1. Auā fa‘auta, e ‘ave‘eseina i Ierusalema ma Iuta, e le Ali‘i o le ALI‘I o ‘au, o lea lagolago ma lea lagolago; o le lagolago areto uma, ‘atoa ma le lagolago vai uma.
2. O le toa ma le tagata tau, o le fa‘amasino ma le perofeta ma le taulāitu, ‘atoa ma le toeaina;
3. o le ta‘ita‘i o le to‘alimagafulu ma le ali‘i mamalu, ma le faipule ma le tufuga poto, i le ma lē ‘ua poto i le taufa‘a‘ole‘ole.
4. ‘Ou te tu‘uina atu fo‘i tama e fai mo latou ali‘i sili, e pule fo‘i tamaiti ‘iā te i latou.
5. E sauā fo‘i le nu‘u, o le tasi i le tasi, o le tagata fo‘i i lē la te tuā‘oi, e fa‘asiasia le tamaitiiti i le toeaina, o le tagata fa‘atauva‘a fo‘i i lē ‘ua mamalu.
6. ‘Ona tago atu ai lea o le tagata i lona uso o le ‘āiga o lona tamā ma fa‘apea atu, “O lo‘o ‘iā te oe ‘ofu, ‘inā fai ia oe mo matou faipule, ‘ia e pule a o fai lenei malaia.”
7. O lea aso e ‘alaga atu ai o ia, e fa‘apea atu, “E lē fai a‘u ma fofō, auā e lē o i ai i lo‘u fale o mea e ‘ai po o ‘ofu; ‘aua nei faia o a‘u ma faipule o le nu‘u.”
8. Auā ‘ua tausuai Ierusalema, ‘ua pa‘ū fo‘i Iuta; auā o latou laulaufaiva ma a latou amio, ‘ua o‘o ia i le ALI‘I e fa‘a‘ono‘ono ai i luma o lana afio.
9. ‘Ua iloa i latou i le amio a o latou mata, ‘ua latou fa‘aali mai a latou agasala pei o Sotoma, ‘ua latou le natia lava. ‘Oi talofa ‘iā te i latou! auā o i latou lava ‘ua o‘o ai le leaga ‘iā te i latou.
10. Fai atu ia i lē ‘ua amiotonu, e manuia o ia auā o le fua o a latou galuega latou te ‘a‘ai ai.
11. ‘Oi talofa i lē ‘ua amio leaga! e malaia o ia; auā e tu‘uina atu ‘iā te ia le taui o ona lima.
12. O lo‘u nu‘u, o ē ‘ua sauā i ai o tamaiti ia, e pule fafine ‘iā te i latou. Lo‘u nu‘u e, ‘ua fa‘asesēina oe e ou lava ta‘ita‘i, ‘ua latou lepetia le ala ‘e te ui ai.
13. ‘Ua tu mai le ALI‘I e fai le finauga, ‘ua tula‘i fo‘i o ia e fa‘amasino i nu‘u.
14. E afio mai le ALI‘I e fa‘amasino i toeaina o lona nu‘u, ‘atoa ma o latou ali‘i sili; auā ‘ua ‘outou fa‘aumatia le tōvine, o mea na faoa i ē matitiva ‘ua i ai ia i o ‘outou fale.
15. Se a le mea ‘ua ‘outou tu‘imomomo ai lo‘u nu‘u, ma ‘outou ‘olo a‘i mata o ē matitiva? o lo‘o fa‘apea mai ai le Ali‘i le ATUA o ‘au.
16. ‘Ua fetalai mai le ALI‘I: ‘Ua fa‘amaualuga tama fafine a Siona ma latou sāvavali mo latou ‘ua ua fālō, ‘ua fa‘amatāitu i latou, ‘ua sāvavali fa‘ateine pe a latou feoa‘i ma ‘ua fai tauvae i o latou vae.
17. O le mea lea e fa‘atulaina ai e le Ali‘i o tumua‘i o ulu o tama fafine a Siona, e fa‘aalia o latou tino e le ALI‘I.
18. O lea aso e ‘ave‘eseina ai e le Ali‘i o mea e fa‘amatagofie a‘i tauvae ma teuga fa‘a‘upega, ‘atoa ma mea e asoa ai;
19. o mama i taliga ma taulima, ‘atoa ma ‘ie ufimata;
20. o pulou ma filifili u‘amea i vae ma fusi ma fagu e sogi ai, ‘atoa ma mea e sao ai;
21. o mama i lima ma mama i isu;
22. o ‘ofu matagofie ma ‘ofu tino e tetele ma pulupulu, ‘atoa ma taga;
23. o tioata ma ‘ofu lino ma pulou, ‘atoa ma ‘ie e ufita‘i ai le tino.
24. E i ai fo‘i le papala ‘ua elo e sui a‘i le manogi lelei; e i ai fo‘i le maea e sui a‘i le fusi; o le ulu tula fo‘i e sui a‘i le lauulu ‘ua fili; o le lavalava talatala e sui a‘i le ‘ofu tele; o le fa‘ailoga mū e sui a‘i le lālelei.
25. E oti ou tagata i le pelu, o ou fitafita fo‘i e oti i latou i le tau‘a.
26. E feoi ma fa‘anoanoa ona faitoto‘a, e nofo fo‘i o ia i le ‘ele‘ele ‘ua fa‘agaogaoina.