1. ‘Ua fetalai mai le ALI‘I ‘iā Iosua, “‘Aua ‘e te fefe, ‘aua ‘e te mata‘u, tou te ō ma ‘au uma o le tau‘a, ‘ia tula‘i ma alu a‘e i Ai; fa‘auta, ‘ua ‘ou tu‘uina i ou lima le tupu o Ai, ma ona tagata, ma lana ‘a‘ai, ma lona lau‘ele‘ele.
2. ‘E te faia fo‘i i Ai ma lona tupu, e pei ‘ona e faia, i Ieriko ma lona tupu, a o le vete, ma manu ‘ua i ai, tou te fai ma a ‘outou vete. ‘Ia e tofia ni ‘au e tanu i tua o le ‘a‘ai.”
3. ‘Ona tula‘i ai lea o Iosua, ‘atoa ma ‘au uma o le tau‘a, e ō a‘e i Ai; na filifilia fo‘i e Iosua o toa malolosi e tolu sefulu o afe, ma ‘a‘auina atu i latou i le po.
4. ‘Ua ia fai atu fo‘i ‘iā te i latou, ‘ua fa‘apea atu, “Fa‘auta mai ‘ea, ‘ia tanu ‘outou e latalata i le ‘a‘ai, i tua o le ‘a‘ai; ‘aua ne‘i mamao lava ‘outou ma le ‘a‘ai, a ‘ia nofo sauni ‘outou uma lava;
5. o a‘u fo‘i ma le nu‘u uma o ‘iā te a‘u, matou te fa‘alatalata atu i le ‘a‘ai; a latou ō mai e fa‘afetaia‘i ‘iā te i matou, e pei o le ulua‘i tau‘a, ‘ona fa‘atulitulia ai lea o i matou i o latou luma;
6. (auā latou te ō mai ‘iā te i matou,) se‘ia matou tōsina i latou ai le ‘a‘ai; auā e fa‘apea ane i latou, ‘‘Ua latou sōsōla i o tatou luma, e pei o le ulua‘i tau‘a;’ o le mea lea matou te sōsōla ai i o latou luma.
7. ‘Ona ‘outou tula‘i ai lea i le mea ‘ua tanu ai, ma ‘outou ā‘ea le ‘a‘ai; auā e tu‘uina mai e le ALI‘I lo ‘outou Atua i o ‘outou lima.
8. A ‘outou maua le ‘a‘ai, ‘ona susunuina lea e ‘outou o le ‘a‘ai i le afi; ‘ia ‘outou faia e pei o le afioga a le ALI‘I; fa‘auta, ‘ua ‘ou fai atu ‘iā te ‘outou.”
9. ‘Ua ‘a‘auina atu i latou e Iosua; ‘ona latou ō ai lea e tanu ‘iā latou ‘au; ‘ua latou nonofo i le vā o Peteli ma Ai, i gagaifo o Ai; a o Iosua, na moe ia i lea po fa‘atasi ma le nu‘u.
10. ‘Ua tula‘i Iosua i le taeao lava, na faitaulia e ia le nu‘u; ‘ona ō a‘e lea i Ai, o ia ma toeaina o Isaraelu, ‘ua muamua i luma o le nu‘u.
11. ‘Ua ō a‘e fo‘i ‘au uma o le tau‘a na ‘iā te ia, ‘ua latou fa‘alatalata atu, ‘ua o‘o lava i luma o le ‘a‘ai, ‘ona latou tolauapi lea i le itū i matū o Ai; a o le vanu e vā a‘i o ia ma Ai.
12. A ‘ua uma ‘ona ‘ave e ia o tagata pe lima afe, ma tofia i latou e lalafi i le vā o Peteli ma Ai, i gagaifo o le ‘a‘ai.
13. ‘Ua tofia fo‘i e i latou le nu‘u, o ‘au uma na i le itū i matū o le ‘a‘ai, ma ē na lalafi i le itū i gagaifo o le ‘a‘ai, ‘ona alu ai lea o Iosua i lea po i totonu o le vanu.
14. ‘Ua iloa ai e le tupu o Ai, ‘ona latou fa‘ata‘alise ai lea ‘ona tula‘i i le taeao; ‘ua ō mai fo‘i tagata o le ‘a‘ai e fetaia‘i ma Isaraelu e tau le tau‘a, o ia ‘atoa ma lona nu‘u uma i le itū aso na tu‘u i ai, i le ‘ele‘ele laugatasi, a ‘ua lē iloa e ia o ‘au na tanu i tua o le ‘a‘ai e tau ma ia.
15. ‘Ona fa‘atagā fasia lea o Iosua, ma Isaraelu uma i o latou luma; ma latou sōsōla i le ala i le vao.
16. ‘Ona fa‘apotopotoina lea o tagata uma na i Ai e tuliloa atu ‘iā te i latou; ‘ua latou tuliloa ‘iā Iosua, ‘ona tōsina ai lea o i latou nai le ‘a‘ai.
17. ‘Ua lē fa‘atoeina se tagata i Ai ma Peteli, a ‘ua uma atu i tua o Isaraelu; na tu‘u avanoa fo‘i e i latou le ‘a‘ai, ma latou tuliloa atu ‘iā Isaraelu.
18. ‘Ona fetalai mai lea o le ALI‘I ‘iā Iosua, “‘Ia e fa‘aloaloa le tao o i lou lima i Ai; auā ‘ou te tu‘uina atu ai i lou lima.” ‘Ona fa‘aloaloa lea e Iosua o le tao na i lona lima i le ‘a‘ai.
19. ‘Ona vave laga ai lea o ‘au sa tanu, a‘i le mea na latou i ai, ma latou taufetuli atu ‘ina ‘ua fa‘aloaloa lona lima; ‘ona latou ō atu lea i le ‘a‘ai, ma latou maua, ma latou fa‘avave ‘ona fa‘amūina o le ‘a‘ai i le afi.
20. ‘Ona tetepa lea i tua tagata o Ai, ‘ua latou iloa, fa‘auta mai fo‘i, ‘ua alu a‘e le asu o le ‘a‘ai i le lagi; ‘ona lē toe i ai lea se malosi ‘iā te i latou, e sōsōla i lea itū po o lea itū; o tagata fo‘i na sōsōla atu i le vao, ‘ua liliu mai i ē na tuliloa atu ‘iā te i latou.
21. ‘Ua iloa e Iosua ma Isaraelu uma, ‘ua maua le ‘a‘ai e ‘au na tanu, na alu a‘e fo‘i le asu o le ‘a‘ai; ‘ona latou toe fo‘i mai ai lea, ma latou fasia tagata o Ai.
22. ‘Ua ō mai fo‘i i latou nai le ‘a‘ai e fetaia‘i ma i latou; sa i le vā o Isaraelu i latou, o isi i lea itū ma isi i lea itū; ‘ua latou fasi ‘iā te i latou ‘ua lē toe se tasi, pe sao se tasi o i latou.
23. ‘Ua latou pu‘e ola le tupu o Ai, ma avane o ia ‘iā Iosua.
24. ‘Ua uma ‘ona fasia e Isaraelu o ē na nonofo uma i Ai, i le fanua i le vao na tuliloaina ai i latou; ‘ua fasia i latou uma i le pelu, ‘ua fa‘aumatia; ‘ona toe fo‘i mai ai lea o Isaraelu uma i Ai, ma latou fasia ai i le pelu.
25. O i latou uma na fasia i lea aso, o tane ‘atoa ma fafine, e sefulu o afe ma afe e lua, o tagata uma o Ai.
26. Auā na lē toe fa‘afo‘i mai e Iosua lona lima na fa‘aloaloa atu ma le tao, se‘ia matuā fa‘aumatia e ‘iā i latou o ē na nonofo uma i Ai.
27. Na o manu, ma le vete o lea ‘a‘ai, na ‘ave e Isaraelu mā latou, e tusa ma le afioga a le ALI‘I na ia fetalai atu ai ‘iā Iosua.
28. ‘Ua susunuina e Iosua o Ai, ‘ua na faia fo‘i ma faupu‘egama‘a e fa‘avavau, e fa‘atafunaina lava e o‘o i le aso nei.
29. ‘Ua fa‘atautauina fo‘i e ia le tupu o Ai i le la‘au ‘ua o‘o i le afiafi ‘ua goto le la, ‘ona fai atu ai lea o Iosua ‘iā latou ‘ave ifo lona tino i le la‘au, ma lafo ai i le mea e ui atu ai i le faitoto‘a o le ‘a‘ai, ma fa‘aputuina i ona luga le faupu‘egama‘a tele, ‘ua o‘o i le aso nei.
30. ‘Ona ati a‘e lea e Iosua o le fatafaitaulaga i le ALI‘I, le Atua o Isaraelu, i le mauga o Evalu,
31. e pei ‘ona poloa‘i mai ai o Mose le ‘au‘auna a le ALI‘I i le fānauga a Isaraelu, e pei ‘ona tusia i le tusi o le tulafono a Mose, “o le fatafaitaulaga e fai i ma‘a ‘ato‘atoa, e lē talai ai e se tasi i se u‘amea;” ‘ona latou fai ai lea i ona luga o taulaga mū i le ALI‘I, ‘ua faia fo‘i e i latou taulaga fa‘afetai.
32. ‘Ua tusia fo‘i e ia i lea mea luga o na ma‘a, o le ata o le tulafono a Mose, na tusia e ia i luma o le fānauga a Isaraelu.
33. O Isaraelu uma fo‘i, ma o latou toeaina, ma le ‘au faipule, ma o latou fa‘amasino, ‘ua latou tutū i lea itū ma lea itū o le ‘atola‘au i luma o ositaulaga o sa Levī o ē na tau‘ave le ‘atola‘au o le feagaiga a le ALI‘I; o le tagata ‘ese ‘atoa ma le tama a le ‘ele‘ele; o le tasi vaega o i latou e feagai ma le mauga o Keresema; ma le isi vaega o i latou e feagai ma le mauga o Evalu; e pei ‘ona poloa‘i mai ai o Mose le ‘au‘auna a le ALI‘I anamua, latou te fa‘amanuia ai le nu‘u o Isaraelu.
34. E mulimuli ane ‘ua faitauina e ia ‘upu uma o le tulafono, O le manuia ma le malaia; e pei o mea uma ‘ua tusia i le tusi o le tulafono.
35. ‘Ua leai se ‘upu o ‘upu uma na poloa‘i mai ai Mose, e le‘i faitaulia e Iosua i luma o le fa‘apotopotoga uma o Isaraelu, ma fafine, ma tamaiti, ma tagata ‘ese na feoa‘i ma i latou.#