1. O lona sefulu ma le fa o tausaga o le tupu o Esekia na si‘i ai le tau‘a e Sanerivi le tupu o Asuria i ‘a‘ai uma o Iuta e nofo ‘olo ma na ā‘ea ai.
2. ‘Ua ‘a‘auina mai fo‘i e le tupu o Asuria mai Lakisa o Ravesaki ma ‘au e tele, i Ierusalema i le tupu o Esekia; ‘ua tu mai ia o latalata ane i le alāvai o le vailepa aupitoaluga, i le ala tele o le fanua o le ta ‘ofu.
3. ‘Ona ō atu ai lea ‘iā te ia o Eliakimo le atali‘i o Hilikia, o lē na pule i le ‘āiga ma Sevena le tusi‘upu, ma Ioaa le atali‘i o Asafo le fātua‘iupu.
4. ‘Ona fai mai ai lea o Ravesaki ‘iā te i latou: “‘Ia ‘outou fai atu ‘iā Esekia, o lo‘o fa‘apea ‘ona fetalai mai o le tupu silisili, o le tupu o Asuria, Pe se a lea fa‘atuatuaga ‘ua e fa‘atuatua i ai?
5. ‘Ua e fa‘apea ane, (a o ‘upu fa‘atauva‘a lava,) ‘ua ‘iā te oe le poto ma le malosi e fai a‘i tau‘a; o lenei, pe ‘e te fa‘atuatua ‘iā te ai, ‘ua e fou ai a‘u?
6. Fa‘auta, ‘ua e fa‘atuatua i lenā to‘oto‘o ‘ua gapēpē o Aikupito, a to‘oto‘o i ai se tagata e tuia ai lona lima ‘ia ati; e fa‘apea lava Farao le tupu o Aikupito ‘iā te i latou uma o ē fa‘atuatua ‘iā te ia.
7. ‘Ae ‘āfai ‘e te fa‘apea mai ‘iā te a‘u, ‘Matou te fa‘atuatua i le ALI‘I lo matou Atua;’ e lē o ia lava ‘ea ‘ua ‘ave‘eseina ai e Esekia o ana mea maualuluga ma ona fatafaitaulaga ma ‘ua fai atu ‘iā Iuta ma Ierusalema, ‘‘Ia ‘outou tapua‘i i luma o lenei fatafaitaulaga?’
8. O lenei, ‘inā ‘aumai ia ni mea e tu‘u fa‘afa‘atau i lo‘u ali‘i le tupu o Asuria, ‘ona ‘ou avatu ai lea ‘iā te oe o solofanua e lua afe, pe ‘āfai ‘e te mafaia e oe ‘ona ia tofu ma sē ti‘eti‘e ai.
9. ‘Ia, e mafai fa‘apefea ‘ona e tulia se tasi ta‘ita‘i o ‘au‘auna e aupito ‘ona fa‘atauva‘a a lo‘u ali‘i? A ‘ua e fa‘atuatua ‘iā Aikupito e maua ai kariota ma ‘au e ti‘eti‘e i solofanua?
10. Fā‘i ‘ea na ‘ou sau e aunoa ma le ALI‘I i lenei nu‘u e fa‘aumatia ai? Na fetalai mai le ALI‘I ‘iā te a‘u, Alu a‘e ia oe i lenā nu‘u ‘ia fa‘aumatia ai.”
11. ‘Ona fa‘apea atu ai lea o Eliakimo ma Sevena, ma Ioaa, ‘iā Ravesaki, “‘Ia e fetalai mai i au ‘au‘auna i le gagana a Arama, auā matou te lagona ai; ‘ae ‘aua ‘e te fetalai mai ‘iā te i matou i le gagana a Iuta ma le fa‘alogo mai o tagata o i luga o le pā.”
12. ‘Ona tali mai ai lea o Ravesaki, “‘Ua ‘auina mai ‘ea a‘u e lo‘u ali‘i i lou ali‘i ‘atoa ma oe e tautala atu ai i ia ‘upu, ‘ae lē ‘auina ‘ea i tagata o ē nonofo i luga o le pā, ‘ina ‘ia latou topalega ma feinu i o latou lava miaga fa‘atasi ma ‘outou?”
13. ‘Ona tu mai ai lea o Ravesaki, ‘ua ‘alaga ‘ua leo tele i le gagana a Iuta, ‘ua fa‘apea mai, “Fa‘alogologo mai ia i le afioga a le tupu silisili, o le tupu o Asuria.
14. O lo‘o fa‘apea ‘ona fetalai mai o le tupu: ‘‘Aua nei ‘olegia ‘outou e Esekia; auā na te lē mafaia ‘ona lavea‘i ‘iā te ‘outou.
15. ‘Aua ne‘i fa‘atupuina fo‘i e Esekia so ‘outou fa‘atuatua i le ALI‘I, o lo‘o fa‘apea ane o ia, E lavea‘i mai lava le ALI‘I ‘iā te i tatou; e lē tu‘uina atu lenei ‘a‘ai i le lima o le tupu o Asuria.’
16. ‘Aua ne‘i ‘outou fa‘alogo ‘iā Esekia; auā o lo‘o fa‘apea ‘ona fetalai mai o le tupu o Asuria: ‘‘Inā tatou fai ia se leleiga ma a‘u ma ‘ia ‘outou ō mai ‘iā te a‘u, ‘ona ‘outou ‘a‘ai ai lea ta‘itasi i lona lava vine ma ta‘itasi i lona lava mati ma ‘outou ta‘itasi ma inu le vai o lona lava vai‘eli;
17. se‘ia ‘ou alu atu e ‘ave ‘iā te ‘outou i le nu‘u fa‘apei o lo ‘outou lava nu‘u, o le nu‘u o i ai saito ma uaina, o le nu‘u o i ai areto ma tōvine.
18. ‘Ia ‘outou ne‘i ‘olegia ‘outou e Esekia, o lo‘o fa‘apea ane, E lavea‘i mai le ALI‘I ‘iā te i tatou. Pe i ai ‘ea se atua o i nu‘u ‘ua na lavea‘iina lona lava nu‘u a‘i le lima o le tupu o Asuria?
19. Po o ifea atua o Amato ma Arepa? Po o ifea atua o Sefavaima? Po o ‘ua latou lavea‘iina ‘ea Samaria a‘i lo‘u lima?
20. Po o ai ‘ea ni atua uma o ia nu‘u ‘ua latou lavea‘iina o latou nu‘u a‘i lo‘u lima, ‘ina ‘ia lavea‘iina Ierusalema e le ALI‘I a‘i lo‘u lima?’”
21. A ‘ua fa‘alologo i latou, ‘ua latou le tali atu se ‘upu ‘iā te ia; auā sa fa‘apea mai le poloa‘iga a le tupu, “‘Aua ne‘i tali atu ‘iā te ia.”
22. ‘Ona ō mai ai lea o Eliakimo le atali‘i o Hilikia, lē na pule i le ‘āiga ma Sevena le tusi‘upu ma Ioaa le atali‘i o Asafo le fātua‘iupu, ‘ua ō mai ‘iā Esekia, ma o latou ‘ofu ‘ua saei, ‘ua latou tala mai ‘iā te ia o ‘upu a Ravesaki.#