1. Sa tuig nga namatay si Haring Uzia, nakita ko ang Ginoo nga nagalingkod sa habog kaayong trono. Ang iyang taas nga bisti milukop sa tibuok templo.
2. May mga langitnong binuhat sa ibabaw niya. Ang matag usa niini may unom ka pako: ang duha ka pako gitabon sa ilang nawong, ang duha gitabon sa ilang mga tiil, ug ang laing duha gigamit nila sa paglupad.
3. Nag-ingnanay sila sa usag usa,“Balaan, balaan, balaan ang Ginoo nga Makagagahom! Ang iyang gamhanang presensya milukop sa tibuok kalibotan.”
4. Sa ilang mga tingog, natay-og ang mga patukoranan sa templo ug napuno sa aso ang templo.
5. Unya miingon ako, “Alaot ako! Sigurado gayod nga laglagon ako, tungod kay daotan ang akong mga ginapanulti ug nagapuyo ako uban sa mga tawong nagasulti usab ug daotan. Ug karon, nakita ko gayod ang Hari, ang Ginoo nga Makagagahom.”
6. Unya ang usa sa mga langitnong binuhat milupad paingon kanako nga nagadala ug baga nga kinuha niya gikan sa halaran.
7. Gipadapat niya ang baga sa akong baba ug miingon, “Midapat na kini sa imong baba, busa wala ka nay sala kay gipasaylo ka na.”
8. Unya nadungog ko ang tingog sa Ginoo nga nag-ingon, “Kinsa ang akong ipadala? Kinsa ang moadto alang kanamo?” Mitubag ako, “Ako! Ako ang ipadala.”
9. Miingon siya, “Lakaw ug sultihi ang katawhan sa Israel, ‘Bisan sige kamog pamati, dili gihapon kamo makasabot. Bisan sige kamog tan-aw, dili gihapon kamo makakita.’ ”
10. Unya miingon pa siya, “Pagahia ang kasingkasing niining mga tawhana. Bungola sila ug butahi, kay basig makakita, makadungog, ug makasabot sila, ug mobalik sila kanako, ug mamaayo sila.”
11. Nangutana ako, “Unsa kadugay, Ginoo?” Mitubag siya, “Hangtod nga magun-ob ang mga lungsod sa Israel ug wala nay tawo. Hangtod nga wala nay mopuyo sa mga balay ug ang yuta malaglag sa hingpit.
12. Hangtod nga abugon ko ang mga Israelinhon ug ang ilang yuta mahimong awaaw.
13. Bisan pag may mahibilin nga ikanapulo nga bahin sa mga Israelinhon sa yuta sa Israel, laglagon gihapon sila. Apan may gipili ako gikan kanila nga mahibilin. Sama sila sa tuod sa kahoyng terebinto nga giputol.”