1. Na fai le tautō e tagata o Isaraelu i Mesepa, o lo‘o fa‘apea, “E leai so tatou e avatu lona afafine e fai ma avā i so sa Peniamina.”
2. ‘Ona o‘o atu lea o le nu‘u i Peteli, ‘ua latou nonofo ai i luma o le Atua, ‘ua o‘o i le afiafi. ‘Ona leo tetele ai lea i latou ma fētāgisi i le tagi tele.
3. ‘Ua latou fai atu, “Le ALI‘I e, le Atua o Isaraelu, pe se a le mea na o‘o mai ai lenei mea ‘iā Isaraelu, ‘ina ‘ua mavae atu le tasi itū‘āiga o Isaraelu i lenei aso?”
4. ‘Ona o‘o lea i le taeao ‘ua ala usu le nu‘u, ‘ua latou faia i lea mea le fatafaitaulaga, ma avatu ai taulaga mū ma taulaga fa‘afetai.
5. ‘Ua fai ane le fānauga a Isaraelu, “O ai ‘ea so le ‘au itū‘āiga uma o Isaraelu na lē ō a‘e i le ALI‘I i le fa‘apotopotoga?” auā sa latou faia le tautoga mamafa i sē na te lē alu a‘e i le ALI‘I i Mesepa, sa fa‘apea, “E matuā fasiotia lava ia.”
6. ‘Ua salamō fo‘i le fānauga Isaraelu ‘ona o Peniamina lo latou uso, ‘ua latou fa‘apea ane, “‘Ua vavae‘eseina i lenei aso le tasi itū‘āiga nai ‘iā Isaraelu;
7. se a se mea tatou te faia ‘ia maua avā ma ē ‘ua totoe? auā ‘ua tautō i tatou i le ALI‘I, e lē avatu lava o tatou afafine e fai ma latou avā.”
8. ‘Ona fai ane ai lea o i latou, “O ai so le ‘au itū‘āiga o Isaraelu na lē alu a‘e i le ALI‘I i Mesepa? Fa‘auta fo‘i, e le‘i sau se tasi i le toagalauapi i le fa‘apotopotoga mai Iapese-Kiliata.”
9. ‘Ona latou faitaulia lea o le nu‘u; fa‘auta, ‘ua lē i ai se tagata o ē nonofo i Iapese-Kiliata.
10. ‘Ona ‘a‘auina ai lea e le fa‘apotopotoga o tagata e sefulu afe ma afe e lua o ē totoa; ‘ua fai atu ‘iā te i latou, o lo‘o fa‘apea, “Ō ia, ‘inā ‘outou fafasi i le pelu o ē nonofo i Iapese-Kiliata, o fafine ‘atoa ma tamaiti;
11. a o lenei le mea tou te faia, tane uma, ma fafine uma ‘ua feusua‘i ma tamaloloa ‘ia fa‘aumatia i latou.”
12. ‘Ua latou maua i ē na nonofo i Iapese-Kiliata o teine taupou e to‘afa selau, o ē na lē feusua‘i ma ni tamaloloa; ‘ua latou ‘aumaia i latou i le toagalauapi i Sailo i le nu‘u o Kanana.
13. ‘Ona ‘a‘au atu lea nisi e le fa‘apotopotoga uma, ‘ua tautalatala ma le fānauga a Peniamina, sa i le papa o Rimoni; ‘ua vala‘au ‘iā i latou, ‘ua ola le tau‘a.
14. ‘Ua toe fo‘i Peniamina i ia ona aso, ‘ona latou avatu lea o avā ‘iā i latou ē na fa‘asaoina mai fafine o Iapese-Kiliata; ‘ae le‘i tofu ai i latou.
15. ‘Ua salamō le nu‘u ‘ona o Peniamina; auā ‘ua lepetia e le ALI‘I itū‘āiga o Isaraelu, ‘ua leai se tasi.
16. ‘Ua fai ane toeaina o le fa‘apotopotoga, “Se a sa tatou mea e fai mo e totoe, ‘ia maua avā, auā ‘ua fa‘aumatia fafine o Peniamina?”
17. ‘Ua fai ane, “‘Ia faia lava le tofi mo ē ‘ua sao o Peniamina, ‘ina ‘ia lē tineia se itū‘āiga o Isaraelu.
18. A o i tatou, tatou te lē mafaia ‘ona avatu ni o tatou afafine e fai ma latou avā.” Auā ‘ua tautō le fānauga a Isaraelu, o lo‘o fa‘apea, “‘Ia malaia sē na te avatu se avā ‘iā Peniamina.”
19. ‘Ona latou fai atu lea, “Fa‘auta, o le tausamiga i le ALI‘I e faia i Sailo i lea tausaga ma lea tausaga, o lo‘o i le itū i matū o Peteli, i sasa‘e o le ala tele e alu a‘e nai Peteli i Sekema, ma le itū i saute o Lepona.”
20. ‘Ua latou fai atu i le fānauga a Peniamina, o lo‘o fa‘apea, “Ō ia, ‘inā lamalama i tōvine,
21. ma ‘outou va‘ava‘ai; fa‘auta fo‘i, ‘āfai e ō atu teine o Sailo e fai le siva, ‘ona ‘outou ō atu lea a‘i tōvine ma ‘outou toso mā ‘outou ‘ia ta‘itasi ma lana avā a‘i teine o Sailo; ‘ona ‘outou ō lea i le nu‘u o Peniamina;
22. ‘āfai fo‘i e ō mai ‘iā te i matou o latou tamā, po o latou tuagane, e tagi mai ‘iā te i matou, ‘ona matou fai atu lea ‘iā te i latou, ‘‘Ia alofa ‘iā i latou ‘ona o i matou, auā na matou lē fa‘asao ni fafine i le tau‘a, ‘ia tofu le tagata ma lana avā; auā e lē o ‘outou na foa‘i atu ai ‘iā te i latou i nei ona po, ‘ina ne‘i nofo sala ai ‘outou.’”
23. ‘Ua faia fa‘apea le fānauga a Peniamina, ‘ua latou fai mā latou avā ē na sisiva, na latou toso e fa‘atatau ma i latou; ‘ona latou ō lea, ma fo‘i atu i o latou lava nu‘u, ma latou faia o latou ‘a‘ai, ma latou nonofo ai.
24. ‘Ona ō ai lea i ia ona aso o le fānauga a Isaraelu a‘i lea mea, e ta‘itasi i lona itū‘āiga ma lona ‘āiga; ‘ua latou ō ‘ese i lea mea e ta‘itasi i lona tofi.
25. O ia ona aso sa leai se tupu ‘iā Isaraelu, ‘ua ta‘itasi ma fai le mea e tusa i lona lava manatu.#