1. Mao kini ang mensahe bahin sa Tyre:Panghilak kamong mga naglawig sa Tarshish kay naguba na ang inyong pantalan sa Tyre! Gisugilon na kini kaninyo sa mga naggikan sa Kitim.
2. Paghilom kamo nga mga nagapuyo sa isla, apil na kamong mga negosyante sa Sidon. Ang inyong mga negosyante nga nagpaadunahan kaninyo naglawig
3. sa mga kadagatan sa pagpalit ug pagbaligya sa mga abot sa Shihor nga sakop sa Suba sa Nilo. Ug nakignegosyo kaninyo ang mga kanasoran.
4. Maulaw ka, Sidon! Ikaw nga dalangpanan sa mga tawo nga nagapuyo sa duol sa dagat! Gisalikway ka na sa kadagatan nga nagaingon, “Wala akoy anak. Wala akoy gisagop nga batang lalaki o babaye.”
5. Magsubo ang mga Ehiptohanon kon madunggan nila ang nahitabo sa Tyre.
6. Panghilak kamo nga mga nagapuyo sa isla. Tabok kamo ngadto sa Tarshish!
7. Kanhi malipayon kining siyudad sa Tyre nga gitukod sa unang panahon kansang mga katawhan nakaabot ug misakop sa halayong mga dapit. Apan karon, unsa na ang nahitabo kaniya?
8. Kinsa ba ang nagplano niini batok sa Tyre, ang lungsod nga misakop sa mga dapit, ug kansang mga dungganon nga mga negosyante inila sa kalibotan?
9. Ang Ginoo nga Makagagahom mao ang nagplano niini aron ipaubos ang mga nagapasigarbo sa iyang pagkagamhanan ug ang giila nga mga bantogan sa kalibotan.
10. Kamong mga lumulupyo sa Tarshish, moagi kamo nga malinawon sa Tyre sama sa Suba sa Nilo nga nagadagayday nga malinawon, tungod kay wala nay mopugong kaninyo.
11. Giisa sa Ginoo ang iyang kamot ngadto sa dagat sa paglaglag niini, busa nangurog sa kahadlok ang mga gingharian. Nagmando siya nga gubaon ang mga lig-ong depensa sa Fenicia.
12. Miingon ang Ginoo, “Mga lumulupyo sa Sidon, human na ang inyong paglipay. Nalaglag na kamo! Bisan magpahilayo kamo ngadto sa Cyprus, wala gihapon kamoy kapahulayan didto.”
13. Tan-awa ninyo ang yuta sa mga taga-Babilonia. Hain na karon ang katawhan niini? Gihimo sa Asiria kining dapita nga puloy-anan sa mga mananap nga ihalas. Kay gisulong nila kini, gibungkag ang lig-ong mga bahin niini, ug gipasagdan nga guba ang dapit.
14. Panghilak kamong mga naglawig sa Tarshish, kay naguba na ang siyudad nga inyong dalangpanan.
15. Kalimtan ang Tyre sulod sa 70 ka tuig, nga mao ang katas-on sa kinabuhi sa hari. Apan pagkahuman niana, mahimo siyang sama sa usa ka babayeng nagabaligya sa iyang dungog nga gihisgotan niini nga kanta: “Ikaw nga babayeng nagabaligya sa imong dungog, gikalimtan ka na.
16. Busa kuhaa ang imong harpa, ug ayoha kini pagtukar samtang nagalibot ka sa siyudad. Daghana ang imong kanta, aron ikaw mahinumdoman.”
17. Pagkahuman sa 70 ka tuig, hinumdoman sa Ginoo ang Tyre. Apan himuon pag-usab sa Tyre ang gihimo niya kaniadto, sama sa ginahimo sa babayeng nagabaligya sa iyang dungog. Himuon niya ang daotan aron makakuwarta siya gikan sa tanang mga gingharian sa kalibotan.
18. Apan sa kaulahian, ang iyang ginansiya dili tipigan kondili ihalad sa Ginoo aron ipalit ug daghang pagkaon ug maayong matang sa mga bisti alang sa mga tawo nga nagaalagad sa Ginoo.