1. O le mea na va‘aia e Isaia le atali‘i o Amota ‘iā Iuta ma Ierusalema.
2. O aso e gata ai,e o‘o ‘ina fa‘atumauina ai o le maugao i ai le fale o le ALI‘I i tumutumu ō atu mauga,e fa‘amaualugaina fo‘i e sili i mauga,‘ona gasolo ane ai lea o nu‘u uma i ai.
3. E ō mai lava nu‘u e tele, ma latou fa‘apea ane,“Ō mai ia, tatou ō a‘e ia i le mauga o le ALI‘I,o le fale o le Atua o Iakopo.E a‘oa‘o mai fo‘i e ia ‘iā te i tatou i ona ala,‘ona tatou sāvavali ai lea i ona ala.”Auā e alu atu le tulafono a‘i Siona,o le afioga fo‘i a le ALI‘I a‘i Ierusalema.
4. E fa‘amasino fo‘i o ia i nu‘u ‘ese,ma a‘oa‘i atu i nu‘u e tele;‘Ona latou tu‘i ai lea ‘iā latou pelu e fai ma u‘amea o suōtosina,o latou tao fo‘i e fai ma polo e teu a‘i vine.E lē si‘i atu le pelu o le tasi nu‘u i le tasi nu‘u,latou te lē toe a‘oa‘o fo‘i i tau‘a.
5. Le ‘āiga o Iakopo e, ō mai ia ‘inā tatou sāvavali i le malamalama o le ALI‘I.
6. ‘Ua e lafoa‘iina lava lou nu‘u le ‘āiga o Iakopo, auā ‘ua tumu i latou i mea mai sasa‘e ma latou ‘i‘ite ao o le lagi fa‘apei o Filisitia, ‘ua latou osi feagaiga fo‘i ma le fānau a tagata ‘ese.
7. ‘Ua tumu fo‘i lo latou nu‘u i ario ma auro, e lē masino fo‘i o latou ‘oloa. ‘Ua tumu fo‘i lo latou nu‘u i solofanua, e lē masino lava o latou kariota.
8. ‘Ua tumu fo‘i lo latou nu‘u i tupua; ‘ua latou ifo i galuega a o latou lima, o mea lava na faia i o latou tamatama‘i lima.
9. ‘Ua lafotūina le tagata nu‘u, ‘ua fa‘amaulalo fo‘i le ali‘i; ‘e te lē fa‘amāgaloina fo‘i i latou.
10. Alu ia i totonu o le papa, ‘inā lafi ia i le ‘ele‘ele, ‘ona o le mata‘utia o le ALI‘I ma lona mamalu silisili.
11. E fa‘amaulaloina mata fa‘asiasia o tagata nu‘u; e fa‘amaulaloina fo‘i le fa‘amaualuga o ali‘i; na o le ALI‘I lava e vi‘ia i lea aso.
12. Auā o le aso o le ALI‘I o ‘au, e o‘o atu lea i ē fa‘asiasia ma ē fa‘amaualuga uma lava, ‘atoa fo‘i ma ē o fa‘afefeteina uma; ‘ona fa‘amaulaloina ai lea.
13. E o‘o i arasi uma ‘ua ‘u‘umi ma le maualuluga o Lepanona; e o‘o fo‘i i aluna uma o Vasana;
14. e o‘o i atu mauga maualuluga uma; e o‘o fo‘i i mauga tetele uma;
15. e o‘o i ‘olo maualuluga uma; e o‘o fo‘i i pā uma e le ā‘ea;
16. e o‘o i va‘a uma o Tasesa; e o‘o fo‘i i mea matagofie uma.
17. E fa‘amaulaloina lava le fa‘asiasia o tagata nu‘u; e fa‘amaulaloina fo‘i le fa‘amaualuga o ali‘i; na o le ALI‘I lava e vi‘ia i lea aso.
18. E matuā mavae lava tupua.
19. Latou te ulu atu fo‘i i ana o papa ma lua o le ‘ele‘ele, ‘ona o le mata‘utia o le ALI‘I ma lona mamalu silisili, pe a tula‘i o ia e lūlūina le lau‘ele‘ele.
20. O lea aso e lafoa‘i atu ai e tagata a latou tupua ario ma a latou tupua auro, na latou faia mo i latou e ifo i ai, e lafoa‘iina lava i afora ma pe‘a.
21. ‘Ina ‘ia latou ō atu i mavae vae o papa, ‘atoa ma vā i papa, ‘ona o le mata‘utia o le ALI‘I ma lona mamalu silisili, pe a tula‘i o ia e lūlūina le lau‘ele‘ele.
22. O ‘outou na, sōia le fa‘atuatua i tagata, o i ai lona mānava i ona pogaiisu; auā se a le mea e manatua ai o ia?#