei.#