1. O lea aso e tāofi atu ai e fafine e to‘afitu i le tane e to‘atasi, o fa‘apea atu,“Matou te ‘a‘ai ‘iā matou lava mea e ‘ai,matou te ‘o‘ofu fo‘i i o matou lava ‘ofu,tau ‘ina igoa i matou i lou igoa e ‘ave‘eseina ai o matou luma.”
2. O lea aso e ‘avea ai le La la‘au a le ALI‘I ma mea matagofie ma le vi‘ia; o le fua fo‘i o le lau‘ele‘ele e fai ma mea lelei ma le matagofie ‘iā te i latou o Isaraelu o ē ‘ua sao.
3. E ta‘ufa‘asaina fo‘i lē na tu‘ua i Siona, ma lē ‘ua toe i Ierusalema; o i latou uma o ē ‘ua tusia fa‘atasi ma ē o ola i Ierusalema;
4. pe a uma ona fufulu ‘ese e le Ali‘i le otaota o tama fafine a Siona, a uma fo‘i ‘ona mulumuluina o le toto o Ierusalema a‘i totonu ‘iā te ia, i le agaga o le fa‘amasinoga ma le agaga o le fa‘amūina;
5. ‘ona faia lea e le ALI‘I i luga o mea uma i le mauga o Siona, o i luga fo‘i o le mea e potopoto ai, o le ao ma le asu i le ao, ma le pupula mai o le afi mumū i le po; auā o i ai le mamalu i luga o le matagofie uma.
6. E i ai fo‘i le fale apitaga e fai ma paolo i le ao ‘ona o le vevela, e fai fo‘i ma mea e malu ai ma mea e ulu ai i le timuga ma le uaga.#