1. ‘Ona fai ai lea e le fānauga a Isaraelu le amio leaga i luma o le ALI‘I; ‘ona tu‘uina atu ai lea o i latou e le ALI‘I i lima o Mitiana i tausaga e fitu.
2. ‘Ua manumālō Mitiana ‘iā Isaraelu; ‘ona fai ai lea e le fānauga a Isaraelu mo i latou o lua o i mauga, o ana fo‘i, ma ‘olo, ‘ona o Mitiana.
3. A totō mea e Isaraelu ‘ona ō a‘e ai lea o Mitiana, ma Amaleka, ‘atoa ma tagata mai sasa‘e, ‘ua latou ō a‘e lava e tau ma i latou.
4. ‘Ua latou tolauapi e tau ma i latou, ‘ona latou fa‘atauma‘oi ai lea o mea na tutupu i le lau‘ele‘ele, e o‘o atu lava i Kasa; latou te le‘i tu‘una lava sina mea e ‘ai ma Isaraelu, po o se mamoe, po o se povi, po o se asini.
5. Auā na latou ō a‘e ma a latou manu ma o latou fale ‘ie, ‘ua latou ō a‘e lava e pei o sē ‘ina ta‘a tele; e lē mafaitaulia lava i latou ma a latou kamela; na latou o‘o atu fo‘i i le nu‘u e fa‘atauma‘oi ai.
6. ‘Ona matuā matitiva ai lea o Isaraelu ‘ona o Mitiana; ‘ona ‘alalaga ai lea o le fānauga a Isaraelu i le ALI‘I.
7. ‘Ua ‘alalaga atu i le ALI‘I le fānauga a Isaraelu ‘ona o Mitiana,
8. ‘ona ‘auina mai ai lea e le ALI‘I o le perofeta i le fānauga a Isaraelu, ‘ua fa‘apea mai o ia ‘iā te i latou, “‘Ua fa‘apea ‘ona fetalai mai o le ALI‘I le Atua o Isaraelu, o a‘u na ‘ou ‘aveina a‘e ‘outou nai Aikupito, ma a‘u ‘aumaia ‘outou nai le mea sa nofo pologa ai.
9. Na ‘ou lavea‘iina ‘outou nai le lima o Aikupito, ai lima lava o i latou uma ē na fa‘asauā ‘iā te ‘outou, ma ‘ou tulia i latou i o ‘outou luma; na ‘ou avatu fo‘i lo latou lau‘ele‘ele mo ‘outou.
10. Na ‘ou fa‘apea atu fo‘i ‘iā te ‘outou, ‘O a‘u o le ALI‘I lo ‘outou Atua; ‘aua tou te matata‘u i atua o sa Amorī, e o latou le nu‘u ‘ua ‘outou nonofo ai.’ A ‘ua ‘outou lē ‘ana‘ana i la‘u ‘upu.”
11. ‘Ona alu atu ai lea o le agelu a le ALI‘I, ‘ua nofo i lalo o le tapeneto sa i Ofira, na ‘iā Ioasa le sa Apiesera; o Kitiona lona atali‘i ‘ua ia sasa saito i le mea e soli ai vine, ‘ina ‘ia lilo ai ‘iā Mitiana.
12. ‘Ua fa‘aali mai ‘iā te ia le agelu a le ALI‘I, ‘ua fa‘apea mai ‘iā te ia, “Oe na le toa malosi, o ‘iā te oe le ALI‘I.”
13. ‘Ona fai atu ai lea o Kitiona ‘iā te ia, “E! le ali‘i e, ‘āfai ‘ua ‘iā te i matou le ALI‘I, se a le mea ‘ua o‘o mai ai ia mea uma ‘iā te i matou; o ifea ‘ona vāvega uma, na ta‘u mai ai e o matou tamā ‘iā te i matou, ‘ua fa‘apea mai, ‘E le‘i ‘aveina a‘e ‘ea o i tatou e le ALI‘I ai Aikupito?’ A o ona po nei ‘ua lafoa‘iina ai i matou e le ALI‘I, ‘ua ia tu‘uina mai fo‘i i matou i lima o Mitiana.”
14. ‘Ona silasila mai ai lea o le ALI‘I ‘iā te ia, ‘ua fa‘apea mai, “Alu ia oe i lenei lou malosi, ‘e te lavea‘iina Isaraelu ai le lima o Mitiana; ‘ou te le‘i ‘auina atu ‘ea oe?”
15. ‘Ona fa‘apea atu ai lea o ia ‘iā te ia, “E! le Ali‘i e, ‘ou te lavea‘iina Isaraelu i ni a? fa‘auta mai, ‘ua topito ‘ona fa‘atauva‘a lo‘u ‘āiga i Manase; o a‘u fo‘i, o le aupito itiiti i le ‘āiga o lo‘u tamā.”
16. ‘Ona fa‘apea mai ai lea o le ALI‘I ‘iā te ia, “Auā tā te fa‘atasi lava ma oe; ‘e te fasia fo‘i Mitiana, e peiseaī o se tagata e to‘atasi.”
17. ‘Ona fai atu ai lea o ia ‘iā te ia, “‘Āfai ‘ua e alofa mai ‘iā te au, ‘ia e faia se fa‘ailoga mo a‘u, e iloa ai o oe lava ‘ua tā tautalatala ma a‘u.
18. ‘Ou te fa‘atoga atu, ‘aua ne‘i e maliu ‘ese ‘i‘inei, se‘ia a‘u sau ‘iā te oe, ma ‘ou ‘aumai la‘u taulaga, ma ‘ou tu‘uina atu i ou luma.”‘Ona fa‘apea mai ai lea o ia, “‘Ou te nofo lava se‘ia e fo‘i mai.”
19. ‘Ua alu atu Kitiona, ‘ua ia saunia le tama‘i ‘oti, ma areto e lē fa‘afefeteina na faia i le efa o falaoa; ‘ua tu‘u e ia tufa‘aga i le ‘ato, ‘ua ia tu‘u fo‘i le sua i le pani, ‘ona avatu lea ‘iā te ia i lalo o le tapeneto, ma tu‘u atu ai.
20. ‘Ua fai mai le agelu a le Atua ‘iā te ia, “‘Inā tago ia i tufa‘aga ma areto e lē fa‘afefeteina, ma e tu‘u atu i luga o lenei papa ma liligi atu i ai le sua.” ‘Ona fa‘apea ai lea o ia ‘ona fai.
21. ‘Ona fa‘aloaloa atu lea e le agelu a le ALI‘I le pito to‘oto‘o na i lona lima, ‘ua pa‘i atu i tufa‘aga ma areto e lē fa‘afefeteina; ‘ona alu a‘e ai lea o le afi nai le papa, ‘ua susunuina ai tufa‘aga ma areto e lē fa‘afefeteina. ‘Ona alu ai lea o le agelu a le ALI‘I nai ‘iā te ia.
22. ‘Ua iloa e Kitiona o le agelu a le ALI‘I lava o ia, ‘ona fa‘apea ane ai lea o Kitiona, “Auē, le Ali‘i e, le ATUA, auā ‘ua ‘ou iloa le agelu a le ALI‘I, ‘ua ma fesagai lava.”
23. ‘Ona fetalai mai ai lea o le ALI‘I ‘iā te ia, “‘Inā filemū ia oe, ‘aua ‘e te mata‘u, ‘e te lē oti.”
24. ‘Ona faia ai lea e Kitiona i lea mea o le fatafaitaulaga i le ALI‘I, ‘ua fa‘aigoa i ai, O le ALI‘I, e ona le filemū. ‘Ua i ai i Ofira o sa Apieserū ‘ua o‘o i ona po nei.
25. ‘Ua fetalai mai le ALI‘I ‘iā te ia i lea lava po, “‘Inā ‘ave ia le povi po‘a ta‘anoa a lou tamā, ma lona lua o povi po‘a, e fitu ona tausaga, ma ia o sōloi i lalo le fatafaitaulaga o Paala, o i lou tamā; ‘ia vavae fo‘i i lalo le tupua o Asaira ‘ua latalata ane i ai;
26. a ‘ia e faia se fata e fai ai taulaga i le ALI‘I lou Atua i luga o lenei ‘olo, ma le fafie ‘ua fa‘aafu; ‘e te ‘ave fo‘i lona lua o povi po‘a, ‘e te fai ai se taulaga mū i le la‘au o le tupua o Asaria o le a e vavae i lalo.”
27. ‘Ona ‘ave ai lea e Kitiona o tagata e to‘asefulu o ana ‘au‘auna, ‘ua faia lava e pei ‘ona fetalai mai ai o le ALI‘I ‘iā te ia; ‘ua faia e ia i le po, auā e lē mafai ‘iā te ia ‘ona faia i le ao, ‘ina ‘ua mata‘u lava o ia i le ‘āiga o lona tamā ‘atoa ma tagata o le ‘a‘ai.
28. ‘Ua ala i le taeao tagata o le ‘a‘ai, fa‘auta ‘ua sōloia i lalo le fatafaitaulaga o Paala, ma le tupua o Asaira na latalata ane i ai ‘ua vavaeina i lalo; ‘ua fai fo‘i le taulaga i le lua o povi po‘a i luga o le fata ‘ua faia.
29. ‘Ona latou fa‘apea ane ai lea o le tasi i le tasi, “Po o ai ‘ea ‘ua faia le mea nei?” ‘Ua fesilisili ma su‘esu‘e i latou, ‘ona fai ane ai lea o i latou, “Na faia le mea nei e Kitiona le atali‘i o Ioasa.”
30. ‘Ona fa‘apea atu ai lea o tagata o le ‘a‘ai ‘iā Ioasa, “‘Aumai ia lou atali‘i, ‘ina ‘ia oti o ia; auā ‘ua ia sōloia le fatafaitaulaga o Paala, auā fo‘i ‘ua ia vavaeina i lalo le tupua o Asaira na latalata ane i ai.”
31. ‘Ona fa‘apea mai ai lea o Ioasa ‘iā te i latou uma na tutū mai ‘iā te ia, “O ‘outou na, tou te finafinau ‘ea mo Paala? Tou te fia lavea‘iina o ia? o lē na te finau mo ia, ‘ia oti lava ia i le taeao nei; ‘āfai o se atua ia, ‘inā faia e ia lava lana finauga, auā ‘ua sōloia e se tasi lona fatafaitaulaga.”
32. O lea lava aso na ia fa‘aigoaina ai o ia, o Ierupaala, ‘ua fa‘apea atu, “‘Ia la finau o Paala ma ia, auā ‘ua ia sōloia lona fatafaitaulaga.”
33. ‘Ona fa‘apotopoto fa‘atasi ai lea o Mitiana uma lava, ma Amaleka ‘atoa ma tagata mai sasa‘e, ‘ua latou sopo‘ia mai le vaitafe, ‘ua latou tolauapi i le vanu o Isereelu.
34. A ‘ua ufitia Kitiona e le Agaga o le ALI‘I; ‘ona ili ai lea e ia o le pū, ‘ona fa‘apotopotoina lea o Apieseru e mulimuli atu ‘iā te ia.
35. ‘Ua ia ‘a‘auina atu savali ‘iā Manase uma, ‘ua fa‘apotopotoina fo‘i i latou e mulimuli atu ‘iā te ia; ‘ua ia ‘a‘auina atu o savali ‘iā Asera, ma Sepulona, ma Nafatali, ‘ona latou ō a‘e ai lea e fa‘afetaia‘i ‘iā te i latou.
36. ‘Ua fa‘apea atu Kitiona i le Atua, “‘Āfai ‘e te fa‘aolaina Isaraelu i lo‘u lima, e pei ‘ona e fetalai mai ai,
37. fa‘auta mai, o a‘u, ‘ou te tu‘uina atu le fulufulu mamoe i le mea e sasa ai le saito; ‘āfai ‘ua na o le fulufulu mamoe e i ai le sau, ‘ae matūtū le lau‘ele‘ele uma, ‘ona ‘ou iloa ai lea ‘e te fa‘aolaina Isaraelu i lo‘u nei lima, e pei ‘ona e fetalai mai ai.”
38. ‘Ona fa‘apea ai lava lea; na ala usu atu ia i le taeao, ‘ona tatao ai lea e ia o le fulufulu mamoe, na ia taulia fo‘i le sau nai le fulufulu mamoe, ‘ua tumu le ipu i le suāvai.
39. ‘Ona fai atu lea o Kitiona i le Atua, “‘Aua ‘e te to‘atama‘i ‘iā te a‘u, ‘ua na o le toe ‘upu ‘ou te fai atu ai nei; ‘ou te ‘ai‘oi atu ‘iā te oe, ‘ia toe tasi ‘ona ‘ou tofotofo i le fulufulu mamoe; ‘ia matūtū na o le fulufulu mamoe, a o le lau‘ele‘ele uma, ia i ai le sau.”
40. ‘Ua fa‘apea lava ‘ona faia e le Atua i lea lava po; auā ‘ua matūtū na o le fulufulu mamoe, a o le lau‘ele‘ele uma, sa i ai le sau.