Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28
  29. 29
  30. 30
  31. 31
  32. 32
  33. 33
  34. 34
  35. 35
  36. 36
  37. 37
  38. 38
  39. 39
  40. 40
  41. 41
  42. 42
  43. 43
  44. 44
  45. 45
  46. 46
  47. 47
  48. 48
  49. 49
  50. 50
  51. 51
  52. 52
  53. 53
  54. 54
  55. 55
  56. 56
  57. 57
  58. 58
  59. 59
  60. 60
  61. 61
  62. 62
  63. 63
  64. 64
  65. 65
  66. 66

Feagaiga Tuai

Feagaiga Fou

Isaia 41 O LE TUSI PA'IA - Ekalesia Katoliko Roma (RSCB)

‘Ua Apoapoa‘i atu i Tagata o le Atua

1. Fa‘alologo ia ‘outou o nu‘u tu matāfaga i o‘u luma,o nu‘u fo‘i, ‘ia toe fa‘afouina lo latou malosi.‘Ia fa‘alatalata mai i latou, ‘ona latou tautala ai lea;‘ia tatou fa‘alatalata fa‘atasi o le fa‘amasinoga.

2. O ai ‘ea na na fa‘aoso mai lē ‘ua amiotonu mai sasa‘e?‘ua vala‘au atu ‘iā te ia ‘ia mulimuli ‘iā te ia;‘Ua tu‘uina atu ‘iā te ia nu‘u ‘ese,‘ua ia fa‘ato‘ilaloina fo‘i tupu.‘Ua ia tu‘uina atu i latou e pei o le efu i lana pelu,‘ua tu‘uina atu i latou i lana ‘aufana e pei o tagutugutu o saito ‘ua ta‘ape.

3. ‘Ua ia tuliloaina i latou,‘ua ia ui atu ma le saogalemū i le ala e le‘i ui ai ona vae.

4. O ai ‘ea ‘ua ia saunia ma na faia,o lē vala‘au i tupulaga talu mai le amataga?O a‘u o le ALI‘I, o lē muamuae fa‘atasi fo‘i ma lē mulimuli, o a‘u lava ia.

5. Na va‘aia e nu‘u tu matāfaga,‘ona latou fefefe ai lea.‘Ua gatete tulu‘iga o le lalolagi;‘ua fa‘alatalata mai ma ō mai i latou.

6. ‘Ua latou fesoasoani le tasi i le tasi;‘ua fai atu le tasi i le tasi, “Fa‘amalosi ia.”

7. ‘Ua fa‘amalosi lē tufuga i lē fai mea u‘amea;o le ‘ua fa‘amolemole i le samala,‘ua ia fa‘amalosi i lē ‘ua tu‘i le mea e tu‘i ai u‘amea.‘Ua fa‘apea ane, “E lelei le pulu;”‘ua ia fa‘amauina fo‘i i fao, e le malūlūina.

8. A o oe Isaraelu e la‘u ‘au‘auna,o oe Iakopo e, lē na ‘ou filifilia,o le fānau a Aperaamo la‘u uō.

9. O oe lē na ‘ou ‘aumaia i tulu‘iga o le lalolagi,na a‘u vala‘auina fo‘i oe i ona itū mamao,na ‘ou fai atu fo‘i ‘iā te oe.“O oe o la‘u ‘au‘auna, o lē na ‘ou filifilia,‘ou te le‘i lafoa‘iina oe.”

10. ‘Aua ‘e te fefe, auā ‘ou te ‘iā te oe;‘aua le fētepatepa‘i,auā o a‘u o lou Atua; ‘ou te fa‘amalosia oe.E moni, ‘ou te fesoasoani ‘iā te oe;e moni, ‘ou te tāofia oe i lo‘u lima taumatau e i ai le amiotonu.

11. Fa‘auta, e mamā ma māsiasi i latou uma o ē ita ‘iā te oe;e ‘avea i latou e peiseaī ‘ua leai;e fano fo‘i i latou o ē finau atu ‘iā te oe.

12. ‘E te sā‘ilia i latou,a ‘e te lē maua i latou o ē fai oe mo latou fili.E ‘avea i latou peiseaī ‘ua leai,e peiseaī ‘ua matuā leai lava e na tau ma oe.

13. Auā o a‘u o le ALI‘I lou Atua,o lē ‘ua tāofi lou lima taumatau;O lē ‘ua fai atu ‘iā te oe,“‘Aua ‘e te fefe, o a‘u, ‘ou te fesoasoani ‘iā te oe.”

14. ‘Aua ‘e te fefe, le anufe Iakopo e,ma tagata o Isaraelu;o a‘u, ‘ou te fesoasoani ‘iā te oe.‘Ua fetalai mai ai le ALI‘I,o lē na fa‘atauina oe, le Pa‘ia o Isaraelu.

15. Fa‘auta, ‘ou te ‘avea oe ma mea e soli a‘i saito,e ma‘ama‘ai, e fou, e fai nifo.‘E te solia ai mauga, ma e nutinini‘i ai;‘e te faia fo‘i mauga iti e pei o aputi o saito.

16. ‘E te fa‘asavili ‘iā te i latou,e lelea fo‘i i latou i le matagi;e fa‘ata‘ape‘apeina i latou i le afā.A o oe, ‘e te ‘oli‘oli i le ALI‘I,‘e te mitamita fo‘i i le Pa‘ia o Isaraelu.

17. O ē ‘ua tigāina ma ē matitiva o lo‘o latou sā‘ili i se vai,a ‘ua leai; ‘ua matūtū o latou laulaufaiva i le fia inu.O a‘u o le ALI‘I, ‘ou te tali atu ‘iā te i latou,o a‘u o le Atua o Isaraelu,‘ou te lē tu‘ulafoa‘iina i latou.

18. ‘Ou te su‘ena vaitafe i luga o mauga tula,ma vaipuna i vanu.‘Ou te faia le vao lafulafuā ma vailepa,‘ou te faia fo‘i le lau‘ele‘ele naumati ma vaipuna.

19. ‘Ou te avatu i le lau‘ele‘ele lafulafuā le arasi,ma le setima, ma le atasi, ma le la‘au e maua ai le suāu‘u.‘Ou te tu‘uina atu fo‘i i le toafa o le perosi,o le titara, fa‘atasi ma le tasura.

20. ‘Ina ‘ia latou va‘ai, ma latou iloa,ma mafaufau ma fa‘autauta fa‘atasi.O le ‘a‘ao lava o le ALI‘I na faia ai lea mea,o le Pa‘ia o Isaraelu ‘ua na faia lava.

‘Ua Lu‘itau e le Atua ‘ia atua Sesē

21. ‘Aumai ia a ‘outou finauga,‘ua fetalai mai ai le ALI‘I.Laulau mai ia a ‘outou ‘upu e finau malosi ai,‘ua fetalai mai ai le Tupu o Iakopo.

22. Se‘i latou laulau mai, ma latou fa‘aali mai ia i tatou mea e tutupu.‘ia latou fa‘aali mai mea muamua, po o a ia mea;‘Ona tatou mafaufau ai lea, ma tatou iloa le i‘uga o na mea;pe fa‘ailoa mai e i latou mea e o‘o mai.

23. Fa‘aali mai ia o mea e tutupu amulī,‘ina ‘ia matou iloa o atua lava ‘outou;‘Ia ‘outou faia lava se mea lelei, pe fai se mea leaga,‘ina ‘ia matou feva‘ava‘aia‘i ma tatou iloa fa‘atasi.

24. Fa‘auta, e sili se mea ‘ua leai ‘iā te ‘outou,e sili fo‘i le mea ‘ua leai i la ‘outou galuega;e ‘inosia lē na te filifili ‘iā te ‘outou.

25. ‘Ua ‘ou fa‘aosoina le tasi mai le itū i matū,e sau fo‘i o ia; o le mea e alu a‘e ai le lāna te vala‘au ai i lo‘u igoa.Na te sau i ali‘i e pei o le ‘omea,e pei o lē fai ipu ‘omea fo‘i ‘ona soli i le ‘omea.

26. O ai ‘ea ‘ua na fa‘aali mai talu le amataga,‘ina ‘ia tatou iloa?mai anamua fo‘i, ‘ina ‘ia tatou fa‘apea ane,“‘Ua tonu.” E moni, sa leai sē na fa‘aali mai;sa leai lava sē na fa‘ailoa mai;sa leai lava sē na fa‘alogo ‘iā ‘outou ‘upu.

27. Na a‘u mua‘i fai atu ‘iā Siona,Fa‘auta, fa‘auta ‘iā te i latou;na a‘u avatua fo‘i ‘iā Ierusalema lē na te ‘aumaia le tala lelei.

28. Na ‘ou va‘ai, ‘ae leai se tagata;o i latou nei lava, ‘ae leai sē fa‘aali mai.Na a‘u fesili atu ‘iā te i latou,a ‘ua latou lē mafai ‘ona tali mai.

29. Fa‘auta, o mea le aogā i latou uma;o a latou mea e fai ‘ua matuā leai lava ia;o le matagi ma le mea fa‘atauva‘a a latou tupua u‘amea.