1. ‘Ua fa‘apotopotoina le fa‘apotopotoga uma o le fānauga a Isaraelu i Sailo, ‘ona fa‘atūina ai lea e i latou o le fale fetāfa‘i o le fa‘apotopotoga. ‘Ua to‘ilalo fo‘i le nu‘u ‘iā te i latou.
2. Na totoe i le fānauga a Isaraelu o itū‘āiga e fitu o ē na lē maua e i latou o latou tofi.
3. ‘Ona fai atu ai lea o Iosua i le fānauga a Isaraelu “Tou te fa‘avaivai se‘ia afea ‘ina ‘ua lē ō atu e fai mo ‘outou le nu‘u ‘ua foa‘iina atu ‘iā te ‘outou e le ALI‘I le Atua o ‘outou tamā.
4. ‘Inā tofia mai ia e ‘outou ni tagata e ta‘ito‘atolu i itū‘āiga; ‘ou te ‘auina atu fo‘i i latou, latou te tula‘i atu, ma feoa‘i i le nu‘u, ma latou tusia e tusa ma o latou tofi; ma latou ō mai ‘iā te a‘u.
5. E vaevaeina fo‘i e i latou i vaega e fitu e tumau Iuta i lona tuā‘oi i le itū i saute; ma le ‘āiga o Iosefa, e tumau i latou i lo latou tuā‘oi i le itū i matū.
6. A ‘ia ‘outou tusia le nu‘u i vaega e fitu, ma ‘aumai le tusi ‘iā te a‘u ‘i‘inei, ‘ina ‘ia ‘ou faia le vili mo ‘outou i le mea nei i luma o le ALI‘I lo tatou Atua.
7. Auā o sa Levī e leai so latou tofi fa‘atasi ma ‘outou; auā o le faiva o ositaulaga i le ALI‘I o lo latou tofi lea o Kato fo‘i, ma Reupena, ma le tasi vaega o le itū‘āiga o Manase, ‘ua maua e i latou o latou tofi i le la itū o Ioritana i sasa‘e, na avatu e Mose le ‘au‘auna a le ALI‘I ‘iā te i latou.”
8. ‘Ona tula‘i atu lea o ia tagata, ma latou o; ‘ua fai atu fo‘i Iosua i ē a ō ‘ia tusia le nu‘u, ‘ua fa‘apea atu. “‘Inā ō ia, ma feoa‘i i le nu‘u, ma tusi ai, i le tou fo‘i mai ‘iā te a‘u, ‘ina ‘ia ‘ou faia le vili mo ‘outou i le mea nei i luma o le ALI‘I i Sailo.”
9. ‘Ona ō ai lea o ia tagata, ma latou ui ai i le nu‘u, ma latou tusia ‘a‘ai i le tusi, i vaega e fitu, ‘ona latou ō mai ai lea ‘iā Iosua i le toagalauapi i Sailo.
10. ‘Ona faia lea e Iosua o le vili mo i latou i Sailo i luma o le ALI‘I; ‘ua tofia fo‘i mo i latou i lea mea e Iosua le nu‘u mo le fānauga a Isaraelu, e tusa ma o latou vaega.
11. ‘Ua fa‘asaga le vili i le itū‘āiga o le fānauga a Peniamina, e tusa ma o latou ‘āiga ‘ua alu atu fo‘i le tuā‘oi o le latou tofi i le vā o le fānauga a Iuta, ma le fānauga a Iosefa.
12. ‘Ua fai lo latou tuā‘oi i le itū i matū e āfua mai i Ioritana; ‘ona alu a‘e lea o le tuā‘oi i tafatafa o Ieriko i le itū i matū, ma alu a‘e i le atu mauga i sisifo; o lona gata‘aga o le vao o Petavene.
13. ‘Ona ui atu ai lea o le tuā‘oi ai lea mea i Lusa, i tafatafa o Lusa, o Peteli lea, i le itū i saute; ‘ona alu ifo ai lea o le tuā‘oi i Atarota-atara, e lata ane i le mauga o i le itū i saute o Peteorana i lalo.
14. ‘Ua tusia ai le tuā‘oi, ‘ona afe ane lea i le itū i sisifo i le itū i saute, e āfua mai i le mauga o lo‘o feagai ma Peteorana i le itū i saute; o lona gata‘aga o Kiriata-paala, o Kiriata-iarima lea, o le ‘a‘ai o le fānauga a Iuta. O le itū i sisifo lea.
15. O le itū i saute, ‘ua āfua mai i le mea e gata mai ai Kiriata-iarima, ‘ona alu atu lea o le tuā‘oi i sisifo, ma alu atu i le vaipuna o Nafatoa;
16. ‘ona alu ifo ai lea o le tuā‘oi i lea mea e gata mai ai le mauga o lo‘o feagai ma le vanu o le atali‘i o Hinoma, o i le vanu o sa Rafā i le itū i matū, ‘ona alu ifo ai lea i le vanu o Hinoma i tafatafa o Iepuse i le itū i saute, ma alu ifo i Enerokelu.
17. ‘Ua tusia e āfua mai i le itū i matū, ma alu atu i Enesemesa, ma alu atu i Kelilota o lo‘o feagai ma le ā‘ega i Atumema, ma alu ifo i le ma‘a o Poana le atali‘i o Reupena.
18. ‘Ona ui ai lea e fa‘atafatafa ane, e feagai ma Arapa i le itū i matū, ma alu ifo i Arapa;
19. ‘ona ui ai lea le tuā‘oi i tafatafa o Peteokelu i le itū i matū; o lona gata‘aga o le tuā‘oi o le faga i le itū i matū o le sami ‘O‘ona, i le mea e gata mai ai Ioritana i le itū i saute. O le tuā‘oi i le itū i saute lea.
20. O Ioritana o lona tuā‘oi lea i le itū i sasa‘e o le tofi lea o le fānauga a Peniamina, ma ona tuā‘oi e fa‘ata‘ali‘oli‘o ai, e tusa ma o latou ‘āiga.
21. O ‘a‘ai fo‘i nei o le itū‘āiga o le fānauga a Peniamina e tusa ma o latou ‘āiga; o Ieriko, ma Peteokelu, ma le vanu o Kisesa,
22. ma Petearapa, ma Semaraima, ma Peteli,
23. ma Gavima, ma Para, ma Ofira,
24. ma Kifa-amoni, ma Ofini, ma Kipea; o ‘a‘ai e sefulu ma le lua, ma o latou faoa ‘a‘ai.
25. O Kipeona, ma Rama, ma Perota,
26. ma Mesepa, ma Kafira, ma Mosa,
27. ma Rekema, ma Irefelu, ma Taralu,
28. ma Sela, ma Elifa, ma Iepuse, o Ierusalema lea, o Kipiata, ma Kiriata; o ‘a‘ai e sefulu ma le fa, ma o latou faoa ‘a‘ai. O le tofi lea o le fānauga a Peniamina, e tusa ma o latou ‘āiga.#