1. O lo‘o fa‘apea ‘ona fetalai mai o le ALI‘I:O le lagi o lo‘u nofoa lea,o le lalolagi o le mea e tu ai o‘u vae lea.O ifea le fale tou te faia mo a‘u?O ifea fo‘i le mea ‘ou te mālōlō ai?
2. Na faia ia mea uma e o‘u lima;sa i ai lava ia mea uma,‘ua fetalai mai ai le ALI‘I;A o lenei le tagata ‘ou te va‘ai i ai,o lē ‘ua fa‘amaulalo ma le loto tigā,o lē ‘ua gatete fo‘i i la‘u ‘upu.
3. O lē ‘ua fasi le povi, o le fasi tagata lea;o lē ‘ua fai taulaga i le tama‘i mamoe,o lē vāea le ua o le maile lea.O lē ‘ua faia le taulaga i mea e ‘ai,‘ua faitaulaga lea i le toto o le pua‘a;o lē ‘ua fai le fa‘amanatuga i le pulu lipano,o le fa‘amanū lea i le tupua;O i latou nei fo‘i, ‘ua latou filifilia o latou lava ala;‘ua fiafia fo‘i o latou loto ‘iā latou mea ‘inosia.
4. O a‘u fo‘i, ‘ou te filifili i mea latou te tigā ai,‘ou te fa‘ao‘o fo‘i ‘iā te i latou o mea latou te fefefe ai.Auā na ‘ou vala‘au, a ‘ua leai sē na tali mai;na ‘ou fai atu, a ‘ua latou lē fa‘alogo mai;‘ua latou faia le mea leaga i o‘u luma,‘ua latou filifilia fo‘i le mea ‘ou te lē fiafia i ai.
5. Fa‘alogo mai ia i le ‘upu a le ALI‘I,‘outou o ē gatete i lana ‘upu,O ‘outou uso, o ē ‘ino‘ino ‘iā te ‘outouma tutuli ‘iā te ‘outou ‘ona o lo‘u igoa,‘ua latou fai ane, “‘Ia vi‘ia le ALI‘I;”matou te va‘aia fo‘i lo ‘outou ‘oli‘oli,‘ae māsiasi lava i latou.
6. O le leo o le vāvāō mai le ‘a‘ai!o le leo mai le malumalu.O le si‘ufofoga o le ALI‘I,o lo‘o taui atu le taui i ē ita ‘iā te ia.
7. ‘Ua ia fānau mai a o le‘i fa‘amāsuisui;na ia fānau mai le tama tane a o le‘i o‘o ‘ina fa‘atigā.
8. O ai ‘ea ‘ua fa‘alogo i se mea fa‘apenā?O ai ‘ea ‘ua va‘ai i ni mea fa‘apenā?E fa‘atigā ‘ea se nu‘u i le aso e tasi?E fānaua mai loa ‘ea se nu‘u?Auā na fa‘atigā,‘ua fānaua mai fo‘i Siona ana tama tane.
9. ‘Ou te fa‘afa‘atigā, a ‘ou te lē fa‘afānau ‘ea?‘ua fetalai mai ai le ALI‘I;‘ou te fa‘afānau, ma a‘u punitia?‘ua fetalai mai ai lou Atua.
10. ‘Ia fiafia fa‘atasi ma Ierusalema,ma ‘ia ‘oli‘oli ‘iā te ia ‘outou uma o ē alolofa ‘iā te ia;‘ia matuā ‘oli‘oli fa‘atasi ma ia,‘outou uma sa fa‘anoanoa ‘ona o ia.
11. ‘Ina ‘ia ‘outou fesusui ma ‘ia malilie i le susu o lona fa‘amafanafana mai;‘ina ‘ia matuā fesusui lava,ma ‘ia ‘outou fiafia i le tele o lona mamalu.
12. Auā o lo‘o fa‘apea ‘ona fetalai mai o le ALI‘I:Fa‘auta, ‘ou te fa‘atupuina le manuia ‘iā te ia e pei o se vaitafema le mamalu o nu‘u ‘ese e pei o le alia ‘ua oso i tua;tou te fesusui fo‘i; e afisi ‘outou i lona itū,e fa‘a‘oli‘oliina fo‘i i ona vae.
13. E pei o le tagata ‘ua fa‘amaiseina e lona tinā,e fa‘apea ‘ona ‘ou fa‘amaise ‘iā te ‘outou;e fa‘amaiseina lava ‘outou i Ierusalema.
14. Tou te va‘aia fo‘i, e ‘oli‘oli ai o ‘outou loto,e tupu olaola fo‘i o ‘outou ivi e pei o le vao mu‘a;e iloa le ‘a‘ao o le ALI‘I o ana ‘au‘auna;‘ae matuā to‘asā o ia i ē ita ‘iā te ia.
15. Auā fa‘auta, e afio mai le ALI‘I i le afi,e pei o le asiosio fo‘i ona nofoa fa‘ata‘avalevale,‘ina ‘ia fa‘afo‘i atu lona tigā i le to‘asā,ma lana a‘oa‘iga i le mumū o le afi.
16. Auā e fa‘asala le ALI‘I i tagata uma i le afi‘atoa ma lana pelu; e tele fo‘i le fasi a le ALI‘I.
17. O ē latou te fa‘asāina i latou lava, ma latou fa‘amamāina i latou lava i fa‘ato‘aga, o lo‘o mulimuli i le tasi i totonu, o ē ‘a‘ai i tufa‘aga o pua‘a, ma le mea e ‘inosia, ma le imoa, e fano fa‘atasi i latou, ‘ua fetalai mai ai le ALI‘I.
18. A o a‘u, ‘ua o‘o mai i o‘u luma a latou galuega ma o latou manatu, e fa‘apotopotoina ai o nu‘u ‘ese uma ma gagana; latou te ō mai ma latou iloa lo‘u mamalu.
19. ‘Ou te tu‘uina atu fo‘i ‘iā te i latou le fa‘ailoga; a o i latou ‘ua sao, ‘ou te ‘auina atu ni o latou i nu‘u ‘ese, o Tasesa, ma Pula, ma Luti, o ē lolo‘u le ‘aufana, o Tupalu ma Iavana, o nu‘u tu matāfaga e mamao, o ē ‘ua lē lagona le tala ‘iā te a‘u, ma latou lē iloa lo‘u mamalu; latou te ta‘u atu fo‘i lo‘u mamalu i nu‘u ‘ese.
20. Latou te ‘aumaia fo‘i o ‘outou uso uma mai nu‘u uma, o le taulaga i le ALI‘I, i luga o solofanua, ma nofoa fa‘ata‘avalevale ma fata ma falata ma kamela i lo‘u mauga pa‘ia o Ierusalema, ‘ua fetalai mai ai le ALI‘I; e pei ‘ona ‘aumaia e le fānauga a Isaraelu o le taulaga i le ipu mamā i le fale o le ALI‘I.
21. ‘Ou te ‘aumaia fo‘i ni o latou e fai ma ositaulaga e fai fo‘i ma sa Levī, ‘ua fetalai mai ai le ALI‘I.
22. Auā e pei ‘ona tumau i o‘u luma o le lagi fou ma le lalolagi fou ‘ou te faia,‘ua fetalai mai ai le ALI‘I, e fa‘apea ‘ona tumau o a ‘outou fānau ma lo ‘outou igoa.
23. Mai lea masina fa‘ato‘ā va‘aia ma lea masina fa‘ato‘ā va‘aia,o lea sapati ma lea sapati e ō mai ai tagata uma lava e ifo mai i o‘u luma,‘ua fetalai mai ai le ALI‘I.
24. Latou te ō atu fo‘i ma latou matamata i tino o tagata oti o ē sa fouvale ‘iā te a‘u; auā e lē mamate o latou ilo, e lē tineia fo‘i lo latou afi; e ‘inosia fo‘i i latou e tagata uma lava.#