1. ‘Ona alu atu ai lea o Apimeleko le atali‘i o Ierupaala i Sekema i tuagane o lona tinā, ‘ua tautalatala ma i latou ‘atoa ma le ‘āiga uma lava o le tamā o lona tinā, ‘ua fa‘apea atu,
2. “Se‘i ‘outou matuā fai atu i tagata uma o Sekema, ‘Po o ifea ‘ona malie ‘iā te ‘outou, pe pule ‘iā te ‘outou o atali‘i uma o Ierupaala o tagata e to‘afitugafulu lava ia, pe pule ‘iā te ‘outou le tagata e to‘atasi.’ ‘Ia ‘outou manatua fo‘i, o a‘u nei o ‘outou ivi ma o ‘outou ‘a‘ano.”
3. ‘Ona tautala lea ‘iā te ia o tuagane o lona tinā i tagata uma o Sekema ia ‘upu uma; ‘ona ua‘i atu ai lea o latou loto ‘iā Apimeleko, ma ‘ua latou fa‘apea ane, “O tatou uso lava ia.”
4. ‘Ona latou avatu ai lea ‘iā te ia o tupe e fitugafulu mai le fale o Paala-perita, na totogi a‘i e Apimeleko o tagata fa‘atauva‘a ma ē ulavavale, ‘ina ‘ia latou mulimuli atu ‘iā te ia.
5. ‘Ua alu atu o ia i le ‘āiga o lona tamā i Ofira ‘ona fasiotia lea e ia i luga o ma‘a e tasi ona lava uso, o atali‘i o Ierupaala e to‘afitugafulu tagata; a ‘ua sao Iotama le atali‘i o Ierupaala, o le ui‘i ia; auā na lafi lava ia.
6. ‘Ona fa‘apotopoto ai lea o tagata uma o Sekema, ‘atoa ma le ‘āiga uma o Milo; ‘ona latou ō lea, ma latou tofia Apimeleko e fai ma tupu i le mea ‘ua tu ai le aluna i Sekema.
7. ‘Ona ta‘ua atu lea ‘iā Iotama; ‘ona alu ai lea o ia, ma tu i le tumutumu o le mauga o Keresema, ‘ua ia leo tele ma ‘alaga, ‘ua fa‘apea atu ‘iā te i latou, “‘Outou tagata o Sekema e, ‘ia ‘outou fa‘alogologo mai ‘iā te a‘u, ‘ina ‘ia fa‘afofoga le Atua ‘iā te ‘outou.
8. Na ō atu la‘au a fa‘au‘uina se tupu mo i latou;‘ona latou fai atu ai lea i le olive,‘‘Inā fai ia oe mo matou tupu.’
9. A ‘ua fai mai le olive ‘iā te i latou,‘‘Ou te tu‘una ‘ea lo‘u lololo,o le mea e fa‘amamafaina atu ai le Atua ‘atoa ma tagata,i lo‘u alu ai e pule i la‘au?’
10. ‘Ona fai atu ai lea o la‘au i le mati,‘‘Inā sau ia oe, e fai oe mo matou tupu.’
11. A ‘ua fai mai le mati ‘iā te i latou,‘‘Ou te tu‘una ‘ea lo‘u suamalie,ma o‘u fua lelei, i lo‘u alu ai e pule i la‘au?’
12. ‘Ua fai atu fo‘i la‘au i le vine,‘‘Inā sau ia oe, e fai oe mo matou tupu.’
13. ‘Ona fai mai ai lea o le vine ‘iā te i latou,‘‘Ou te tu‘una ‘ea lo‘u uaina,o le mea e fa‘afiafia i le Atua‘atoa ma tagata, i lo‘u alu ai e pule i la‘au?’
14. ‘Ua fai atu fo‘i la‘au uma i le la‘au tuitui,‘‘Inā sau ia oe, e fai oe mo matou tupu.’
15. ‘Ona fai mai ai lea o le la‘au tuitui i la‘au,‘‘Āfai tou te fa‘amaoni ‘ona fa‘au‘uina o a‘u e fai mo ‘outou tupu,‘ia ‘outou ō mai, ‘ia ‘outou fa‘atuatua mai i lo‘u paolo;‘ae ‘āfai e leai, ‘ia alu atu le afi a‘i le la‘au tuitui,ma fa‘aumatia ai arasi o Lepanona.’
16. “O lenei, ‘āfai ‘ua fa‘amaoni ma ‘ua tonu la ‘outou amio, ‘ina ‘ua ‘outou tofia o Apimeleko e fai ma tupu; ‘āfai fo‘i ‘ua ‘outou agalelei atu ‘iā Ierupaala ma lona ‘āiga, ma ‘ua ‘outou faia ‘iā te ia e tusa ma mea na ia faia;
17. auā o lo‘u tamā na taulia le tau‘a mo ‘outou, na ia tu‘ulafoa‘iina lona ola ‘ina ‘ia lavea‘iina ai ‘outou a‘i lima o Mitiana;
18. a ‘ua laga mai ‘outou i le aso nei i le ‘āiga o lo‘u tamā, ma ‘ua ‘outou fasiotia ona atali‘i, o tagata e to‘afitugafulu, i luga o le ma‘a e tasi; o Apimeleko fo‘i o le tama a lana ‘au‘auna fafine ‘ua ‘outou faia o ia ma tupu o tagata o Sekema, auā o lo ‘outou uso lava ia.
19. ‘Ae ‘āfai ‘ua fa‘amaoni ma ‘ua tonu la ‘outou amio ‘iā Ierupaala ma lona ‘āiga i lenei lava aso, ‘ia ‘outou fiafia lava ‘iā Apimeleko. O ia fo‘i ‘ia fiafia lava ‘iā te ‘outou.
20. ‘Ae ‘āfai e leai, ‘ia alu atu le afi ai ‘iā Apimeleko e fa‘aumatia ai tagata o Sekema ma le ‘āiga o Milo; ia alu atu fo‘i le afi ai tagata o Sekema ma le ‘āiga o Milo e fa‘aumatia a‘i Apimeleko.”
21. ‘Ona tele vave ai lea o Iotama, ‘ua sola lava ia, ‘ua alu atu i Peeri, ‘ua ia nofo ai ‘ona o Apimeleko lona uso.
22. Na pule Apimeleko ‘iā Isaraelu i tausaga e tolu;
23. ‘ona tu‘uina atu ai lea e le Atua o le loto leaga ‘iā Apimeleko ma tagata o Sekema; ‘ona fa‘a‘ole‘ole ai lea o tagata o Sekema ‘iā Apimeleko,
24. ‘ina ‘ia o‘o le sauā na faia i atali‘i o Ierupaala e to‘afitugafulu, ma ‘ia tauia lo latou toto ‘iā Apimeleko lo latou uso, na na fasiotia i latou, ‘atoa ma tagata o Sekema e na fesoasoani ‘iā te ia i le fasiga o ona uso.
25. ‘Ua tofia e tagata o Sekema nisi e lamalama ‘iā te ia i tumutumu o mauga; ‘ua latou faoa mea a i latou uma o ē ui ane ‘iā i latou i lea ala; ‘ona ta‘u atu ai lea ‘iā Apimeleko.
26. ‘Ona ō mai ai lea o Kaala le atali‘i o Epeto ma ona uso, ‘ua latou ō atu i Sekema; ‘ona fa‘alagolago ai lea ‘iā te ia o tagata o Sekema.
27. ‘Ua latou ō atu i le fanua, ‘ua latou tau vine i o latou tōvine, ‘ua latou solia fo‘i fua o le vine, ‘ua pepese fiafia i latou; ‘ua latou ō atu fo‘i i le malumalu o lo latou atua, na latou ‘a‘ai, ma inu, ma ‘ua latou fetu‘u ‘iā Apimeleko.
28. ‘Ona fa‘apea atu ai lea o Kaala le atali‘i o Epeto, “Po o ai ‘ea Apimeleko po o ai fo‘i Sekema tatou te ‘au‘auna i ai? E lē o le atali‘i o Ierupaala ‘ea o Sepula fo‘i o le ‘ua tofia e ia e pule la ‘outou ‘au‘auna i tagata o Hamoro le tamā o Sekema; se a le mea tatou te ‘au‘auna ai ‘iā te ia?
29. E! ‘ana ‘iā te a‘u le pule i le nu‘u nei: po ‘ua ‘ou ‘ave ‘ese ai ‘iā Apimeleko! ‘Ua fa‘apea atu fo‘i o ia ‘iā Apimeleko, ‘‘Inā fa‘ato‘atele ia au ‘au ma e sau.’”
30. ‘Ua fa‘alogo fo‘i Sepula le ali‘i o le ‘a‘ai i ‘upu a Kaala le atali‘i o Epeto, ‘ona matuā tupu ai lea o lona ita.
31. ‘Ua ia ‘a‘auina atu fa‘alilolilo le savali ‘iā Apimeleko ‘ua fa‘apea atu, “Fa‘auta, o Kaala le atali‘i o Epeto ma ona uso, ‘ua latou ō mai i Sekema; fa‘auta fo‘i, ‘ua latou lagaina le ‘a‘ai e fou ‘iā te oe.
32. O lenei, ‘ia e laga po mai oe, ‘atoa ma le nu‘u ‘ua ‘iā te oe, ma ē lalafi i le vao;
33. a o‘o fo‘i i le taeao i le fa‘ato‘ā alu a‘e o le lā, ‘e te laga mai ai, ma e fa‘asalalau mai i luma o le ‘a‘ai; fa‘auta fo‘i, o ia ma le nu‘u ‘ua ‘iā te ia, a latou ō atu ‘iā te oe, ‘ona faitalia lea oe se mea ‘e te faia ‘iā te ia.”
34. ‘Ona laga po ai lea o Apimeleko ‘atoa ma le nu‘u uma ‘ua ‘iā te ia, ‘ua latou lalafi e latalata ane i Sekema o ‘au e fa.
35. ‘Ua alu atu fo‘i Kaala le atali‘i o Epeto, ‘ua tu fo‘i o ia i le puipui o le faitoto‘a o le ‘a‘ai; ‘ona laga mai ai lea o Apimeleko ma le nu‘u ‘ua ‘iā te ia sa lalafi.
36. ‘Ua iloa atu e Kaala le nu‘u, ‘ona fa‘apea atu ai lea o ia ‘iā Sepula, “Fa‘auta i le nu‘u ‘ua alu ifo i tumutumu o mauga,”‘Ona fai mai ai lea o Sepula ‘iā te ia, “‘Ua e iloa tau o ata o mauga a peiseaī ni tagata.”
37. ‘Ona toe fai atu ai lea o Kaala, ‘ua fa‘apea atu, “Fa‘auta, ‘ua ō ifo le nu‘u mai le mea maualuga i le nu‘u, ‘ua alu ane fo‘i le tasi ‘au i le aluna o i Meoneni.”
38. ‘Ona fai atu ai lea o Sepula ‘iā te ia, “O fea o i ai nei lou gutu, sa e fa‘apea ai, ‘O ai ‘ea Apimeleko matou te ‘au‘auna ‘iā te ia?’ E lē o le nu‘u ‘ea lenei sa e ta‘ufa‘atauva‘aina? o lenei, alu atu ia, tou te tau ma i latou.”
39. ‘Ona alu atu lea o Kaala i luma o tagata o Sekema, ‘ua tau ma Apimeleko.
40. ‘Ona tulia lea o ia e Apimeleko ‘ua sola lava ia i ona luma; e to‘atele o i latou ‘ua pa‘u‘ū ‘ua manunu‘a, ‘ua o‘o atu i le puipui o le faitoto‘a.
41. ‘Ua nofo Apimeleko i Aruma, a ‘ua tuli e Sepula ‘iā Kaala ma lona ‘au uso, ‘ina ‘ia lē nonofo i latou i Sekema.
42. ‘Ona o‘o lea i le taeao, na ō atu ai le nu‘u i le vao; ‘ua latou ta‘u atu ai ‘iā Apimeleko.
43. ‘Ona ‘ave ai lea e ia o le nu‘u, ‘ua ia vāea i latou i ‘au e tolu, ‘ua lalafi ai i le vao; ‘ona va‘ai lea o ia fa‘auta, ‘ua ō mai le nu‘u nai le ‘a‘ai, ‘ona laga atu lea o ia ‘iā te i latou, ma fasi ‘iā te i latou.
44. ‘Ua salalau Apimeleko ma le ‘au sa ‘iā te ia, ‘ua latou tutū atu i le puipui o le faitoto‘a o le ‘a‘ai; a o ‘au e lua ‘ua fa‘asalalau i latou i ē na i ai uma lava i le vao, ma latou fafasi ‘iā i latou.
45. ‘Ua tau lava Apimeleko ma le ‘a‘ai, ‘ua po lava lea aso: ‘ua ia maua le ‘a‘ai, ma le nu‘u sa i ai ‘ua na fasia, ma na sofaia le ‘a‘ai, ma na lūlūina ai i le masima.
46. ‘Ua fa‘alogo ai tagata uma i le ‘olo o Sekema, ‘ona latou ulufale ai lea i le ‘olo maualuga i le malumalu o le atua o Perita.
47. ‘Ua ta‘u atu ‘iā Apimeleko, ‘ua fa‘apotopotoina tagata uma i le ‘olo o Sekema;
48. ‘ona alu a‘e lea o Apimeleko i le mauga o Salemoni, o ia ‘atoa, ma le nu‘u uma sa ‘iā te ia; ‘ua ‘ave e Apimeleko to‘i i lona lima, ‘ua na vāea le la la‘au, ‘ua si‘i, ma fa‘ae‘e i lona ua, ma na fai atu i le nu‘u sa ‘iā te ia, “O le mea ‘ua ‘outou iloa ‘ua ‘ou faia, ‘ia vave ‘ona fai fa‘apea e ‘outou.”
49. ‘Ona ta lava lea e le nu‘u uma, e ta‘itasi ma lana la la‘au, ma latou mulimuli atu ‘iā Apimeleko, ‘ona latou tu‘u atu ai lea i le ‘olo maualuga, ma latou susunu i le afi le ‘olo maualuga i o latou luga; ‘ua oti ai tagata uma o le ‘olo o Sekema, pe ‘atoa le afe o tane ma fafine.
50. ‘Ona alu atu lea o Apimeleko i Tipesa, ‘ua tō ai lauapi i Tipesa, ‘ona ā‘ea ai lea.
51. Sa i ai le ‘olo malosi i totonu o le ‘a‘ai, na sōsōla i ai o tane ma fafine uma, o tagata uma lava o le ‘a‘ai; ‘ua latou pupuni ai ‘iā te i latou, ma latou ō a‘e i le fogā‘olo.
52. ‘Ua o‘o atu Apimeleko i le ‘olo, ma tau ai le tau‘a; ‘ua ia fa‘alatalata fo‘i i le puipui o le ‘olo e fa‘amū ai i le afi.
53. ‘Ona lafo lea e le tasi fafine o le fasi ma‘aolo i luga o le ulu o Apimeleko, ‘ua momomo ai lona ulu.
54. ‘Ona vala‘au loa lea o ia i le taule‘ale‘a o lona soātau, ‘ua fai atu ‘iā te ia, “Se‘i mai, ia lau pelu, ‘inā e fa‘aoti ‘iā te a‘u, ne‘i latou fa‘apea ‘iā te a‘u, ‘O le fafine na fasiotia ai o ia.’” ‘Ona tutu‘i ai lea ‘iā te ia e lona taule‘ale‘a, ‘ua oti ai.
55. ‘Ua iloa e tagata o Isaraelu ‘ua oti Apimeleko, ‘ona latou ta‘itasi lea ma alu i lona nu‘u.
56. ‘Ua fa‘apea ‘ona taui atu e le Atua le leaga o Apimeleko na ia faia i lona tamā, ‘ina ‘ua fasioti i ona uso e to‘afitugafulu;
57. o le leaga uma fo‘i o tagata o Sekema ‘ua fa‘afo‘i atu e le Atua i o latou ulu; ‘ua o‘o fo‘i ‘iā te i latou le fetu‘u o Iotama le atali‘i o Ierupaala.#